ଭଦ୍ରକ: ଓଡ଼ିଶାର ଭଦ୍ରକ ଜିଲ୍ଲା ଚାନ୍ଦବାଲି ଥାନା ଅଞ୍ଚଳରେ ଚାଞ୍ଚଲ୍ୟ ଖେଳାଇଥିବା ଜଣେ ନାବାଳିକା ଅପହରଣ ମାମଲାରେ ପୋଲିସକୁ ଏକ ବଡ଼ ସଫଳତା ମିଳିଛି। ବାଘନତା ଗ୍ରାମରୁ ଜଣେ ନାବାଳିକାଙ୍କୁ ଅପହରଣ କରାଯାଇଥିବା ଅଭିଯୋଗରେ ପୋଲିସ ମୁଖ୍ୟ ଅଭିଯୁକ୍ତ ସମେତ ମୋଟ ୫ ଜଣଙ୍କୁ ଗିରଫ କରିଛି। ଗିରଫ ଅଭିଯୁକ୍ତମାନଙ୍କୁ କୋର୍ଟ ଚାଲାଣ କରାଯାଇଥିବା ପୋଲିସ ସୂଚନା ଦେଇଛି।
ମାମଲାର ମୁଖ୍ୟ ଅଭିଯୁକ୍ତ ହେଉଛି ମୟୂରଭଞ୍ଜ ଜିଲ୍ଲା ବାଙ୍ଗିରିପୋଷି ଅଞ୍ଚଳର ଚନ୍ଦନ ନାୟକ। ସେ ଦୀର୍ଘ ବର୍ଷ ଧରି ବାଘନତା ଗ୍ରାମରେ ଏକ ଟ୍ରାକ୍ଟର ଚାଳକ ଭାବେ କାମ କରୁଥିଲା। ପୋଲିସ ସୂଚନା ଅନୁଯାୟୀ, ଚନ୍ଦନ ସେହି ଗ୍ରାମର ନାବାଳିକା ପ୍ରତି ଏକତରଫା ଆକର୍ଷଣ ରଖିଥିଲା, ଯାହାକୁ ନେଇ ପୂର୍ବରୁ ସ୍ଥାନୀୟ ସ୍ତରରେ ବିବାଦ ଉପୁଜିଥିଲା ଏବଂ ଗ୍ରାମସଭାରେ ଏହାର ସମାଧାନ ମଧ୍ୟ କରାଯାଇଥିଲା। ମାତ୍ର ଗତ ରବିବାର ସ୍ଥିତି ବିଗିଡ଼ିଥିଲା ଏବଂ ଚନ୍ଦନ ନିଜ ସହଯୋଗୀମାନଙ୍କ ସହ ମିଶି ନାବାଳିକାଙ୍କୁ ଅପହରଣ କରିଥିଲା।
ନାବାଳିକାଙ୍କ ବାପା ଗତ ମେ ୨୪ ତାରିଖରେ ଚାନ୍ଦବାଲି ଥାନାରେ ଏକ ଲିଖିତ ଅଭିଯୋଗ କରିବା ପରେ ପୋଲିସ ତଦନ୍ତ ପ୍ରକ୍ରିୟା ଜୋରଦାର କରିଥିଲା। ପୋଲିସ ବିଭିନ୍ନ ସ୍ଥାନରେ ଚଢ଼ାଉ କରି ମୁଖ୍ୟ ଅଭିଯୁକ୍ତ ଚନ୍ଦନ ନାୟକ ସମେତ ଅନ୍ୟ ୪ ସହଯୋଗୀ ଅମର ମାଝୀ, ପ୍ରକାଶ ପରିଡ଼ା, ଅଶୋକ ଦାସ ଏବଂ ରାକେଶ ସେଠୀଙ୍କୁ ଗିରଫ କରିଛି। ଏହି ଘଟଣାରେ ଅନ୍ୟ କାହାର ସଂପୃକ୍ତି ରହିଛି କି ନାହିଁ, ସେ ନେଇ ପୋଲିସ ଅଧିକ ତଦନ୍ତ ଜାରି ରଖିଛି।