ପୁରୀ: ପବିତ୍ର ବାହୁଡ଼ା ଯାତ୍ରା ପାଇଁ ଆନୁଷ୍ଠାନିକ ପ୍ରସ୍ତୁତି ସ୍ୱରୂପ ମହାପ୍ରଭୁ ଶ୍ରୀଜଗନ୍ନାଥ, ବଡ଼ଠାକୁର ଶ୍ରୀବଳଭଦ୍ର ଓ ଦେବୀ ସୁଭଦ୍ରାଙ୍କ ତିନି ମହାନ ରଥର ‘ଦକ୍ଷିଣ ମୋଡ଼’ କାର୍ଯ୍ୟସୂଚୀ ସଫଳତାର ସହ ସମ୍ପନ୍ନ ହୋଇଛି।
ମଙ୍ଗଳବାରଠାରୁ ଆରମ୍ଭ ହୋଇଥିବା ଏହି ପାରମ୍ପରିକ ନୀତି ପ୍ରବଳ ବର୍ଷା ଯୋଗୁଁ ବାଧାପ୍ରାପ୍ତ ହୋଇଥିଲା। ମଙ୍ଗଳବାର ପ୍ରଥମେ ଦେବୀ ସୁଭଦ୍ରାଙ୍କ ଦେବଦଳନ (ଦର୍ପଦଳନ) ରଥକୁ ମୋଡ଼ାଯାଇ ଶ୍ରୀଗୁଣ୍ଡିଚା ମନ୍ଦିରର ନାକଚଣା ଦ୍ୱାର ନିକଟରେ ରଖାଯାଇଥିଲା। ତେବେ ବର୍ଷାର କୋପ ଯୋଗୁଁ ପ୍ରଭୁ ବଳଭଦ୍ରଙ୍କ ତାଳଧ୍ୱଜ ଓ ମହାପ୍ରଭୁ ଜଗନ୍ନାଥଙ୍କ ନନ୍ଦିଘୋଷ ରଥ ମୋଡ଼ିବା କାର୍ଯ୍ୟକୁ ସ୍ଥଗିତ ରଖିବାକୁ ପଡ଼ିଥିଲା।
ବୁଧବାର ସକାଳେ ପୁନର୍ବାର ସେବାୟତମାନେ ରଥ ମୋଡ଼ିବା କାର୍ଯ୍ୟ ଆରମ୍ଭ କରିଥିଲେ। ପ୍ରଥମେ ପ୍ରଭୁ ବଳଭଦ୍ରଙ୍କ ତାଳଧ୍ୱଜ ରଥକୁ ଦକ୍ଷିଣମୁଖୀ କରାଯାଇଥିଲା ଏବଂ ପରବର୍ତ୍ତୀ ସମୟରେ ମହାପ୍ରଭୁ ଜଗନ୍ନାଥଙ୍କ ନନ୍ଦିଘୋଷ ରଥକୁ ନାକଚଣା ଦ୍ୱାର ଅଭିମୁଖେ ବୁଲାଯାଇଥିଲା।
ତିନି ରଥର ଦକ୍ଷିଣ ମୋଡ଼ ସମ୍ପୂର୍ଣ୍ଣ ହେବା ପରେ ଶ୍ରୀମନ୍ଦିର ପ୍ରଶାସନ ଓ ଚିତ୍ରକର, ମହାରଣା ସେବକଙ୍କ ପକ୍ଷରୁ ରଥଗୁଡ଼ିକର ଯାନ୍ତ୍ରିକ ଯାଞ୍ଚ କରାଯିବ।
ଲଗାଣ ବର୍ଷା ଯୋଗୁଁ ଶରଧାବାଲିରେ ଜଳବନ୍ଦୀ ପରିସ୍ଥିତି ସୃଷ୍ଟି ହୋଇଛି। ରଥଗୁଡ଼ିକ ବର୍ତ୍ତମାନ ପାଣି ଜମିଥିବା ଶରଧାବାଲିରେ ନାକଚଣା ଦ୍ୱାର ଆଗରେ ରହିଛି। ସୁରକ୍ଷା ଦୃଷ୍ଟିରୁ ତିନି ରଥ ଚାରିପାଖରେ କଡ଼ା ବାରିକେଡ୍ ଓ ପୋଲିସ ବଳ ମୋତୟନ କରାଯାଇ ସୁରକ୍ଷା ବଳୟ ଗଠନ କରାଯାଇଛି।
ଶ୍ରୀଗୁଣ୍ଡିଚା ମନ୍ଦିରରୁ ଶ୍ରୀମନ୍ଦିରକୁ ଶ୍ରୀଜୀଉମାନଙ୍କ ସ୍ୱଧାମ ବାହୁଡ଼ିବା ନିମନ୍ତେ ଏହି ଦକ୍ଷିଣ ମୋଡ଼ ନୀତି ହେଉଛି ସବୁଠାରୁ ଗୁରୁତ୍ୱପୂର୍ଣ୍ଣ ପାରମ୍ପରିକ ପ୍ରସ୍ତୁତି। ବର୍ଷା ଯୋଗୁଁ ଶ୍ରୀମନ୍ଦିର ପ୍ରଶାସନ (SJTA) କାର୍ଯ୍ୟସୂଚୀରେ ସାମାନ୍ୟ ପରିବର୍ତ୍ତନ କରିବାକୁ ବାଧ୍ୟ ହୋଇଥିଲେ ସୁଦ୍ଧା ସମସ୍ତ ନୀତିକାନ୍ତି ଶୃଙ୍ଖଳିତ ଭାବେ ଶେଷ ହୋଇଛି।