ନାଗପୁର: ଭାରତ ଓ ନ୍ୟୁଜିଲାଣ୍ଡ ମଧ୍ୟରେ ୫ ମ୍ୟାଚର ଟ୍ବେଣ୍ଟି-୨୦ ଶୃଙ୍ଖଳାର ପ୍ରଥମ ମୁକାବିଲା ବୁଧବାର ନାଗପୁରର ବିଦର୍ଭ କ୍ରିକେଟ୍ ଆସୋସିଏସନ ଷ୍ଟାଡିୟମରେ ଖେଳାଯିବ। ସଂଧ୍ୟା ୭ଟାରୁ ଆରମ୍ଭ ହେବାକୁ ଥିବା ଏହି ମ୍ୟାଚ୍କୁ ଟ୍ବେଣ୍ଟି-୨୦ ବିଶ୍ବକପ୍ ପୂର୍ବରୁ ଉଭୟ ଦଳ ପାଇଁ ଗୁରୁତ୍ୱପୂର୍ଣ୍ଣ ଅଭ୍ୟାସ ମ୍ୟାଚ୍ ଭାବେ ଦେଖାଯାଉଛି।
ପ୍ରାୟ ଦୁଇ ସପ୍ତାହ ପରେ ଟ୍ବେଣ୍ଟି-୨୦ ବିଶ୍ବକପ୍ ଆରମ୍ଭ ହେବାକୁ ଥିବାରୁ ଏହି ଶୃଙ୍ଖଳା ଭାରତୀୟ ଦଳ ପାଇଁ ପ୍ରସ୍ତୁତିକୁ ଅନ୍ତିମ ରୂପ ଦେବାର ସୁଯୋଗ ନେଇଆସିଛି। ସେହିପରି ଉପମହାଦେଶରେ ବିଶ୍ବକପ୍ ହେବାକୁ ଥିବାରୁ ନ୍ୟୁଜିଲାଣ୍ଡ ଦଳ ପାଇଁ ବି ଏହି ଶୃଙ୍ଖଳା ଅନୁକୂଳ ପରିସ୍ଥିତିରେ ନିଜକୁ ଖାପଖୁଆଇବାର ଅବସର ହେବ।
ଏହି ମ୍ୟାଚ୍ରେ ଭାରତୀୟ ଦଳର ଅଧିନାୟକ ସୂର୍ଯ୍ୟକୁମାର ଯାଦବଙ୍କ ଉପରେ ସମସ୍ତଙ୍କ ନଜର ରହିବ। ଗତ କିଛି ମାସ ଧରି ବ୍ୟକ୍ତିଗତ ଭାବେ ତାଙ୍କ ଫର୍ମ ଆଶାଅନୁରୂପ ନଥିଲେ ବି, ତାଙ୍କ ନେତୃତ୍ୱରେ ଭାରତ ଟ୍ବେଣ୍ଟି-୨୦ ଫର୍ମାଟରେ ନିୟମିତ ଭଲ ପ୍ରଦର୍ଶନ କରିଆସୁଛି। ୨୦୨୪ରେ ଅଧିନାୟକ ହେବା ପରଠାରୁ ଏହି ଫର୍ମାଟରେ ଭାରତର ବିଜୟ ହାର ୭୨ ପ୍ରତିଶତ ରହିଛି, ଯାହାକୁ ଦଳ ପାଇଁ ସକାରାତ୍ମକ ସଙ୍କେତ ଭାବେ ଦେଖାଯାଉଛି।
ଭାରତ ଅନ୍ୟ ଦୁଇଟି ଫର୍ମାଟରେ ପରିବର୍ତ୍ତନର ପର୍ଯ୍ୟାୟ ମଧ୍ୟରୁ ଯାଉଥିବାବେଳେ, ଟ୍ବେଣ୍ଟି-୨୦ ଦଳ ପଛଲା ଦୁଇ ବର୍ଷ ଧରି ସ୍ଥିର ପ୍ରଦର୍ଶନ ରଖିଆସିଛି। ଚାମ୍ପିୟନ ଭାବେ ଭାରତ ନିଜ ଟାଇଟେଲ୍ ବଜାୟ ରଖିବାକୁ ଲକ୍ଷ୍ୟ ରଖିଥିବାରୁ, ଏହି ଶୃଙ୍ଖଳାକୁ ବିଶ୍ବକପ୍ ପୂର୍ବରୁ ଶେଷ ପରୀକ୍ଷା ଭାବେ ଦେଖାଯାଉଛି। ଏଥିପାଇଁ ସୂର୍ଯ୍ୟକୁମାରଙ୍କ ଫର୍ମକୁ ଫେରିବା ଭାରତ ପାଇଁ ବେଶ ଆବଶ୍ୟକ ହେବ।
ଅନ୍ୟପକ୍ଷରେ, ଭାରତରେ ଐତିହାସିକ ଦିନିକିଆ ଶୃଙ୍ଖଳା ଜିତି ଆସିଥିବା ନ୍ୟୁଜିଲାଣ୍ଡ ଦଳ ମନୋବଳରେ ଉଚ୍ଚ ସ୍ତରରେ ରହିଛି। ବିଶ୍ବକପ୍ ପୂର୍ବରୁ ଟ୍ବେଣ୍ଟି-୨୦ ଫର୍ମାଟରେ ମଧ୍ୟ ବିଜୟ ଧାରା ଜାରି ରଖିବାକୁ ଦଳ ପ୍ରୟାସ କରିବ।
ତିନି ନମ୍ବରରେ ଇଶାନଙ୍କ ସମ୍ଭାବନା
ମ୍ୟାଚ୍ ପୂର୍ବଦିନ ସୂର୍ଯ୍ୟକୁମାର ଯାଦବ କହିଛନ୍ତି ଯେ ଇଶାନ କିଷନ ୩ ନମ୍ବର ସ୍ଥାନରେ ବ୍ୟାଟିଂ କରିପାରନ୍ତି। ଟ୍ବେଣ୍ଟି-୨୦ ବିଶ୍ବକପ୍ ଦଳରେ ସେ ଥିବାରୁ ତାଙ୍କୁ ପ୍ରଚୁର ସୁଯୋଗ ଦେବା ଦରକାର ବୋଲି ଅଧିନାୟକ କହିଛନ୍ତି। ଆହତ ତିଳକ ବର୍ମାଙ୍କ ସ୍ଥାନରେ ଦଳକୁ ଫେରିଥିବା ଶ୍ରେୟସ ଆୟର ୫ମ ସ୍ଥାନରେ ଏବଂ ସୂର୍ଯ୍ୟକୁମାର ନିଜେ ୪ ନମ୍ବରରେ ବ୍ୟାଟିଂ କରିବେ।
ସମ୍ଭାବ୍ୟ ଭାରତୀୟ ଦଳ: ସୂର୍ଯ୍ୟକୁମାର ଯାଦବ (ଅଧିନାୟକ), ଅଭିଷେକ ଶର୍ମା, ସଂଜୁ ସାମସନ (ଓ୍ବିକେଟକୀପର), ଇଶାନ କିଷନ, ଶ୍ରେୟସ ଆୟର, ହାର୍ଦ୍ଦିକ ପାଣ୍ଡ୍ୟା, ଶିବମ ଦୁବେ, ଅକ୍ଷର ପଟେଲ, କୁଳଦୀପ ଯାଦବ, ଯସପ୍ରୀତ ବୁମରା, ବରୁଣ ଚକ୍ରବର୍ତ୍ତି, ରିଙ୍କୁ ସିଂ, ଅର୍ଶଦୀପ ସିଂ, ରବି ବିଷ୍ଣୋଇ, ହର୍ଷିତ ରାଣା।
ସମ୍ଭାବ୍ୟ ନ୍ୟୁଜିଲାଣ୍ଡ ଦଳ: ମିଚେଲ ସାଣ୍ଟନର (ଅଧିନାୟକ), ଦେଭନ କନୱେ (ଓ୍ବିକେଟକୀପର), ବେଭନ ଜାକବ୍ସ, ଡାରିଲ ମିଚେଲ, ଗ୍ଲେନ ଫିଲିପ୍ସ, ଟିମ ରବିନସନ, ଜିମି ନିସାମ, ଇଶ ସୋଡି, ଜାକ୍ ଫୋକ୍ସ, ମାର୍କ ଚାପମ୍ୟାନ, ମାଇକେଲ ବ୍ରେସୱେଲ, ରାଚିନ ରବୀନ୍ଦ୍ର, କାଇଲ ଜେମିସନ, ମ୍ୟାଟ ହେନେରି, ଜାକବ ଡଫି, କ୍ରିଷ୍ଟିଆନ କ୍ଲାର୍କ।