ମୋଦୀଙ୍କ କ୍ଷମାପ୍ରାର୍ଥନା ଏବଂ ମନ୍ତ୍ରୀଙ୍କ ଇସ୍ତଫା ଦାବି କଲେ ରାହୁଲ ଗାନ୍ଧୀ
ନୂଆଦିଲ୍ଲୀ: କୋକ୍ରୋଚ୍ ଜନତା ପାର୍ଟି (CJP) ବ୍ୟାନରରେ ଆନ୍ଦୋଳନ କରୁଥିବା ଛାତ୍ରଛାତ୍ରୀଙ୍କ ଉପରେ ପୋଲିସର ଲାଠିଚାର୍ଜକୁ ନେଇ ମଙ୍ଗଳବାର ଦେଶ ସଂସଦରୁ ରାଜରାସ୍ତା ପର୍ଯ୍ୟନ୍ତ ସରଗରମ ହୋଇଉଠିଛି। ବିରୋଧୀ ଦଳ ନେତା ରାହୁଲ ଗାନ୍ଧୀ ଏହି ପୋଲିସ କାର୍ଯ୍ୟାନୁଷ୍ଠାନକୁ “ସମ୍ପୂର୍ଣ୍ଣ ଅଣ-ଭାରତୀୟ” ଆଖ୍ୟା ଦେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ କ୍ଷମାପ୍ରାର୍ଥନା ଦାବି କରିଛନ୍ତି।
ସଂସଦ ଭବନରେ ଲୋକସଭା ବାଚସ୍ପତି ଓମ୍ ବିର୍ଲାଙ୍କୁ ଭେଟିବା ପରେ ଖବରଦାତାଙ୍କୁ ସମ୍ବୋଧିତ କରି ରାହୁଲ ଗାନ୍ଧୀ ଅଭିଯୋଗ କରିଛନ୍ତି ଯେ, ସଂସଦରେ ଏହି ଗୁରୁତ୍ୱପୂର୍ଣ୍ଣ ପ୍ରସଙ୍ଗରେ ଆଲୋଚନା ପାଇଁ ବାଚସ୍ପତି ସରକାରଙ୍କ ଅନୁମତି ଅପେକ୍ଷା କରିଛନ୍ତି। ସେ କହିଛନ୍ତି, “ଦେଶର ପରୀକ୍ଷା ବ୍ୟବସ୍ଥାକୁ ଝିଣ୍ଟିକା/ଉଇପୋକ ଖାଇ ଗ୍ରାସ କରିସାରିଲେଣି।”
ସରକାର ଛାତ୍ରମାନଙ୍କର ସମସ୍ୟାର ସଂସ୍କାର ଆଣିବା ପରିବର୍ତ୍ତେ ବଳପ୍ରଯୋଗ କରୁଥିବା ଅଭିଯୋଗ କରି ରାହୁଲ ଗାନ୍ଧୀ କେନ୍ଦ୍ର ସ୍ୱରାଷ୍ଟ୍ର ମନ୍ତ୍ରୀ ଅମିତ ଶାହ ଏବଂ ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ତୁରନ୍ତ ଇସ୍ତଫା ଦାବି କରିଛନ୍ତି।
ଏହି କାର୍ଯ୍ୟାନୁଷ୍ଠାନକୁ ବିରୋଧୀ ଦଳର ଅନ୍ୟ ପ୍ରମୁଖ ନେତାମାନେ ମଧ୍ୟ କଡ଼ା ନିନ୍ଦା କରିଛନ୍ତି । ସରକାର ଛାତ୍ରଙ୍କ ବିପକ୍ଷରେ “ପ୍ରାଇଭେଟ୍ ଆର୍ମୀ” ବ୍ୟବହାର କରୁଛନ୍ତି ବୋଲି ଅଭିଯୋଗ କରିଛନ୍ତି। ପ୍ରଶ୍ନପତ୍ର ଲିକ୍ ନିୟମିତ ଘଟଣା ପାଲଟିଛି ଏବଂ ସରକାରଙ୍କ କୌଣସି ଜବାବଦିହିତା ନାହିଁ। ପୋଲିସର ଏହି ବର୍ବର କାର୍ଯ୍ୟାନୁଷ୍ଠାନକୁ କଡ଼ା ଭାଷାରେ ନିନ୍ଦା କରିଛନ୍ତି।
ଘଟଣା ପରେ କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ଜେ.ପି. ନଡ୍ଡା, ଆହତ ଛାତ୍ରଛାତ୍ରୀଙ୍କୁ ଭେଟିବା ପାଇଁ ଆରଏମ୍ଏଲ୍ (RML) ଏବଂ ଲେଡି ହାର୍ଡିଞ୍ଜ ହସ୍ପିଟାଲ୍ ଗସ୍ତ କରିଛନ୍ତି। ଅନ୍ୟପକ୍ଷରେ, ରାହୁଲ ଗାନ୍ଧୀ ଏବଂ ଅରବିନ୍ଦ କେଜ୍ରିୱାଲ ମଧ୍ୟ ଆରଏମ୍ଏଲ୍ ହସ୍ପିଟାଲ୍ରେ ପହଞ୍ଚି ଚିକିତ୍ସାଧୀନ ଛାତ୍ରଛାତ୍ରୀଙ୍କ ସ୍ୱାସ୍ଥ୍ୟାବସ୍ଥା ପଚାରି ବୁଝିଛନ୍ତି।