ନୂଆଦିଲ୍ଲୀ: କେନ୍ଦ୍ର ସରକାର ଆସନ୍ତା ଅକ୍ଟୋବରରେ ମହଙ୍ଗା ଭତ୍ତା (DA) ଏବଂ ପେନସନଭୋଗୀଙ୍କ ପାଇଁ ମହଙ୍ଗା ରାହତ (DR) ୩% ବୃଦ୍ଧି କରିବାକୁ ପାରେ। ଏହା ଫଳରେ ୧.୨ କୋଟିରୁ ଅଧିକ କେନ୍ଦ୍ରୀୟ କର୍ମଚାରୀ ଓ ପେନସନଭୋଗୀଙ୍କୁ ସିଧାସଳଖ ଲାଭ ମିଳିବ।
ଗଣମାଧ୍ୟମ ସୂତ୍ରରୁ ମିଳିଥିବା ଖବର ଅନୁସାରେ, ଅକ୍ଟୋବର ପ୍ରଥମ ସପ୍ତାହରେ DA ୫୫% ରୁ ବୃଦ୍ଧି ପାଇ ୫୮% ହେବ। ଏହି ପରିବର୍ତ୍ତନ ଜୁଲାଇ ୨୦୨୫ରୁ ଲାଗୁ ହେବ। ସେଥିପାଇଁ, କର୍ମଚାରୀମାନଙ୍କୁ ତିନି ମାସର ବକେୟା DA ମଧ୍ୟ ମିଳିବ, ଯାହା ଅକ୍ଟୋବରରେ ଦରମା ସହିତ ଯୋଗ କରାଯିବ।
କେତେ ବଢ଼ିବ ଦରମା ଓ ପେନସନ?
- ଦରମା ୫୦,୦୦୦ ଟଙ୍କା ଥିବା କର୍ମଚାରୀ DA ୨୭,୫୦୦ ଟଙ୍କାରୁ ବଢ଼ି ୨୯,୦୦୦ ଟଙ୍କା ପାଇବେ। ଅର୍ଥାତ୍ ପ୍ରତିମାସ ପ୍ରାୟ ୧୫୦୦ ଟଙ୍କା ଅଧିକ।
- ମୂଳ ପେନସନ ୩୦,୦୦୦ ଟଙ୍କା ଥିଲେ DR ୧୬,୫୦୦ ଟଙ୍କାରୁ ବଢ଼ି ୧୭,୪୦୦ ଟଙ୍କା ହେବ। ଏଥିରୁ ପେନସନଭୋଗୀମାନେ ପ୍ରତିମାସ ୯୦୦ ଟଙ୍କା ଅଧିକ ପାଇବେ।
ସପ୍ତମ ବେତନ କମିଶନରେ ଶେଷ DA ବୃଦ୍ଧି
ଏହି DA ବୃଦ୍ଧି ସପ୍ତମ ବେତନ କମିଶନ ଅଧୀନରେ ଶେଷ ସଂଶୋଧନ ହେବ, କାରଣ ଏହାର କାର୍ଯ୍ୟକାଳ ୩୧ ଡିସେମ୍ବର ୨୦୨୫ରେ ସମାପ୍ତ ହେଉଛି। ସରକାର ଅଷ୍ଟମ ବେତନ କମିଶନ ଗଠନ କରିସାରିଛନ୍ତି, କିନ୍ତୁ ଏପର୍ଯ୍ୟନ୍ତ ସେଥିରେ ଅଧ୍ୟକ୍ଷ ଓ ସଦସ୍ୟଙ୍କ ନାମ ଘୋଷିତ ହୋଇନାହିଁ।