ପୁସ୍ତକ ପ୍ରକାଶ ପୂର୍ବରୁ ଅନୁମତି ବାଧ୍ୟତାମୂଳକ କରିବେ ସରକାର, ସେନା ଅଧିକାରୀଙ୍କ ପାଇଁ ଆସୁଛି ନୂତନ ନିୟମ

ନୂଆଦିଲ୍ଲୀ: ପୂର୍ବତନ ସେନା ମୁଖ୍ୟ ଜେନେରାଲ ମନୋଜ ମୁକୁନ୍ଦ ନରଵାଣେଙ୍କ ଅପ୍ରକାଶିତ ପୁସ୍ତକ “Four Star of Destiny” କୁ ନେଇ ଚର୍ଚ୍ଚା ଚାଲିଥିବା ବେଳେ, ପ୍ରତିରକ୍ଷା ମନ୍ତ୍ରଣାଳୟ ସେନା ସମ୍ବନ୍ଧିତ ପୁସ୍ତକ ପ୍ରକାଶ ଉପରେ କଠୋର ନିୟମ ଆଣିବା ପାଇଁ ପ୍ରସ୍ତୁତି ଆରମ୍ଭ କରିଛି। ସେବାରତ ଏବଂ ଅବସରପ୍ରାପ୍ତ ପ୍ରତିରକ୍ଷା କର୍ମଚାରୀଙ୍କ ଲେଖା ପୁସ୍ତକ ପାଇଁ ନୂତନ ନିର୍ଦ୍ଦେଶାବଳୀ ତିଆରି ହେଉଥିବା ସୂଚନା ମିଳିଛି।

ପ୍ରସ୍ତାବିତ ନିୟମାବଳୀ ଅନୁଯାୟୀ, ସେନାରେ କାର୍ଯ୍ୟରତ କିମ୍ବା ଅବସରପ୍ରାପ୍ତ ଅଧିକାରୀ ଓ କର୍ମଚାରୀମାନେ ପୁସ୍ତକ ଲେଖିବା କିମ୍ବା ପ୍ରକାଶ କରିବା ପୂର୍ବରୁ ପ୍ରତିରକ୍ଷା ମନ୍ତ୍ରଣାଳୟରୁ ପୂର୍ବ ଅନୁମତି ନେବାକୁ ପଡିବ। ତେବେ ଏହି ନୂତନ ନିୟମ ସମ୍ବନ୍ଧରେ ସରକାରୀ ଭାବେ ଏପର୍ଯ୍ୟନ୍ତ ଔପଚାରିକ ଘୋଷଣା ହୋଇନାହିଁ।

ପ୍ରସ୍ତାବିତ ନିୟମର ମୁଖ୍ୟ ବିଶେଷତା:

• ନିୟମଗୁଡ଼ିକ ସେବାରତ ଓ ଅବସରପ୍ରାପ୍ତ — ଉଭୟ ପ୍ରତିରକ୍ଷା କର୍ମଚାରୀଙ୍କ ପାଇଁ ପ୍ରୟୋଜ୍ୟ ହେବ।
• ପୁସ୍ତକ ପ୍ରକାଶ ପୂର୍ବରୁ ପାଣ୍ଡୁଲିପିକୁ ଯାଞ୍ଚ ଓ ଅନୁମୋଦନ ପାଇଁ ମନ୍ତ୍ରଣାଳୟ କିମ୍ବା ସେନା ମୁଖ୍ୟାଳୟରେ ଦାଖଲ କରିବାକୁ ପଡିବ।
• ସମ୍ବେଦନଶୀଳ ସୂଚନା ଥିବା ବିଷୟବସ୍ତୁ ପାଇଁ ବିଶେଷ ସ୍କ୍ରୁଟିନି ପ୍ରକ୍ରିୟା ରହିବ।
• କାଳ୍ପନିକ (fiction) ପୁସ୍ତକରେ ମଧ୍ୟ ପ୍ରକୃତ ଗୁପ୍ତ ସୁରକ୍ଷା ସମ୍ବନ୍ଧିତ ସୂଚନା ବ୍ୟବହାର ନିଷିଦ୍ଧ ରହିବ।
• ଅବସରପ୍ରାପ୍ତ ଅଧିକାରୀମାନଙ୍କ ପାଇଁ ସମ୍ବେଦନଶୀଳ ବିଷୟର ପାଣ୍ଡୁଲିପି ‘ଏମଓଡି’ ପ୍ରକ୍ରିୟାରେ ଦାଖଲ କରିବା ବାଧ୍ୟତାମୂଳକ କରାଯିବ।

ଜାତୀୟ ସୁରକ୍ଷା ସମ୍ବନ୍ଧୀୟ ଗୁପ୍ତ ତଥ୍ୟ ରକ୍ଷା କରିବା ଓ ଅସାବଧାନତାବଶତଃ ସୂଚନା ଫାଶ ହେବାକୁ ରୋକିବା ଲକ୍ଷ୍ୟରେ ଏହି ନୂତନ ନିୟମ ଆଣାଯାଉଛି ବୋଲି ସୂତ୍ରମାନେ କହିଛନ୍ତି।