ଭୁବନେଶ୍ୱର, ୬ ଅଗଷ୍ଟ: ଓଡ଼ିଶାର ପୋଲିସ ବ୍ୟବସ୍ଥା ପୁଣିଥରେ ଆଲୋଚନାର କେନ୍ଦ୍ରବିନ୍ଦୁରେ। ମୁଖ୍ୟମନ୍ତ୍ରୀଙ୍କ କଡ଼ା ନିର୍ଦ୍ଦେଶକୁ ଅନଦେଖା କରି ପୋଲିସ ଅଧିକାରୀମାନେ ତାହାକୁ ଅବମାନିତ କରୁଛନ୍ତି। ୫ ମାସ ପୂର୍ବରୁ ମୁଖ୍ୟମନ୍ତ୍ରୀ ନୂଆପଲ୍ଲୀ ଥାନା ଉଦଘାଟନ ସମୟରେ ସର୍ବସାଧାରଣଙ୍କ ଅଭିଯୋଗ ନେଇ ତୁରନ୍ତ ଏଫଆଇଆର ଗ୍ରହଣ କରିବା ନିର୍ଦ୍ଦେଶ ଦେଇଥିଲେ। ତଥାପି, କେନ୍ଦ୍ରାପଡ଼ା ପଟ୍ଟାମୁଣ୍ଡାଇରେ ଏହି ନିର୍ଦ୍ଦେଶକୁ ଅନୁସରଣ କରାଯାଇନଥିବା ଫଳରେ ଏକ ଛାତ୍ରୀ ଆତ୍ମଦାହ କରି ଜୀବନ ହାରାଇଛନ୍ତି।
ମୃତ ଛାତ୍ରୀଙ୍କ ବାପା ଅଭିଯୋଗ କରିଛନ୍ତି ଯେ, ଛାତ୍ରୀଙ୍କ ପୁରୁଷ ବନ୍ଧୁଙ୍କ ଧମକ ଓ ଚମକ ବାବଦରେ ଗତ ୬-୮ ମାସ ତଳେ ଥାନାରେ ଅଭିଯୋଗ ଦେଇଥିଲେ, କିନ୍ତୁ ପୋଲିସ ଲେଖିତ ଅଭିଯୋଗ ନେବା ଚାଲା ନଥିଲେ। ଏହି ଅସନ୍ତୋଷ ଓ ନ୍ୟାୟ ମିଳିନଥିବା ପରିଣାମରେ ଛାତ୍ରୀ ନିଜକୁ ଜାଳି ଦେଇଥିବା କୁହାଯାଉଛି।
ଏହି ଘଟଣାକୁ ନେଇ ପୋଲିସର ଉଦାସୀନ ବ୍ୟବହାର ଦେଖିବାକୁ ମିଳିଛି। ଥାନା ଆଇସି ସ୍ପଷ୍ଟ କରିଛନ୍ତି ଯେ ସେ ଅଭିଯୋଗ ବିଷୟରେ ଜାଣିନଥିଲେ ଏବଂ ମିଡିଆ ସମ୍ମୁଖିନ ହେବେନି। ଏହାରେ ପୋଲିସ ବ୍ୟବସ୍ଥା ପ୍ରତି ଗଭୀର ପ୍ରଶ୍ନ ଉଠିଛି।
ବିଜେଡି ମଧ୍ୟ ପୋଲିସ ଉପରେ ନିଶାନା ସାଧିଛି। ବିଜେଡି ପକ୍ଷରୁ କୁହାଯାଇଛି, ଗୃହ ବିଭାଗର ସ୍ୱାସ୍ଥ୍ୟ ଭଲ ନଥିବା ଫଳରେ ଓଡ଼ିଶାରେ ଦୁର୍ଯ୍ଯୋଧନ ଓ ଦୁଃଶାସନ ଶାସନ ଚାଲିଛି। ସେମାନେ ଅଭିଯୋଗ କରିଛନ୍ତି ଯେ ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶ ଡିଜିପି ଶୁଣୁନାହାନ୍ତି ଏବଂ ପୋଲିସ ଅଧିକାରୀମାନେ ଦାୟିତ୍ୱ ଅନୁସାରେ କାର୍ଯ୍ୟ କରୁନାହାନ୍ତି।
ଏହା ଅତ୍ୟନ୍ତ ଦୁଃଖଦ ଯେ ଏଫଆଇଆର ଗ୍ରହଣ ନ କରିବାରୁ ଛାତ୍ରୀମାନେ ନିରାଶ ହୋଇ ଜୀବନ ହାରୁଛନ୍ତି। ବିଜେଡି ମୁଖ୍ୟମନ୍ତ୍ରୀଙ୍କୁ ଗୃହ ବିଭାଗ ଛାଡ଼ିବା ଆହ୍ୱାନ ଦେଇଛି।