NEET Protest: ଆଲୋଚନା ପାଇଁ ଚାପ ବଢ଼ାଇଲା ଛାତ୍ର ଆନ୍ଦୋଳନ; ‘୨୪ ଘଣ୍ଟାରେ ୪ ଥର ପ୍ରସ୍ତାବ ଦେଇଛୁ’ ବୋଲି କହିଲେ ଜିତେନ୍ଦ୍ର ସିଂହ
ନୂଆଦିଲ୍ଲୀ: ନିଟ୍ ପ୍ରଶ୍ନପତ୍ର ଲିକ୍ ମାମଲାରେ କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଇସ୍ତଫା ଦାବିରେ କକ୍ରୋଚ୍ ଜନତା ପାର୍ଟି (CJP) ନେତୃତ୍ୱରେ ଚାଲିଥିବା ଛାତ୍ର ଆନ୍ଦୋଳନ ଆହୁରି ଜୋରଦାର ହୋଇଛି। ଦିଲ୍ଲୀର ଜନ୍ତର ମନ୍ତରରେ ଆରମ୍ଭ ହୋଇଥିବା ଏହି ପ୍ରତିବାଦ ଧୀରେ ଧୀରେ ଦେଶର ଅନ୍ୟାନ୍ୟ ସ୍ଥାନକୁ ବ୍ୟାପୁଥିବା ବେଳେ ଆନ୍ଦୋଳନକାରୀମାନେ ନ୍ୟାୟ, ଜବାବଦେହିତା ଏବଂ ଶିକ୍ଷା ବ୍ୟବସ୍ଥାରେ ସଂସ୍କାର ଦାବି କରୁଛନ୍ତି।
ଛାତ୍ରମାନଙ୍କ ସମର୍ଥନରେ ଜୁନ୍ ୨୮ରୁ ଆମରଣ ଅନଶନରେ ବସିଥିବା ଶିକ୍ଷାବିତ୍ ସୋନମ ୱାଙ୍ଗଚୁକଙ୍କୁ ସ୍ୱାସ୍ଥ୍ୟ ଅବସ୍ଥା ଅବନତି ପରେ ଗୁରୁଗ୍ରାମର ମେଦାନ୍ତ ହସ୍ପିଟାଲକୁ ସ୍ଥାନାନ୍ତର କରାଯାଇଛି। ତାଙ୍କ ଅନଶନ ଏହି ଆନ୍ଦୋଳନକୁ ଅଧିକ ଜାତୀୟ ଗୁରୁତ୍ୱ ଦେଇଥିବା ବୋଲି ଆନ୍ଦୋଳନକାରୀମାନଙ୍କ ମତ।
ଏହି ପରିସ୍ଥିତିରେ କେନ୍ଦ୍ରମନ୍ତ୍ରୀ ଜିତେନ୍ଦ୍ର ସିଂହ କହିଛନ୍ତି ଯେ ସରକାର ଆଲୋଚନା ପାଇଁ ସମ୍ପୂର୍ଣ୍ଣ ପ୍ରସ୍ତୁତ ଅଛନ୍ତି। ତାଙ୍କ ଦାବି ଅନୁସାରେ, ଗତ ୨୪ ଘଣ୍ଟା ମଧ୍ୟରେ ଚାରିଥର ଆନ୍ଦୋଳନକାରୀଙ୍କୁ ଆଲୋଚନା ପାଇଁ ଆମନ୍ତ୍ରଣ ଦିଆଯାଇଛି। କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ଜେ.ପି. ନଡ୍ଡାଙ୍କ ବାସଭବନ କିମ୍ବା କାର୍ଯ୍ୟାଳୟରେ ଯେକୌଣସି ସମୟରେ ବୈଠକ କରିବାକୁ ସରକାର ପ୍ରସ୍ତୁତ ବୋଲି ସେ କହିଛନ୍ତି।
ତେବେ ଆନ୍ଦୋଳନକାରୀମାନେ ସରକାରଙ୍କ ଏହି ପ୍ରସ୍ତାବକୁ ଗ୍ରହଣ କରିନାହାନ୍ତି। CJPର ମୁଖପାତ୍ର ସୌରଭ ଦାସ କହିଛନ୍ତି ଯେ, ଯଦି ସରକାର ପ୍ରକୃତରେ ସମାଧାନ ଚାହୁଁଛନ୍ତି, ତେବେ ଆଲୋଚନା ଜନ୍ତର ମନ୍ତର କିମ୍ବା ଉଭୟ ପକ୍ଷ ପାଇଁ ଗ୍ରହଣଯୋଗ୍ୟ କୌଣସି ନିରପେକ୍ଷ ସ୍ଥାନରେ ହେବା ଉଚିତ୍। ସରକାରୀ ବାସଭବନ କିମ୍ବା କାର୍ଯ୍ୟାଳୟକୁ ଯାଇ ଆଲୋଚନା କରିବାକୁ ସେମାନେ ରାଜି ନୁହନ୍ତି ବୋଲି ସେ ସ୍ପଷ୍ଟ କରିଛନ୍ତି।
ଉଲ୍ଲେଖଯୋଗ୍ୟ, ଜୁଲାଇ ୨୦ରୁ ‘ସଂସଦ ଚଲୋ’ ଅଭିଯାନ ତୀବ୍ର ହେବା ପରେ ଜନ୍ତର ମନ୍ତରରେ ଛାତ୍ର ଓ ପୁଲିସ ମଧ୍ୟରେ ସଂଘର୍ଷ ଘଟିଥିଲା। ଉଭୟ ପକ୍ଷର କେତେକ ଲୋକ ଆହତ ହୋଇଥିବା ସୂଚନା ମିଳିଥିଲା। ଏହି ଘଟଣା ପରେ ଆନ୍ଦୋଳନକୁ ନେଇ ଦେଶବ୍ୟାପୀ ଚର୍ଚ୍ଚା ଜୋର ଧରିଛି।
ଏପଟେ ନୂଆଦିଲ୍ଲୀ ବ୍ୟବସାୟୀ ସଂଘ (NDTA) କନଟ୍ ପ୍ଲେସ ଅଞ୍ଚଳର ବ୍ୟବସାୟୀମାନଙ୍କୁ ସନ୍ଧ୍ୟା ୬ଟା ୩୦ ସୁଦ୍ଧା ଦୋକାନ ଓ ପ୍ରତିଷ୍ଠାନ ବନ୍ଦ ରଖିବାକୁ ଅନୁରୋଧ କରିଛି। ଏହି ମଧ୍ୟରେ ଛାତ୍ର ସଂଗଠନମାନେ ନିଜ ଦାବି ପୂରଣ ନହେବା ପର୍ଯ୍ୟନ୍ତ ଆନ୍ଦୋଳନ ଜାରି ରଖିବେ ବୋଲି କହିଛନ୍ତି, ଯେଉଁବେଳେ ସରକାର ପକ୍ଷରୁ ଆଲୋଚନାର ଦ୍ୱାର ଖୋଲା ଥିବା କଥା ପୁନର୍ବାର କୁହାଯାଇଛି।