ନୂଆଦିଲ୍ଲୀ: ବର୍ଷ ୨୦୨୫ ଭାରତୀୟ ଓଟିଟି ଇଣ୍ଡଷ୍ଟ୍ରି ପାଇଁ ଏକ ସୁନାଳି ଅଧ୍ୟାୟ ସାବିତ ହୋଇଛି। ଅପରାଧ, ରାଜନୀତି, ପାରିବାରିକ ନାଟକ, କମେଡି ଓ ପରୀକ୍ଷାମୂଳକ କାହାଣୀ—ସମସ୍ତ ଶୈଳୀରେ ଏହି ବର୍ଷ ଦର୍ଶକଙ୍କୁ ଭରପୁର ମନୋରଞ୍ଜନ ମିଳିଥିଲା। କିଛି ଲୋକପ୍ରିୟ ସିରିଜ୍ ନୂଆ ସିଜିନ୍ ସହ ଫେରି ରେକର୍ଡ ଗଢ଼ିଥିବା ବେଳେ, କେତେକ ନୂଆ ଶୋ’ ଓଟିଟି ଦୁନିଆରେ ଆଲଗା ପରିଚୟ ସୃଷ୍ଟି କରିଥିଲା।
‘ଦି ବ୍ୟାଡ଼ସ ଅଫ୍ ବଲିଉଡ଼’
୨୦୨୫ର ସବୁଠାରୁ ଚର୍ଚ୍ଚିତ ଓ ବୋଲ୍ଡ ୱେବ୍ ସିରିଜ୍ ମଧ୍ୟରୁ ଗୋଟିଏ ଥିଲା ‘ଦି ବ୍ୟାଡ଼ସ ଅଫ୍ ବଲିଉଡ଼’। ବବି ଦେଓଲଙ୍କ ଶକ୍ତିଶାଳୀ ସ୍କ୍ରିନ୍ ପ୍ରେଜେନ୍ସ ସହ ମୋନା ସିଂହ ଓ ସହେର ବାମ୍ବାଙ୍କ ଅଭିନୟ ଦର୍ଶକଙ୍କୁ ଆକର୍ଷିତ କରିଥିଲା। ଶାହରୁଖ ଖାନଙ୍କ ସ୍ୱତନ୍ତ୍ର ଉପସ୍ଥିତି ଶୋ’ର ଲୋକପ୍ରିୟତାକୁ ଆହୁରି ବଢ଼ାଇଥିଲା।
‘ଦ ଫାମିଲି ମେନ୍ ୩’
ମନୋଜ ବାଜପେୟୀଙ୍କ ଅଭିନୀତ ‘ଦ ଫାମିଲି ମେନ୍’ର ତୃତୀୟ ସିଜିନ୍ ଦର୍ଶକଙ୍କ ହୃଦୟ ଜିତିଥିଲା। ଶ୍ରୀକାନ୍ତ ତିୱାରୀଙ୍କ ଚରିତ୍ରକୁ ଏଥର ଅଧିକ ଭାବପ୍ରବଣତା ଓ ଜଟିଳତା ସହ ପ୍ରସ୍ତୁତ କରାଯାଇଥିଲା।
‘ଡ଼ବା କାର୍ଟେଲ’
ମହିଳା କେନ୍ଦ୍ରିତ ଅପରାଧ ଥ୍ରିଲର ‘ଡ଼ବା କାର୍ଟେଲ’ ଦର୍ଶକଙ୍କ ମଧ୍ୟରେ ଭଲ ଚର୍ଚ୍ଚା ସୃଷ୍ଟି କରିଥିଲା। ଶବାନା ଆଜମୀ, ଜ୍ୟୋତିକା ଓ ଶାଲିନୀ ପାଣ୍ଡେଙ୍କ ଅଭିନୟ ସହ ଡବା ସିଷ୍ଟମ ଆଡ଼ରେ ଚାଲୁଥିବା ଗୁପ୍ତ ଅପରାଧ ନେଟୱାର୍କର କାହାଣୀ ଦର୍ଶକଙ୍କୁ ଆକର୍ଷିତ କରିଥିଲା।
‘ରାଣା ନାଇଡୁ ୨’
ରାଣା ଓ ଭେଙ୍କଟେଶ ଦଗୁବତୀଙ୍କ ଅଭିନୀତ ଏହି ସିରିଜ୍ ଦ୍ୱିତୀୟ ସିଜିନରେ ଆହୁରି ହିଂସାତ୍ମକ ଓ ଭାବପ୍ରବଣ ହୋଇଥିଲା। ଶକ୍ତିଶାଳୀ ଆକ୍ସନ ଓ ଲେଖନ ଏହାକୁ ବର୍ଷର ହିଟ୍ ସିରିଜ୍ରେ ପରିଣତ କରିଥିଲା।
‘ଦ ଟ୍ରାଏଲ୍ ୨’
କାଜୋଲ୍ ଓ କୁବ୍ରା ସୈତଙ୍କ ଅଭିନୟରେ ତିଆରି ଏହି ଆଇନଗତ ଡ୍ରାମା ତା’ର ଗମ୍ଭୀର ଓ ଭାବପ୍ରବଣ କାହାଣୀ ପାଇଁ ପ୍ରଶଂସିତ ହୋଇଥିଲା। ବହୁସ୍ତରୀୟ ଚରିତ୍ର ଚିତ୍ରଣ ଏହାର ପ୍ରମୁଖ ଆକର୍ଷଣ ଥିଲା।
‘ବ୍ଲାକ୍ ୱାରେଣ୍ଟ’
ଜାହାନ କପୁରଙ୍କ ଅଭିନୟରେ ତିଆରି ଏହି ଅପରାଧ ଥ୍ରିଲର ଗୁପ୍ତ ମିଶନ, ବିଶ୍ୱାସଘାତକତା ଓ ନୈତିକ ଦ୍ୱନ୍ଦ୍ୱକୁ ଆଧାର କରି ଦର୍ଶକଙ୍କୁ ବାନ୍ଧି ରଖିଥିଲା।
‘ରୟାଲ୍ସ’
ଈଶାନ ଖଟ୍ଟର ଓ ଭୂମି ପେଡନେକରଙ୍କ ଅଭିନୟରେ ରାଜନୈତିକ କ୍ଷମତା, ଦୁର୍ନୀତି ଓ ଷଡ଼ଯନ୍ତ୍ରର କାହାଣୀ ଦର୍ଶକଙ୍କ ମଧ୍ୟରେ ଭଲ ପ୍ରତିକ୍ରିୟା ପାଇଥିଲା।
‘ଦିଲ୍ଲୀ କ୍ରାଇମ୍ସ ୩’
ଶେଫାଲି ଶାହ ଓ ହୁମା କୁରେଶୀଙ୍କ ଶକ୍ତିଶାଳୀ ଅଭିନୟ ସହ ‘ଦିଲ୍ଲୀ କ୍ରାଇମ୍ସ ୩’ ଏହାର ମଜବୁତ କାହାଣୀ ପାଇଁ ଚର୍ଚ୍ଚିତ ହୋଇଥିଲା ଏବଂ ଜାତୀୟ ପୁରସ୍କାର ମଧ୍ୟ ହାସଲ କରିଥିଲା।
‘ମହାରାଣୀ ୪’
ହୁମା କୁରେଶୀଙ୍କ ନେତୃତ୍ୱରେ ଏହି ସିଜିନ୍ରେ ରାଜନୈତିକ ଦ୍ୱନ୍ଦ୍ୱ ଓ କ୍ଷମତାର ମୂଲ୍ୟବୋଧକୁ ଗଭୀର ଭାବେ ଉପସ୍ଥାପନ କରାଯାଇଥିଲା, ଯାହାକୁ ଦର୍ଶକମାନେ ବ୍ୟାପକ ଭଲପାଇଥିଲେ।
‘ପଞ୍ଚାୟତ ୪’
ଜିତେନ୍ଦ୍ର କୁମାର, ରଘୁବୀର ଯାଦବ ଓ ନୀନା ଗୁପ୍ତାଙ୍କ ଅଭିନୟରେ ତିଆରି ‘ପଞ୍ଚାୟତ’ର ଚତୁର୍ଥ ସିଜିନ୍ ଗ୍ରାମୀଣ ଜୀବନର ସରଳତା ଓ ଗଭୀରତାକୁ ଆହୁରି ସୁନ୍ଦର ଭାବେ ପ୍ରସ୍ତୁତ କରିଥିଲା।