ତେହେରାନ: ଆମେରିକା ଦ୍ୱାରା ଘୋଷିତ ହର୍ମୁଜ୍ ପ୍ରଣାଳୀ ଅବରୋଧ ମଧ୍ୟରେ ବଡ଼ ଖାମି ସାମ୍ନାକୁ ଆସିଛି। Donald Trumpଙ୍କ ନିର୍ଦ୍ଦେଶରେ ଆମେରିକୀୟ ନୌସେନା ଇରାନ ସଂପୃକ୍ତ ଜାହାଜ ଯାତାୟାତକୁ ରୋକିବାକୁ ଅଭିଯାନ ଆରମ୍ଭ କରିଥିଲେ ମଧ୍ୟ, ବାସ୍ତବରେ ଅନେକ ଜାହାଜ ନିଷେଧାଜ୍ଞାକୁ ଉଲ୍ଲଂଘନ କରି ପାର ହୋଇଯାଇଛି।
ସାଟେଲାଇଟ୍ ଓ ସାମୁଦ୍ରିକ ଟ୍ରାକିଂ ତଥ୍ୟ ଅନୁଯାୟୀ, ଗୋଟିଏ କି ଦୁଇଟି ନୁହେଁ, କମ୍ରେ କମ୍ ପାଞ୍ଚଟି କଳାତାଲିକାଭୁକ୍ତ ଜାହାଜ ହର୍ମୁଜ୍ ପ୍ରଣାଳୀ ପାର କରିଛି। ଏହାରେ ଆମେରିକା ଦ୍ୱାରା ପୂର୍ବରୁ ନିଷିଦ୍ଧ କରାଯାଇଥିବା ତିନୋଟି ଟ୍ୟାଙ୍କର୍ ମଧ୍ୟ ଅନ୍ତର୍ଭୁକ୍ତ ଥିବା କୁହାଯାଉଛି।
Reuters ରିପୋର୍ଟ ଅନୁଯାୟୀ, କପଲର୍, ଏଲଏସଇଜି ଓ ମାରିନ୍ ଟ୍ରାଫିକ୍ ଭଳି ପ୍ଲାଟଫର୍ମର ତଥ୍ୟରେ ଦେଖାଯାଇଛି ଯେ, ଅବରୋଧ ସତ୍ତ୍ୱେ ଜାହାଜ ଯାତାୟାତ ସମ୍ପୂର୍ଣ୍ଣ ରୂପେ ବନ୍ଦ ହୋଇନାହିଁ। ପାନାମା ପତାକାଯୁକ୍ତ ‘ପିସ୍ ଗଲ୍ଫ’ ନାମକ ଟ୍ୟାଙ୍କର୍ ୟୁଏଇର ହମରିୟା ବନ୍ଦର ଦିଗରେ ଗତି କରୁଥିବା ଦେଖାଯାଇଛି।
ଏହା ସହିତ ‘ମୁରଲିଖଶାନ୍’, ‘ଏଲ୍ପିସ୍’ ଓ ‘ରିଚ୍ ଷ୍ଟାରି’ ଭଳି ଜାହାଜ ମଧ୍ୟ ବିନା ବାଧାରେ ପ୍ରଣାଳୀ ପାର କରିଥିବା ତଥ୍ୟ ମିଳିଛି। ବିଶେଷକରି ‘ରିଚ୍ ଷ୍ଟାରି’ ପ୍ରାୟ ୧.୫ ଲକ୍ଷ ବ୍ୟାରେଲ୍ ମିଥାନଲ୍ ବୋହିନେଉଥିଲା। ଏହି ସମସ୍ତ ଜାହାଜ ପୂର୍ବରୁ ଇରାନ ସହ ବାଣିଜ୍ୟ ନିମନ୍ତେ ଆମେରିକାର କଳା ତାଲିକାରେ ରହିଥିଲେ।
ଅନ୍ୟପଟେ, United States Central Command (ସେଣ୍ଟକମ୍) ଦାବି କରିଛି ଯେ, ଅବରୋଧକୁ କଡ଼ା ଭାବରେ ଲାଗୁ କରାଯାଉଛି। ୧୦ ହଜାରରୁ ଅଧିକ ସେନା, ଯୁଦ୍ଧଜାହାଜ ଓ ବିମାନ ସହଯୋଗରେ ଏହି ଅଭିଯାନ ଚାଲିଛି ବୋଲି ସେଣ୍ଟକମ୍ କହିଛି। ପ୍ରଥମ ୨୪ ଘଣ୍ଟାରେ କିଛି ଜାହାଜକୁ ପଛକୁ ଫେରାଇ ଦିଆଯାଇଥିବା ମଧ୍ୟ ଦାବି କରାଯାଇଛି।
ତଥାପି, ଏହି ଘଟଣାଗୁଡ଼ିକ ଆମେରିକାର ଅବରୋଧ ପ୍ରୟାସ ଉପରେ ପ୍ରଶ୍ନ ଉଠାଇଛି। ଅବରୋଧ ସତ୍ତ୍ୱେ ସାମୁଦ୍ରିକ ଯାତାୟାତ ଜାରି ରହିବାରୁ ବିଶ୍ୱ ତୈଳ ବଜାର ଓ ବାଣିଜ୍ୟ ମାର୍ଗ ଉପରେ ପ୍ରଭାବ ପଡ଼ିବା ନେଇ ଚିନ୍ତା ବୃଦ୍ଧି ପାଇଛି।