ଫ୍ଲୋରିଡା: NASA ର ଆର୍ଟେମିସ୍-୨ ମିଶନ ମାଧ୍ୟମରେ ୫୪ ବର୍ଷ ପରେ ପୁଣିଥରେ ମଣିଷ ଚନ୍ଦ୍ର ଅଭିମୁଖେ ଯାତ୍ରା କରି ଇତିହାସ ରଚିଛି। ଗୁରୁବାର ଆମେରିକାର Kennedy Space Center ରୁ ସ୍ପେସ୍ ଲଞ୍ଚ ସିଷ୍ଟମ୍ (SLS) ରକେଟ୍ ମାଧ୍ୟମରେ ଓରିଅନ କ୍ୟାପସୁଲ୍ରେ ଚାରି ଜଣ ମହାକାଶଚାରୀ ଚନ୍ଦ୍ର ଦିଗକୁ ଯାତ୍ରା କରିଥିଲେ।
ଏହି ମିଶନର ନେତୃତ୍ୱ Reid Wiseman ନେଉଥିବାବେଳେ, ଅନ୍ୟ ମହାକାଶଚାରୀମାନଙ୍କ ମଧ୍ୟରେ Christina Koch, Victor Glover ଓ Jeremy Hansen ଅଛନ୍ତି। ଏହି ମିଶନର ବିଶେଷତା ହେଉଛି— କୋଚ୍ ପ୍ରଥମ ମହିଳା ଭାବେ ଚନ୍ଦ୍ର ଯାତ୍ରାରେ ସାମିଲ ହୋଇଛନ୍ତି, ଗ୍ଲୋଭର ପ୍ରଥମ ଅଣଶ୍ୱେତ ମହାକାଶଚାରୀ ଏବଂ ହାନ୍ସେନ୍ ପ୍ରଥମ କାନାଡିୟ ମହାକାଶଚାରୀ ଭାବେ ଏହି ମିଶନର ଅଂଶ ହୋଇଛନ୍ତି।
ଏହା ୧୯୭୨ ମସିହାରେ Apollo 17 mission ପରେ ପ୍ରଥମ ମାନବ ଚନ୍ଦ୍ର ମିଶନ। ଆର୍ଟେମିସ୍-୨ ମିଶନ ଚନ୍ଦ୍ରପୃଷ୍ଠରେ ଅବତରଣ କରିବା ନୁହେଁ, ବରଂ ଚନ୍ଦ୍ରକୁ ପରିକ୍ରମା କରି ପୁଣି ପୃଥିବୀକୁ ଫେରିବା ଉଦ୍ଦେଶ୍ୟ ରହିଛି।
ମିଶନ ଆରମ୍ଭ ପୂର୍ବରୁ ଅନେକ ପ୍ରାଯୁକ୍ତିକ ସମସ୍ୟା ଯଥା ହିଲିୟମ୍ ଲିକ୍ ଓ ରକେଟ୍ ରୋଲବ୍ୟାକ୍ ଯୋଗୁଁ ବିଳମ୍ବ ହୋଇଥିଲା। ତଥାପି ସଫଳ ଉତ୍କ୍ଷେପଣ ପରେ ପ୍ରଥମ ଦିନ ମହାକାଶଚାରୀମାନେ ପୃଥିବୀ କକ୍ଷପଥରେ ସିଷ୍ଟମ୍ ଯାଞ୍ଚ କରିବେ ଏବଂ ପରେ ଚନ୍ଦ୍ର ଦିଗରେ ଗତି କରିବେ।
ଏହି ମିଶନରେ ଚାରି ଦିନ ପରେ ଚନ୍ଦ୍ରକୁ ପହଞ୍ଚି, ମୁକ୍ତ-ପ୍ରତ୍ୟାବର୍ତ୍ତନ ପଥରେ ପରିକ୍ରମା କରି ଏପ୍ରିଲ ୧୧ ତାରିଖରେ ପ୍ରଶାନ୍ତ ମହାସାଗରରେ ଅବତରଣ କରିବା ଯୋଜନା ରହିଛି।
ଇତିହାସ ଅନୁଯାୟୀ, Apollo 11 mission ମାଧ୍ୟମରେ Neil Armstrong ପ୍ରଥମେ ଚନ୍ଦ୍ରପୃଷ୍ଠରେ ପାଦ ରଖିଥିଲେ। ସେଥିଠାରୁ ଆଜି ପର୍ଯ୍ୟନ୍ତ ମାତ୍ର ୧୨ ଜଣ ମହାକାଶଚାରୀ ଚନ୍ଦ୍ରରେ ଅବତରଣ କରିପାରିଛନ୍ତି।
ଆର୍ଟେମିସ୍-୨ ମିଶନ ଆଗାମୀ ଆର୍ଟେମିସ୍-୩ ମିଶନ ପାଇଁ ପଥ ପ୍ରସ୍ତୁତ କରିବ, ଯେଉଁଥିରେ ପୁଣିଥରେ ମଣିଷ ଚନ୍ଦ୍ରପୃଷ୍ଠରେ ପାଦ ରଖିବା ଲକ୍ଷ୍ୟ ରହିଛି।