ନୂଆଦିଲ୍ଲୀ: ଭାରତ ଓ ମ୍ୟାମାର ମଧ୍ୟରେ ସୀମାବର୍ତ୍ତୀ କିଛି ଅଞ୍ଚଳକୁ ନେଇ ସୀମିତ ପରିସରରେ ଭୂଖଣ୍ଡ ଅଦଳବଦଳ ସମ୍ଭାବନା ଉପରେ ଆଲୋଚନା ଚାଲିଥିବା ସ୍ପଷ୍ଟ କରିଛି ବୈଦେଶିକ ବ୍ୟାପାର ମନ୍ତ୍ରାଳୟ (MEA)। ତେବେ ଏହି ପ୍ରସ୍ତାବ ଏବେ ବି ପ୍ରାରମ୍ଭିକ ପର୍ଯ୍ୟାୟରେ ଥିବା ବେଳେ ଏନେଇ କୌଣସି ଚୂଡ଼ାନ୍ତ ନିଷ୍ପତ୍ତି କିମ୍ବା ସମଝୌତା ହୋଇନଥିବା ମନ୍ତ୍ରାଳୟ ସ୍ପଷ୍ଟ କରିଛି।
ସାପ୍ତାହିକ ସାମ୍ବାଦିକ ସମ୍ମିଳନୀରେ ବୈଦେଶିକ ମନ୍ତ୍ରାଳୟର ମୁଖପାତ୍ର ରଣଧୀର ଜୟସ୍ୱାଲ କହିଛନ୍ତି ଯେ, ଭାରତ-ମ୍ୟାମାର ସୀମାର କେତେକ ଅଞ୍ଚଳରେ ଦୀର୍ଘଦିନ ଧରି ରହିଆସୁଥିବା ଭୌଗୋଳିକ ଓ ପ୍ରଶାସନିକ ସମସ୍ୟାର ସମାଧାନ ପାଇଁ ଉଭୟ ଦେଶ ବିଭିନ୍ନ ବିକଳ୍ପ ଉପରେ ବିଚାରବିମର୍ଶ କରୁଛନ୍ତି। ସେହି ବିକଳ୍ପମାନଙ୍କ ମଧ୍ୟରେ ସୀମିତ ଭୂଖଣ୍ଡ ଅଦଳବଦଳ ପ୍ରସ୍ତାବ ମଧ୍ୟ ସାମିଲ ରହିଛି।
ମନ୍ତ୍ରାଳୟ କହିଛି, ସୀମାବର୍ତ୍ତୀ କିଛି ଅଞ୍ଚଳର ଜଟିଳ ଭୌଗୋଳିକ ସ୍ଥିତି ଏବଂ ସ୍ଥାନୀୟ ଲୋକଙ୍କ ଦୈନନ୍ଦିନ ଯାତାୟାତ ଓ ଜୀବନଯାପନକୁ ସହଜ କରିବା ଉଦ୍ଦେଶ୍ୟରେ ଏହି ପ୍ରସ୍ତାବ ଉପରେ ଆଲୋଚନା ହେଉଛି। ସୀମା ପରିଚାଳନାକୁ ଅଧିକ ସୁବ୍ୟବସ୍ଥିତ କରିବା ସହ ପ୍ରଶାସନିକ ସମସ୍ୟାର ସମାଧାନ କରିବା ଏହି ଆଲୋଚନାର ପ୍ରମୁଖ ଲକ୍ଷ୍ୟ ବୋଲି ଏମ୍ଇଏ ପକ୍ଷରୁ କୁହାଯାଇଛି।
ସମ୍ପ୍ରତି ସାମାଜିକ ଗଣମାଧ୍ୟମରେ ଭାରତ ନିଜ ଭୂଖଣ୍ଡ ମ୍ୟାମାରକୁ ହସ୍ତାନ୍ତର କରିବାକୁ ଯାଉଛି ବୋଲି ବିଭିନ୍ନ ଦାବି ପ୍ରଚାର ପାଇବା ପରେ ବୈଦେଶିକ ମନ୍ତ୍ରାଳୟ ଏହାର ସ୍ପଷ୍ଟୀକରଣ ଦେଇଛି। ମନ୍ତ୍ରାଳୟ କହିଛି, ଏଭଳି ଦାବି ଭ୍ରମ ସୃଷ୍ଟିକାରୀ ଏବଂ ଏପର୍ଯ୍ୟନ୍ତ କୌଣସି ପ୍ରକାର ଭୂଖଣ୍ଡ ହସ୍ତାନ୍ତର ସମ୍ପର୍କିତ ଚୂଡ଼ାନ୍ତ ନିଷ୍ପତ୍ତି ନିଆଯାଇନାହିଁ।
ଉଲ୍ଲେଖଯୋଗ୍ୟ ଯେ, ଭାରତ ଓ ମ୍ୟାମାର ମଧ୍ୟରେ ପ୍ରାୟ ୧,୬୪୩ କିଲୋମିଟର ଲମ୍ବା ଆନ୍ତର୍ଜାତିକ ସୀମା ରହିଛି। ଏହା ଅରୁଣାଚଳ ପ୍ରଦେଶ, ନାଗାଲାଣ୍ଡ, ମଣିପୁର ଓ ମିଜୋରାମ ଦେଇ ଯାଇଛି। ଏହି ସୀମାର କିଛି ଅଞ୍ଚଳରେ ଦୀର୍ଘଦିନ ଧରି ପ୍ରଶାସନିକ ଓ ଭୌଗୋଳିକ ଜଟିଳତା ରହିଥିବାରୁ ଉଭୟ ଦେଶ ନିୟମିତ ଭାବେ ଆଲୋଚନା କରିଆସୁଛନ୍ତି। ବୈଦେଶିକ ମନ୍ତ୍ରାଳୟ ସ୍ପଷ୍ଟ କରିଛି ଯେ, ଭାରତର ସାର୍ବଭୌମତ୍ୱ ଓ ଜାତୀୟ ସ୍ୱାର୍ଥକୁ ସମ୍ପୂର୍ଣ୍ଣ ସୁରକ୍ଷିତ ରଖି ହିଁ ଏହି ପ୍ରସଙ୍ଗରେ ଆଗାମୀ ପଦକ୍ଷେପ ଗ୍ରହଣ କରାଯିବ।