ଏଲ୍ପିଜି ସଙ୍କଟକୁ ନେଇ କେନ୍ଦ୍ର ସରକାରଙ୍କ ଜରୁରୀ ପଦକ୍ଷେପ, ଲାଗୁ ହେଲା ଏସମା; ହୋଟେଲ-ରେଷ୍ଟୁରାଣ୍ଟ ବନ୍ଦ ହେବା ଆଶଙ୍କା
ନୂଆଦିଲ୍ଲୀ: ମଧ୍ୟପ୍ରାଚ୍ୟରେ ବୃଦ୍ଧି ପାଉଥିବା ଉତ୍ତେଜନାର ପ୍ରଭାବ ବିଶ୍ୱ ଉର୍ଜା ବଜାରରେ ପଡ଼ିବା ସହ ଭାରତରେ ମଧ୍ୟ ଏଲ୍ପିଜି ସିଲିଣ୍ଡର ଯୋଗାଣ ନେଇ ଅସୁବିଧା ଦେଖାଦେଇଛି। ଏହି ପରିସ୍ଥିତିକୁ ଦେଖି କେନ୍ଦ୍ର ସରକାର ଅତ୍ୟାବଶ୍ୟକ ପଦକ୍ଷେପ ନେଇ ସାରା ଦେଶରେ ଏସମା (Essential Services Maintenance Act) ଲାଗୁ କରିଛନ୍ତି।
ଘରୋଇ ରନ୍ଧନ ଗ୍ୟାସର ନିରବଚ୍ଛିନ୍ନ ଯୋଗାଣ ସୁନିଶ୍ଚିତ କରିବା ପାଇଁ ସରକାର ରିଫାଇନେରୀ ଓ ପେଟ୍ରୋକେମିକାଲ୍ ୟୁନିଟ୍ଗୁଡ଼ିକୁ ଏଲ୍ପିଜି ଉତ୍ପାଦନ ସର୍ବାଧିକ କରିବାକୁ ନିର୍ଦ୍ଦେଶ ଦେଇଛନ୍ତି। ସେଥିସହ ମୁଖ୍ୟ ହାଇଡ୍ରୋକାର୍ବନ୍ ଉତ୍ସଗୁଡ଼ିକୁ ଏଲ୍ପିଜି ପୁଲ୍କୁ ପଠାଇବାକୁ ମଧ୍ୟ ନିର୍ଦ୍ଦେଶ ଜାରି ହୋଇଛି।
ତୈଳ ମନ୍ତ୍ରଣାଳୟ ରିଫାଇନେରୀଗୁଡ଼ିକୁ ପେଟ୍ରୋକେମିକାଲ୍ ଉତ୍ପାଦନ କମାଇ ଏଲ୍ପିଜି ଉତ୍ପାଦନ ବଢ଼ାଇବାକୁ କହିଛି। ଏହା ସହ କଳାବଜାରି ଓ ମଜୁତକରଣକୁ ରୋକିବା ପାଇଁ ଘରୋଇ ଗ୍ୟାସ ସିଲିଣ୍ଡର ବୁକିଂ ମଧ୍ୟବର୍ତ୍ତୀ ସମୟକୁ ୨୧ ଦିନରୁ ବଢ଼ାଇ ୨୫ ଦିନ କରାଯାଇଛି।
ସରକାର କହିଛନ୍ତି ଯେ ଆମଦାନୀ କରାଯାଇଥିବା ଏଲ୍ପିଜିକୁ ହସ୍ପିଟାଲ୍, ଶିକ୍ଷାନୁଷ୍ଠାନ ଭଳି ଅତ୍ୟାବଶ୍ୟକ ଅଣ-ଘରୋଇ କ୍ଷେତ୍ରଗୁଡ଼ିକୁ ପ୍ରାଥମିକତା ଭିତ୍ତିରେ ଯୋଗାଇ ଦିଆଯାଉଛି।
ଅନ୍ୟପଟେ ବାଣିଜ୍ୟିକ ଏଲ୍ପିଜିର ହଠାତ୍ ଅଭାବ ହୋଟେଲ୍ ଓ ରେଷ୍ଟୁରାଣ୍ଟ ଶିଳ୍ପକୁ ଚିନ୍ତାରେ ପକାଇଛି। ଯଦି ଶୀଘ୍ର ଯୋଗାଣ ସ୍ଥିର ହେବ ନାହିଁ, ତେବେ କିଛି ଦିନ ମଧ୍ୟରେ ଅନେକ ହୋଟେଲ୍ ଓ ଖାଦ୍ୟପେୟ ପ୍ରତିଷ୍ଠାନ ବନ୍ଦ ହୋଇପାରେ ବୋଲି ଶିଳ୍ପ ସଂଗଠନଗୁଡ଼ିକ ସତର୍କ କରିଛନ୍ତି।
ଏହି ପରିସ୍ଥିତିର ସମୀକ୍ଷା ପାଇଁ ତୈଳ ବିପଣନ କମ୍ପାନିଗୁଡ଼ିକର ତିନିଜଣ କାର୍ଯ୍ୟନିର୍ବାହୀ ନିର୍ଦ୍ଦେଶକଙ୍କୁ ନେଇ ଏକ ସ୍ୱତନ୍ତ୍ର କମିଟି ଗଠନ କରାଯାଇଛି। ଏହି କମିଟି ହୋଟେଲ୍, ରେଷ୍ଟୁରାଣ୍ଟ ଓ ଅନ୍ୟ ବାଣିଜ୍ୟିକ ପ୍ରତିଷ୍ଠାନକୁ ଏଲ୍ପିଜି ଯୋଗାଣ ସମସ୍ୟାର ସମୀକ୍ଷା କରିବ।
ତଥ୍ୟ ଅନୁସାରେ, ଭାରତରେ ପ୍ରତିବର୍ଷ ପ୍ରାୟ ୩୧.୩ ନିୟୁତ ଟନ୍ ଏଲ୍ପିଜି ବ୍ୟବହୃତ ହୁଏ। ଏଥିରୁ ପ୍ରାୟ ୮୭ ପ୍ରତିଶତ ଘରୋଇ ରନ୍ଧନ କାମରେ ଓ ୧୩ ପ୍ରତିଶତ ହୋଟେଲ୍ ଓ ରେଷ୍ଟୁରାଣ୍ଟ ଭଳି ବାଣିଜ୍ୟିକ କ୍ଷେତ୍ରରେ ବ୍ୟବହାର ହୁଏ। ଦେଶର ମୋଟ ଚାହିଦାର ପ୍ରାୟ ୬୨ ପ୍ରତିଶତ ଏଲ୍ପିଜି ଆମଦାନୀ ମାଧ୍ୟମରେ ପୂରଣ କରାଯାଉଛି।