ୱାଶିଂଟନ: ଆମେରିକା ନିର୍ବାଚନରେ ଚୀନ୍ର ଗୁପ୍ତ ହସ୍ତକ୍ଷେପକୁ ନେଇ ଏକ ଚାଞ୍ଚଲ୍ୟକର ତଥ୍ୟ ସାମ୍ନାକୁ ଆଣିଛି ହ୍ୱାଇଟ୍ ହାଉସ୍। ଆମେରିକା ଗୁପ୍ତଚର ବିଭାଗର ଆପ୍ରକାଶିତ ଦଲିଲ ଆଧାରରେ ପ୍ରକାଶିତ ଏକ ଫ୍ୟାକ୍ଟ ସିଟ୍ ଅନୁଯାୟୀ, ଚୀନ୍ ଏବଂ ଏହାର ସାଇବର ହ୍ୟାକରମାନେ ପ୍ରାୟ ୨୨ କୋଟି (୨୨୦ ମିଲିୟନ) ଆମେରିକୀୟଙ୍କ ଭୋଟର ପଞ୍ଜୀକରଣ ତଥ୍ୟ ହାସଲ କରିଛନ୍ତି। ଏହି ତଥ୍ୟ ମଧ୍ୟରେ ଅନେକ ସମ୍ବେଦନଶୀଳ ଓ ଅପ୍ରକାଶିତ ସୂଚନା ସାମିଲ ରହିଛି।
ଗୁପ୍ତଚର ସଂସ୍ଥାଗୁଡ଼ିକର ଅନୁମୋଦନ
ହ୍ୱାଇଟ୍ ହାଉସ୍ ଗଭର୍ଣ୍ଣମେଣ୍ଟ ଟ୍ରାନ୍ସପାରେନ୍ସି ଟାସ୍କଫୋର୍ସ ଦ୍ୱାରା ଜାରି ଏହି ସୂଚନାକୁ ନ୍ୟାସନାଲ ଇଣ୍ଟେଲିଜେନ୍ସ, ଏନ୍ଏସ୍ଏ (NSA), ସିଆଇଏ (CIA) ଏବଂ ଗୃହ ସୁରକ୍ଷା ବିଭାଗ (DHS) ର ନିର୍ଦ୍ଦେଶକମାନେ ଅନୁମୋଦନ କରିଛନ୍ତି। ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ନିର୍ଦ୍ଦେଶକ୍ରମେ ବିଦେଶୀ ନିର୍ବାଚନୀ ଗତିବିଧି ସମ୍ପର୍କିତ ଗୁପ୍ତ ଦଲିଲକୁ ସାର୍ବଜନୀନ କରାଯିବା ପରେ ଏହି ସୂଚନା ଜଣାପଡ଼ିଛି।
ସାଇବର ଆକ୍ରମଣ ଓ ସମ୍ଭାବ୍ୟ ବିପଦ
ଜାରି ହୋଇଥିବା ରିପୋର୍ଟ ଅନୁଯାୟୀ, ଚାଇନିଜ୍ କମ୍ପ୍ୟୁଟର ନେଟୱାର୍କ ଏକ୍ସପ୍ଲୋଇଟେସନ୍ (CNE) ର ଆକ୍ରମଣକାରୀମାନେ ବ୍ୟବସାୟିକ ୱେବସାଇଟରେ ସଂରକ୍ଷିତ ଭୋଟର ତଥ୍ୟକୁ ଚୋରି, କ୍ରୟ କିମ୍ବା ହ୍ୟାକ୍ କରିଛନ୍ତି। ଗୁପ୍ତଚର ବିଭାଗ ଚେତାବନୀ ଦେଇଛି ଯେ, ଏହି ତଥ୍ୟ ବ୍ୟବହାର କରି ବିଦେଶୀ ଶତ୍ରୁମାନେ ନିର୍ବାଚନ ଦିନ ଭୋଟରଙ୍କ ସୂଚନା ପରିବର୍ତ୍ତନ କରିପାରନ୍ତି, ଯାହା ଦ୍ୱାରା ନାଗରିକମାନେ ଭୋଟ ଦେବାରୁ ବଞ୍ଚିତ ହେବେ କିମ୍ବା ବିଳମ୍ବ ସୃଷ୍ଟି ହେବ। ଭୋଟରଙ୍କ ପସନ୍ଦ ଓ ବ୍ୟକ୍ତିଗତ ତଥ୍ୟକୁ ନେଇ ସେମାନଙ୍କ ମତାମତକୁ ପ୍ରଭାବିତ କରିବା ପାଇଁ ଭ୍ରାନ୍ତ ପ୍ରଚାର କରାଯାଇପାରେ।
ନିର୍ବାଚନ ହସ୍ତକ୍ଷେପର ନୂତନ ସଂଜ୍ଞା
ଏହି ଅବସରରେ ହ୍ୱାଇଟ୍ ହାଉସ୍ ଗୁପ୍ତଚର ବିଭାଗର ‘ନିର୍ବାଚନ ହସ୍ତକ୍ଷେପ’ ଏବଂ ‘ନିର୍ବାଚନ ପ୍ରଭାବ’ ର ସଂଜ୍ଞା ସ୍ପଷ୍ଟ କରିଛି। ସାଇବର ଆକ୍ରମଣ ଜରିଆରେ ଭୋଟର ପଞ୍ଜୀକରଣ ବ୍ୟବସ୍ଥା, ବାଲାଟ୍ ଗଣତି କିମ୍ବା ନିର୍ବାଚନୀ ପ୍ରକ୍ରିୟାର ବୈଷୟିକ ଦିଗକୁ ଟାର୍ଗେଟ କରିବାକୁ ‘ନିର୍ବାଚନ ହସ୍ତକ୍ଷେପ’ ଭାବେ ଅନ୍ତର୍ଭୁକ୍ତ କରାଯାଇଛି।
ନିର୍ବାଚନ ସୁରକ୍ଷା ଓ ସାଇବର ପ୍ରତିରୋଧ କ୍ଷେତ୍ରରେ ସାଧାରଣ ନାଗରିକଙ୍କୁ ସଚେତନ କରିବା ଏବଂ ସ୍ୱଚ୍ଛତା ଆଣିବା ପାଇଁ ଟ୍ରମ୍ପ ପ୍ରଶାସନ ପକ୍ଷରୁ ଏହି ଗୁପ୍ତ ତଥ୍ୟ ସାର୍ବଜନୀନ କରାଯାଇଛି।