ମହୀଶୁର: କର୍ଣ୍ଣାଟକର ସାମଗ୍ରିକ ବିକାଶ ପାଇଁ କେନ୍ଦ୍ର ସରକାରଙ୍କ ଅଧିକ ସହଯୋଗ ଆବଶ୍ୟକ ବୋଲି କହି ରାଜ୍ୟର ମୁଖ୍ୟମନ୍ତ୍ରୀ ଡି.କେ. ଶିବକୁମାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଅନୁରୋଧ କରିଛନ୍ତି। ସେ କହିଛନ୍ତି, କର୍ଣ୍ଣାଟକର ପ୍ରଗତି ସହ ଦେଶର ଅର୍ଥନୈତିକ ଓ ବିକାଶମୂଳକ ଅଗ୍ରଗତି ନିବିଡ଼ ଭାବେ ଜଡ଼ିତ ରହିଛି।
ମହୀଶୁରରେ ସ୍ୱାମୀ ବିବେକାନନ୍ଦ ସାଂସ୍କୃତିକ ଯୁବ କେନ୍ଦ୍ର ‘ବିବେକ ସ୍ମାରକ’ର ଉଦ୍ଘାଟନ ଅବସରରେ ଆୟୋଜିତ ସଭାକୁ ସମ୍ବୋଧିତ କରି ଶିବକୁମାର ଏହି ମତ ପ୍ରକାଶ କରିଥିଲେ। ପ୍ରଧାନମନ୍ତ୍ରୀଙ୍କ ଉପସ୍ଥିତିରେ ସେ କହିଥିଲେ ଯେ, ସଂଘୀୟ ସମବାୟ ବ୍ୟବସ୍ଥାର ମୂଳ ଆଦର୍ଶକୁ ଆଧାର କରି କର୍ଣ୍ଣାଟକକୁ ଅଧିକ ସହଯୋଗ କରିବା ପାଇଁ କେନ୍ଦ୍ର ସରକାର ଆଗେଇ ଆସିବା ଉଚିତ।
ମୁଖ୍ୟମନ୍ତ୍ରୀ କହିଥିଲେ, ବେଙ୍ଗାଲୁରୁ ଆଜି ବିଶ୍ୱସ୍ତରରେ ଭାରତର ପରିଚୟକୁ ଆହୁରି ସୁଦୃଢ଼ କରିଛି। ସୂଚନା ପ୍ରଯୁକ୍ତି, ନବସୃଜନ, ଶିଳ୍ପ ଓ ବିନିଯୋଗ କ୍ଷେତ୍ରରେ କର୍ଣ୍ଣାଟକ ଦେଶର ଅଗ୍ରଣୀ ରାଜ୍ୟ ଭାବେ ପରିଚିତ। ତେଣୁ ରାଜ୍ୟର ବିକାଶକୁ ଗତିଶୀଳ କରିବା ପାଇଁ କେନ୍ଦ୍ରର ସକ୍ରିୟ ସହଯୋଗ ଅତ୍ୟନ୍ତ ଆବଶ୍ୟକ।
ସେ ଆହୁରି କହିଥିଲେ, କର୍ଣ୍ଣାଟକ ସରକାର ଓ ରାଜ୍ୟବାସୀଙ୍କ ପକ୍ଷରୁ ପ୍ରଧାନମନ୍ତ୍ରୀଙ୍କୁ ରାଜ୍ୟ ପ୍ରତି ଉଦାର ମନୋଭାବ ପ୍ରଦର୍ଶନ କରିବା ସହ ବିକାଶମୂଳକ ପ୍ରକଳ୍ପଗୁଡ଼ିକରେ ସହଯୋଗ ବଢ଼ାଇବାକୁ ଅନୁରୋଧ କରାଯାଇଛି। କର୍ଣ୍ଣାଟକର ଉନ୍ନତି ଭାରତର ଆନ୍ତର୍ଜାତିକ ଛବିକୁ ଆହୁରି ସୁଦୃଢ଼ କରିବ ବୋଲି ସେ ମତ ପ୍ରକାଶ କରିଛନ୍ତି।