ଡାଭୋସ୍: ଆର୍ଟିଫିସିଆଲ ଇଣ୍ଟେଲିଜେନ୍ସ (ଏଆଇ) କ୍ଷେତ୍ରରେ ଭାରତକୁ ଦ୍ୱିତୀୟ ଶ୍ରେଣୀର ଦେଶ ଭାବେ ଅଭିହିତ କରାଯାଇଥିବା ଅନ୍ତର୍ଜାତୀୟ ମୁଦ୍ରା ପାଣ୍ଠି (ଆଇଏମଏଫ୍) ପରିଚାଳନା ନିର୍ଦ୍ଦେଶିକା କ୍ରିଷ୍ଟାଲିନା ଜର୍ଜିଭାଙ୍କ ମନ୍ତବ୍ୟକୁ ସୂଚନା ପ୍ରଯୁକ୍ତି ମନ୍ତ୍ରୀ ଅଶ୍ୱିନୀ ବୈଷ୍ଣବ କଟୁ ଭାବେ ଖଣ୍ଡନ କରିଛନ୍ତି। କେଉଁ ମାନଦଣ୍ଡ ଆଧାରରେ ଆଇଏମଏଫ୍ ଏପରି ନିଷ୍କର୍ଷରେ ପହଞ୍ଚିଛି, ସେଥିପାଇଁ ସେ ପ୍ରଶ୍ନ ଉଠାଇଥିଲେ।
ଡାଭୋସ୍ରେ ଆୟୋଜିତ ଏକ ଆଲୋଚନା ସଭାରେ ମନ୍ତ୍ରୀ କହିଥିଲେ ଯେ ଆଇଏମଏଫ୍ର ମୂଲ୍ୟାଙ୍କନର ମାନଦଣ୍ଡ ସମ୍ପର୍କରେ ସେ ଅବଗତ ନୁହନ୍ତି। ତେବେ ଏଆଇ ସାନ୍ଦ୍ରତା, ଏଆଇ ପ୍ରସ୍ତୁତି ଏବଂ ଏଆଇ ପ୍ରତିଭା ଦୃଷ୍ଟିକୋଣରୁ ଭାରତ ବିଶ୍ୱରେ ତୃତୀୟ ସ୍ଥାନରେ ରହିଥିବା ଷ୍ଟାନ୍ଫୋର୍ଡ ବିଶ୍ୱବିଦ୍ୟାଳୟର ରିପୋର୍ଟ ସ୍ପଷ୍ଟ କରୁଛି। ଏହି ପରିସ୍ଥିତିରେ ଭାରତକୁ ଦ୍ୱିତୀୟ ଶ୍ରେଣୀରେ ରଖିବା ଆଇଏମଏଫ୍ର ବର୍ଗୀକରଣ ଯୁକ୍ତିସଙ୍ଗତ ନୁହେଁ ବୋଲି ସେ ମତ ପ୍ରକାଶ କରିଥିଲେ। ଭାରତ ସ୍ପଷ୍ଟ ଭାବେ ଏଆଇ କ୍ଷେତ୍ରରେ ପ୍ରଥମ ଶ୍ରେଣୀର ଅର୍ଥନୀତି ଭାବେ ନିଜ ସ୍ଥାନ ଦୃଢ଼ କରିଛି ବୋଲି ଶ୍ରୀ ବୈଷ୍ଣବ କହିଥିଲେ।
ଭାରତରେ ଏଆଇର ବ୍ୟାପକ ଗ୍ରହଣୀୟତା ଓ ଉନ୍ନତ ଏଆଇ କ୍ଷମତାକୁ ସାର୍ବଜନୀନ ଭାବେ ଉପଲବ୍ଧ କରାଇବାର ଆବଶ୍ୟକତା ଉପରେ ମନ୍ତ୍ରୀ ଗୁରୁତ୍ୱାରୋପ କରିଥିଲେ। ସରକାରୀ–ଘରୋଇ ସହଭାଗୀତା (ପିପିପି) ମଡେଲ ମାଧ୍ୟମରେ ଜିପିୟୁ ଉପଲବ୍ଧତା ସମ୍ପର୍କିତ ମୁଖ୍ୟ ବାଧାକୁ ଦୂର କରିବା ପାଇଁ ସରକାର ଗ୍ରହଣ କରିଥିବା ପଦକ୍ଷେପ ସମ୍ପର୍କରେ ସେ ଆଲୋକପାତ କରିଥିଲେ।
ସେ ଏହା ସହ ଦେଶବ୍ୟାପୀ ଏଆଇ ଦକ୍ଷତା ବିକାଶ କାର୍ଯ୍ୟକ୍ରମ ବିଷୟରେ ଉଲ୍ଲେଖ କରି କହିଥିଲେ ଯେ ଏହାର ଲକ୍ଷ୍ୟ ୧ କୋଟି ଲୋକଙ୍କୁ ଏଆଇ ତାଲିମ ପ୍ରଦାନ କରିବା। ଏହି ପଦକ୍ଷେପ ମାଧ୍ୟମରେ ଭାରତର ଆଇଟି ଶିଳ୍ପ ଓ ଷ୍ଟାର୍ଟଅପ୍ଗୁଡ଼ିକ ଘରୋଇ ସହିତ ସହ ବିଶ୍ୱ ବଜାରରେ ଏଆଇ ଆଧାରିତ ସେବାକୁ ଅଧିକ କାର୍ଯ୍ୟକାରୀ ଭାବେ ପ୍ରଦାନ କରିପାରିବେ ବୋଲି ସେ କହିଥିଲେ।
ଆଲୋଚନା ସମୟରେ ଅନ୍ୟାନ୍ୟ ବକ୍ତାମାନେ ମଧ୍ୟ ବିଶ୍ୱ ଏଆଇ ଦୃଶ୍ୟପଟରେ ଭାରତର ଦ୍ରୁତ ବୃଦ୍ଧି ଓ ବଢ଼ୁଥିବା ଗୁରୁତ୍ୱକୁ ସ୍ୱୀକାର କରିଥିଲେ।