Parliament Row: ରାହୁଲ ଗାନ୍ଧୀଙ୍କ ବିରୋଧରେ ସ୍ୱାଧିକାର ଭଙ୍ଗ ନୋଟିସ ଦାଖଲ କଲେ ବିଜେପି ସାଂସଦ ଅନୁରାଗ ଠାକୁର

ନୂଆଦିଲ୍ଲୀ: ଲୋକସଭାରେ ବିରୋଧୀ ଦଳର ନେତା ରାହୁଲ ଗାନ୍ଧୀଙ୍କ ବିରୋଧରେ ବିଜେପି ସାଂସଦ ଅନୁରାଗ ଠାକୁର ସ୍ୱାଧିକାର ଭଙ୍ଗ (Privilege Motion) ନୋଟିସ ଦାଖଲ କରିଛନ୍ତି। ଲୋକସଭା ବାଚସ୍ପତି ଓମ୍ ବିର୍ଲାଙ୍କ ନିକଟରେ ଦାଖଲ ହୋଇଥିବା ଏହି ନୋଟିସରେ ରାହୁଲ ଗାନ୍ଧୀ ସଦନରେ ଅସଂସଦୀୟ ଭାଷା ବ୍ୟବହାର କରିବା ସହ ଗୃହମନ୍ତ୍ରୀ ଅମିତ ଶାହଙ୍କ ବିରୋଧରେ ପ୍ରମାଣବିହୀନ ଅଭିଯୋଗ କରିଥିବା ଦାବି କରାଯାଇଛି।

ବୁଧବାର ଲୋକସଭାରେ ଛାତ୍ର ଆନ୍ଦୋଳନ ପ୍ରସଙ୍ଗ ଉଠାଇ ରାହୁଲ ଗାନ୍ଧୀ କେନ୍ଦ୍ର ସରକାର ଓ ଗୃହମନ୍ତ୍ରୀ ଅମିତ ଶାହଙ୍କୁ କଡ଼ା ସମାଲୋଚନା କରିଥିଲେ। ସେ ଅମିତ ଶାହଙ୍କୁ ପଦରୁ ହଟାଇବାକୁ ଦାବି କରିବା ସହ ଶାସକ ଦଳର କିଛି ସାଂସଦଙ୍କୁ ‘ଅନ୍ଧଭକ୍ତ’ ବୋଲି ସମ୍ବୋଧନ କରିଥିଲେ। ଏହାକୁ କେନ୍ଦ୍ର କରି ସଦନରେ ଶାସକ ଓ ବିରୋଧୀ ଦଳ ମଧ୍ୟରେ ତୀବ୍ର ବାକ୍‌ବିତଣ୍ଡା ଦେଖାଦେଇଥିଲା।

ବିଜେପିର ଅଭିଯୋଗ

ନୋଟିସରେ ଅନୁରାଗ ଠାକୁର କହିଛନ୍ତି ଯେ, ରାହୁଲ ଗାନ୍ଧୀଙ୍କ ବକ୍ତବ୍ୟ ଲୋକସଭାର ନିୟମ, ସଂସଦୀୟ ପରମ୍ପରା ଓ ସଦସ୍ୟମାନଙ୍କ ବିଶେଷାଧିକାରର ଉଲ୍ଲଂଘନ କରୁଛି। ତାଙ୍କ ଦାବି ଅନୁଯାୟୀ, କୌଣସି ପ୍ରମାଣ ଉପସ୍ଥାପନ ନକରି ଗୁରୁତର ଅଭିଯୋଗ କରି ସଦନକୁ ବିଭ୍ରାନ୍ତ କରିବାର ଚେଷ୍ଟା କରାଯାଇଛି। ଏହି କାରଣରୁ ରାହୁଲ ଗାନ୍ଧୀଙ୍କ ବିରୋଧରେ ସ୍ୱାଧିକାର ଭଙ୍ଗ ଓ ସଦନ ଅବମାନନା ପ୍ରସଙ୍ଗରେ ଆବଶ୍ୟକ ପଦକ୍ଷେପ ନେବାକୁ ସେ ବାଚସ୍ପତିଙ୍କୁ ଅନୁରୋଧ କରିଛନ୍ତି।

ରାହୁଲ ଗାନ୍ଧୀଙ୍କ ପକ୍ଷ

ଅନ୍ୟପଟେ ରାହୁଲ ଗାନ୍ଧୀ ନିଜ ବକ୍ତବ୍ୟରେ ଅଟଳ ରହିଛନ୍ତି। ସେ କହିଛନ୍ତି ଯେ, ଛାତ୍ରଙ୍କ ଉପରେ ପୁଲିସ କାର୍ଯ୍ୟାନୁଷ୍ଠାନକୁ ନେଇ ସରକାର ସ୍ପଷ୍ଟୀକରଣ ଦେବା ଉଚିତ ଏବଂ ସମଗ୍ର ଘଟଣାର ନିରପେକ୍ଷ ତଦନ୍ତ କରାଯିବା ଆବଶ୍ୟକ। ତାଙ୍କ ମତରେ, ବିରୋଧୀଙ୍କ ପ୍ରଶ୍ନର ଉତ୍ତର ଦେବା ପରିବର୍ତ୍ତେ ସରକାର ମୂଳ ପ୍ରସଙ୍ଗରୁ ଦୃଷ୍ଟି ହଟାଇବାକୁ ଚେଷ୍ଟା କରୁଛି।

ରାଜନୈତିକ ତାତି ବଢ଼ିଲା

ଏହି ଘଟଣାକୁ କେନ୍ଦ୍ର କରି ସଂସଦରେ ଶାସକ ଓ ବିରୋଧୀ ଦଳ ମଧ୍ୟରେ ରାଜନୈତିକ ମୁକାବିଲା ଆହୁରି ତୀବ୍ର ହୋଇଛି। ବର୍ତ୍ତମାନ ବାଚସ୍ପତି ଓମ୍ ବିର୍ଲା ସ୍ୱାଧିକାର ଭଙ୍ଗ ନୋଟିସ ଉପରେ କ’ଣ ନିଷ୍ପତ୍ତି ନେଉଛନ୍ତି, ତାହା ଉପରେ ସମସ୍ତଙ୍କ ନଜର ରହିଛି।