ମୁଜାଫରାବାଦ: ପାକିସ୍ତାନ ଅଧିକୃତ କାଶ୍ମୀର (ପିଓକେ)ରେ ବଢ଼ୁଥିବା ଜନଅସନ୍ତୋଷ ଏବେ ନୂଆ ମୋଡ଼ ନେଇଛି। ସ୍ଥାନୀୟ ନାଗରିକ ଅଧିକାର ସଂଗଠନ ‘ଜମ୍ମୁ କାଶ୍ମୀର ଜଏଣ୍ଟ ଆୱାମୀ ଆକ୍ସନ କମିଟି’ (ଜେଏଏସି) ପାକିସ୍ତାନ ସରକାରଙ୍କ ସମ୍ମୁଖରେ ୩୮ ଦଫା ଦାବି ରଖି ୪୮ ଘଣ୍ଟାର ଚରମ ଚେତାବନୀ ଜାରି କରିଛି। ନିର୍ଦ୍ଧାରିତ ସମୟ ମଧ୍ୟରେ ଦାବି ପୂରଣ ନହେଲେ ବ୍ୟାପକ ଆନ୍ଦୋଳନ ଆରମ୍ଭ କରାଯିବ ବୋଲି ସଂଗଠନ ସ୍ପଷ୍ଟ କରିଛି।
ଜୁଲାଇ ୨୭ରେ ହେବାକୁ ଥିବା ଆଞ୍ଚଳିକ ନିର୍ବାଚନ ପୂର୍ବରୁ ଏହି ଆନ୍ଦୋଳନ ଗୁରୁତ୍ୱ ଅର୍ଜନ କରିଛି। ଜୁନ୍ ୯ରୁ ନାମାଙ୍କନ ପ୍ରକ୍ରିୟା ଆରମ୍ଭ ହେବା ସହ ଜେଏଏସି ପକ୍ଷରୁ ମୁଜାଫରାବାଦ ଅଭିମୁଖେ ବିଶାଳ ପ୍ରତିବାଦ ରାଲିର ଆହ୍ୱାନ କରାଯାଇଛି। ରାଜନୈତିକ ପର୍ଯ୍ୟବେକ୍ଷକଙ୍କ ମତରେ, ଏହା ଗତ କିଛି ବର୍ଷ ମଧ୍ୟରେ ପିଓକେର ସବୁଠାରୁ ବଡ଼ ଜନଆନ୍ଦୋଳନର ରୂପ ନେଇପାରେ।
ବର୍ତ୍ତମାନର ବିବାଦର କେନ୍ଦ୍ରବିନ୍ଦୁରେ ରହିଛି ପାକିସ୍ତାନରେ ବସବାସ କରୁଥିବା କାଶ୍ମୀରୀ ଶରଣାର୍ଥୀଙ୍କ ପାଇଁ ସଂରକ୍ଷିତ ୧୨ଟି ବିଧାନସଭା ଆସନ। ଆନ୍ଦୋଳନକାରୀଙ୍କ ଅଭିଯୋଗ ଯେ, ଏହି ଆସନ ମାଧ୍ୟମରେ ଇସଲାମାବାଦ ପିଓକେର ରାଜନୀତିରେ ଅନାବଶ୍ୟକ ହସ୍ତକ୍ଷେପ କରୁଛି। ସେମାନଙ୍କ ମତରେ, ୪.୩୬ ଲକ୍ଷ ଶରଣାର୍ଥୀ ଭୋଟରଙ୍କ ପାଇଁ ୧୨ଟି ସଂରକ୍ଷିତ ଆସନ ରହିଥିବା ବେଳେ ପ୍ରାୟ ୩୩ ଲକ୍ଷ ସ୍ଥାନୀୟ ଭୋଟରଙ୍କ ପାଇଁ କେବଳ ୩୩ଟି ସିଧାସଳଖ ଆସନ ରହିଛି, ଯାହା ପ୍ରତିନିଧିତ୍ୱରେ ଅସମାନତା ସୃଷ୍ଟି କରୁଛି।
ତେବେ ପିଓକେ ସର୍ବୋଚ୍ଚ ଅଦାଲତ ଏହି ସଂରକ୍ଷିତ ଆସନଗୁଡ଼ିକୁ ସାମ୍ବିଧାନିକ ସୁରକ୍ଷା ମିଳିଥିବା ଦର୍ଶାଇ ଏଗୁଡ଼ିକୁ ସରକାରୀ ନିଷ୍ପତ୍ତିରେ ରଦ୍ଦ କରାଯାଇପାରିବ ନାହିଁ ବୋଲି ମତ ଦେଇଛନ୍ତି।
ଶରଣାର୍ଥୀ ଆସନ ପ୍ରସଙ୍ଗ ସହିତ ଜେଏଏସିର ୩୮ ଦଫା ଦାବିରେ ଅର୍ଥନୈତିକ ସମସ୍ୟାକୁ ମଧ୍ୟ ପ୍ରାଧାନ୍ୟ ଦିଆଯାଇଛି। ସଂଗଠନ ଜଳବିଦ୍ୟୁତ ପ୍ରକଳ୍ପର ଚୁକ୍ତିନାମା ପୁନଃ ସମୀକ୍ଷା, ବିଦ୍ୟୁତ ଶୁଳ୍କ ହ୍ରାସ, ଅତ୍ୟାବଶ୍ୟକ ସାମଗ୍ରୀ ଉପରେ ସରକାରୀ ସବସିଡି ଏବଂ ଦ୍ରୁତ ବଢ଼ୁଥିବା ମୁଦ୍ରାସ୍ଫୀତି ନିୟନ୍ତ୍ରଣ ପାଇଁ ଠୋସ ପଦକ୍ଷେପ ଦାବି କରିଛି। ସ୍ଥାନୀୟ ଲୋକଙ୍କ ଯୁକ୍ତି ହେଉଛି, ଅଞ୍ଚଳରୁ ବିପୁଳ ପରିମାଣରେ ଜଳବିଦ୍ୟୁତ ଉତ୍ପାଦନ ହେଉଥିଲେ ମଧ୍ୟ ସେମାନଙ୍କୁ ଉଚ୍ଚ ଦରରେ ବିଦ୍ୟୁତ କାହିଁକି ମିଳୁଛି।
୨୦୨୩ରେ ଗଠିତ ଜେଏଏସି ଅଳ୍ପ ସମୟ ମଧ୍ୟରେ ପିଓକେର ଏକ ପ୍ରଭାବଶାଳୀ ନାଗରିକ ମଞ୍ଚରେ ପରିଣତ ହୋଇଛି। ପୂର୍ବରୁ ଅଟା ସବସିଡି ଓ ବିଦ୍ୟୁତ ଦର ବୃଦ୍ଧି ବିରୋଧରେ ଏହାର ଆନ୍ଦୋଳନ ବ୍ୟାପକ ସମର୍ଥନ ପାଇଥିଲା।
ଏପଟେ ସମ୍ବିଧାନିକ ବ୍ୟବସ୍ଥାକୁ ନେଇ ମଧ୍ୟ ପ୍ରଶ୍ନ ଉଠୁଛି। ପାକିସ୍ତାନ ‘ଆଜାଦ କାଶ୍ମୀର’ ବୋଲି ଦାବି କରୁଥିଲେ ମଧ୍ୟ ଏହି ଅଞ୍ଚଳର ପାକିସ୍ତାନ ସଂସଦରେ କୌଣସି ପ୍ରତିନିଧିତ୍ୱ ନାହିଁ। ନିଜସ୍ୱ ରାଷ୍ଟ୍ରପତି, ପ୍ରଧାନମନ୍ତ୍ରୀ ଓ ସର୍ବୋଚ୍ଚ ଅଦାଲତ ଥିଲେ ମଧ୍ୟ ପ୍ରଶାସନିକ କ୍ଷମତାର ବଡ଼ ଅଂଶ ପାକିସ୍ତାନ ସରକାରଙ୍କ ଅଧୀନସ୍ଥ ‘କାଶ୍ମୀର କାଉନସିଲ’ ହାତରେ ରହିଛି। ଏହି ପରିସ୍ଥିତି ମଧ୍ୟ ସ୍ଥାନୀୟ ଅସନ୍ତୋଷକୁ ଆହୁରି ବଢ଼ାଇଥିବା କୁହାଯାଉଛି। ସୂଚନା ଅନୁସାରେ, ପିଓକେର ପ୍ରାୟ ୫୭ ପ୍ରତିଶତ ଲୋକ ବର୍ତ୍ତମାନ ଖାଦ୍ୟ ଅସୁରକ୍ଷା ସମସ୍ୟାର ସମ୍ମୁଖୀନ ହେଉଛନ୍ତି।