ମାଲକାନଗିରି: ଛତିଶଗଡରେ ହୋଇଥିବା ଏନକାଉଣ୍ଟରରେ ମୃତ୍ୟୁବରଣ କରିଥିବା ମାଓବାଦୀ କେନ୍ଦ୍ରୀୟ କମିଟି ସଦସ୍ୟ କଟ୍ଟା ରାମଚନ୍ଦ୍ର ରେଡ୍ଡୀଙ୍କ ଶବକୁ ସୁରକ୍ଷିତ ରଖିବା ପାଇଁ ସୁପ୍ରିମକୋର୍ଟ ନିର୍ଦେଶ ଜାରି କରିଛି। କୋର୍ଟ ସ୍ପଷ୍ଟ କରିଛି ଯେ ମାମଲାର ଶୁଣାଣି ହେବା ପର୍ଯ୍ୟନ୍ତ ଅନ୍ତିମ ସଂସ୍କାର କରାଯିବ ନାହିଁ।
ଜଷ୍ଟିସ ଦିପଙ୍କର ଦତ୍ତ ଓ ଜଷ୍ଟିସ ଏ.ଜି. ମସିହଙ୍କ ଖଣ୍ଡପୀଠ କହିଛି, ଯେତେବେଳେ କୌଣସି ଅଭିଯୋଗ ଆସିଥାଏ, ସେଥିରେ ଦୋଷ କିମ୍ବା ଗୁଣ ଦେଖିବାକୁ ନୁହେଁ, ବରଂ ସୁଚିନ୍ତିତ ତଦନ୍ତ କରାଯିବା ଉଚିତ। କୋର୍ଟ ହାଇକୋର୍ଟକୁ ଦଶହରା ପରେ ମାମଲାର ତୁରନ୍ତ ଶୁଣାଣି କରିବାକୁ ମଧ୍ୟ ନିର୍ଦେଶ ଦେଇଛି।
ରାମଚନ୍ଦ୍ର ରେଡ୍ଡୀଙ୍କ ପୁଅ ରାଜା ଚନ୍ଦ୍ରା—ଯିଏ ହାଇଦ୍ରାବାଦର ନଲସାର ୟୁନିଭର୍ସିଟିରେ ପ୍ରୋଫେସର—ଏହି ରିଟ୍ ପିଟିସନ ଦାଖଲ କରିଥିଲେ। ସେ ଅଭିଯୋଗ କରିଛନ୍ତି ଯେ, ପୁଲିସ ତାଙ୍କ ବାପାଙ୍କୁ ଧରିବା ପରେ ନିର୍ଯାତନା ଦେଇଥିଲା ଏବଂ ଜଙ୍ଗଲରେ ନେଇ ମିଥ୍ୟା ଏନକାଉଣ୍ଟର କରିଥିଲା। ସେହିପାଇଁ ସିବିଆଇ ତଦନ୍ତ ସହିତ ପୁନଃ ପୋଷ୍ଟମର୍ଟମ କରାଇବାକୁ ଦାବି କରାଯାଇଛି।
ଗତ ୨୨ ସେପ୍ଟେମ୍ବରରେ ନାରାୟଣପୁର ଜିଲ୍ଲାର ଆବୁଝମାଡ଼ ଜଙ୍ଗଲରେ ରାମଚନ୍ଦ୍ର ରେଡ୍ଡୀ ଓ କାଦରି ସତ୍ୟନାରାୟଣ ରେଡ୍ଡୀ ନାମକ ଦୁଇଜଣ ସେଣ୍ଟ୍ରାଲ କମିଟି ସଦସ୍ୟ ନିହତ ହୋଇଥିଲେ। ପୁଲିସ କୋର୍ଟକୁ ଜଣାଇଛି ଯେ ରାମଚନ୍ଦ୍ର ରେଡ୍ଡୀଙ୍କ ଉପରେ ସାତୋଟି ରାଜ୍ୟରେ ସାତ କୋଟି ଟଙ୍କାର ପୁରସ୍କାର ରହିଥିଲା।
ବର୍ତ୍ତମାନ ରାମଚନ୍ଦ୍ର ରେଡ୍ଡୀଙ୍କ ଶବ ହସପିଟାଲରେ ରହିଛି ଏବଂ ପୋଷ୍ଟମର୍ଟମର ଭିଡିଓ ସାକ୍ଷ୍ୟ ଭାବରେ ରହିଛି। କୋର୍ଟ ଆଦେଶ ଅନୁସାରେ ତଦନ୍ତ ସରିବା ପର୍ଯ୍ୟନ୍ତ ଶବକୁ ସୁରକ୍ଷିତ ରଖିବାକୁ ଦିଆଗଲା।