ରାୟଗଡା: ଚଳନ୍ତା ଟ୍ରେନରୁ ସୁନା ବ୍ୟାଗ ଲୁଟ ଘଟଣାର ପର୍ଦାଫାସ୍ କରି ୬ ଜଣ ଅଭିଯୁକ୍ତଙ୍କୁ ଗିରଫ କରିଛି ରାୟଗଡା ସରକାରୀ ରେଳବାଇ ପୁଲିସ (ଜିଆରପି)। ଗିରଫ ହୋଇଥିବାମାନେ ହେଲେ ଉଲାକା ଶ୍ରୀନୁ, ମୁରଲୀ ପାଲେକ, ଏ. ବେଣୁ ଗୋପାଳ ସ୍ବାମୀ, ଏ. ଇଶ୍ୱର, ଗୋବିନ୍ଦ ବାଗ ଓ ବିଧାର ବାଗ୍, ସମସ୍ତେ ରାୟଗଡା ସହର ଅଞ୍ଚଳରୁ।
ଜିଆରପି ସୂତ୍ର ଅନୁସାରେ, ଅଭିଯୁକ୍ତମାନଙ୍କୁ ଧରିବା ସମୟରେ ପୁଲିସ ୨ ଲକ୍ଷ ୨୫ ହଜାର ଟଙ୍କା ନଗଦ, ୫୮ ଗ୍ରାମ ସୁନା, ୨ଟି କାର ଓ ୬ଟି ମୋବାଇଲ ଜବତ କରିଛି।
ଘଟଣା ୩ ଅଗଷ୍ଟର। ଆନ୍ଧ୍ରପ୍ରଦେଶର ଗାଜୁୱାକା ଅଞ୍ଚଳର ସୁନା କାରିଗର ରୁପଦିନ୍ ମୁଲ୍ଲା ରାୟଗଡାରେ କାମ ସରି ଗୁଣ୍ଟୁରକୁ ଟ୍ରେନରେ ଯାଉଥିବା ବେଳେ, ଜେମାଦେଇପେଣ୍ଠ ଷ୍ଟେସନ୍ ନିକଟରେ ଅଭିଯୁକ୍ତମାନେ ଏସି ବଗିରେ ପସି ପ୍ରାୟ ୧୫୦ ଗ୍ରାମ ସୁନା ଥିବା ବ୍ୟାଗ ଲୁଟିନେଇଥିଲେ।
ପୀଡିତ ବ୍ୟବସାୟୀ ରାୟଗଡା ଜିଆରପି ପାଖରେ ଅଭିଯୋଗ କଲାପରେ, ଜିଆରପି ଓ ଆରପିଏଫ୍ର ଗୁଇନ୍ଦା ବିଭାଗ ମିଳିତ ତଦନ୍ତ ଆରମ୍ଭ କଲା। ୧୦ ଦିନରେ, ପୁଲିସ ସହରର ବିଭିନ୍ନ ସ୍ଥାନରୁ ୬ ଅଭିଯୁକ୍ତଙ୍କୁ ଧରିବାରେ ସଫଳ ହେଲା।
ରାୟଗଡା ଜିଆରପି ଡିଏସପି ପ୍ରଭାତ କୁମାର ଶତପଥୀ କହିଛନ୍ତି, ଅଭିଯୁକ୍ତମାନଙ୍କୁ ଆଜି କୋର୍ଟକୁ ପ୍ରେରଣ କରାଯାଇଛି ଓ ଘଟଣାରେ ଜଡିତ ଅନ୍ୟମାନଙ୍କୁ ଶୀଘ୍ର ଗିରଫ କରାଯିବ।