ନିଆଳି: ଶ୍ରୀଜଗନ୍ନାଥ ସଂସ୍କୃତି ଓ ମହାପ୍ରଭୁଙ୍କ ଅଣସର ନୀତିର ଏକ ଅନନ୍ୟ ତଥା ଶତାବ୍ଦୀ ପୁରୁଣା ପରମ୍ପରା ପୁଣି ଥରେ ଦେଖିବାକୁ ମିଳିଛି। କଟକ ଜିଲ୍ଲା ପ୍ରାଚୀ କ୍ଷେତ୍ର ନିଆଳିରୁ ଶ୍ରୀକ୍ଷେତ୍ର ପୁରୀ ଅଭିମୁଖେ ବାହାରିଛି ପବିତ୍ର ‘ଅଣସର ଭାର’। ମହାପ୍ରଭୁଙ୍କ ମାମୁଁ ଘର ଭାବେ ପ୍ରସିଦ୍ଧ ନିଆଳିର ମାଧବାନନ୍ଦଜୀଉ ମନ୍ଦିରରୁ ପ୍ରତିବର୍ଷ ଭଳି ଚଳିତ ବର୍ଷ ମଧ୍ୟ ଏହି ପାରମ୍ପରିକ ବିଧି ଅତ୍ୟନ୍ତ ଭକ୍ତିପୂତ ପରିବେଶରେ ପାଳିତ ହୋଇଯାଇଛି।
ସୂଚନାଯୋଗ୍ୟ, ଦେବସ୍ନାନ ପୂର୍ଣ୍ଣିମାରେ ୧୦୮ ଗରା ସୁଗନ୍ଧିତ ଜଳରେ ସ୍ନାନ କରିବା ପରେ ମହାପ୍ରଭୁ ଜ୍ୱରରେ ପୀଡ଼ିତ ହୋଇ ବର୍ତ୍ତମାନ ଅଣସର ଘରେ ବିରାଜମାନ ଅଛନ୍ତି। ଏହି ଗୁପ୍ତ ନୀତି ସମୟରେ ଶ୍ରୀମନ୍ଦିରରେ ସାଧାରଣ ଦର୍ଶନ ସମ୍ପୂର୍ଣ୍ଣ ବନ୍ଦ ରହିଥାଏ ଏବଂ ଦଇତାପତି ସେବାୟତମାନେ ମହାପ୍ରଭୁଙ୍କ ଗୁପ୍ତ ସେବାଶୁଶ୍ରୂଷା କରିଥାନ୍ତି। ଲୋକବିଶ୍ୱାସ ଅନୁସାରେ, ମାଧବାନନ୍ଦଜୀଉ ହେଉଛନ୍ତି ଶ୍ରୀଜିଉଙ୍କ ମାମୁଁ। ତେଣୁ ଭଣଜା-ଭାଣିଜୀଙ୍କ ଆଶୁ ସୁସ୍ଥତା କାମନା କରି ମାମୁଁ ଘର ପକ୍ଷରୁ ଏହି ସ୍ୱତନ୍ତ୍ର ‘ଅଣସର ଭାର’ ପ୍ରସ୍ତୁତ କରାଯାଏ।
ଏହି ପବିତ୍ର ଭାରରେ ରାଜ୍ୟ ତଥା ରାଜ୍ୟ ବାହାରୁ ସଂଗୃହିତ ବିଭିନ୍ନ ପ୍ରକାରର ପଥ୍ୟ ସାମଗ୍ରୀ ସାମିଲ ରହିଥାଏ। ଏଥିରେ ସେଓ, କମଳା, ଡାଳିମ୍ବ, ଅଙ୍ଗୁର, ଆମ୍ବ, ପଣସ, ନଡ଼ିଆ, କଦଳୀ ଭଳି ପ୍ରଚୁର ଫଳମୂଳ ସହ ବିଭିନ୍ନ ଔଷଧୀୟ ଦ୍ରବ୍ୟ, ତୁଳସୀ, ଫୁଲ ଓ କର୍ପୁର ଆଦି ପଠାଯାଇଥାଏ।
ଆଜି ସକାଳୁ ମନ୍ଦିର ପରିସରରେ ବିଶେଷ ପୂଜାର୍ଚ୍ଚନା ଓ ବିଧିବିଧାନ ସମ୍ପନ୍ନ ହେବା ପରେ ଝାଞ୍ଜ, ଖୋଳ, ମୃଦଙ୍ଗ ଓ ହରିବୋଲ ଧ୍ୱନି ମଧ୍ୟରେ ଏହି ଭାର ପୁରୀ ଅଭିମୁଖେ ଯାତ୍ରା କରିଛି। ସ୍ଥାନୀୟ ଶ୍ରଦ୍ଧାଳୁ ଓ ସେବାୟତମାନେ ଏହି ଆଧ୍ୟାତ୍ମିକ ଶୋଭାଯାତ୍ରାରେ ସାମିଲ ହୋଇ ସମଗ୍ର ପରିବେଶକୁ ଭକ୍ତିମୟ କରିଦେଇଥିଲେ। ମାମୁଁ ଘରୁ ଆସିଥିବା ଏହି ପଥ୍ୟ ସେବନ କରି ଶ୍ରୀଜିଉ ଶୀଘ୍ର ସୁସ୍ଥ ହେବେ ବୋଲି ବିଶ୍ୱାସ ରହିଛି, ଯାହା ଶ୍ରୀଜଗନ୍ନାଥ ସଂସ୍କୃତିର ମହାନତାକୁ ଦର୍ଶାଏ।