ଚେନ୍ନାଇ: ତାମିଲ ସୁପରଷ୍ଟାର ଜୋସେଫ ବିଜୟଙ୍କ ରାଜନୈତିକ ଦଳ ‘ତାମିଲଗା ଭେଟ୍ରି କାଝାଗମ’ (ଟିଭିକେ)ର ଜଣେ ସକ୍ରିୟ କର୍ମୀଙ୍କୁ ୧୦ ବର୍ଷୀୟା ନାବାଳିକାଙ୍କୁ ଯୌନ ନିର୍ଯାତନା ଦେଇଥିବା ଅଭିଯୋଗରେ ଚେନ୍ନାଇ ପୋଲିସ ଗିରଫ କରିଛି। ଅଭିଯୁକ୍ତଙ୍କ ପରିଚୟ ଦିନେଶ ଓରଫ ‘ପାମ୍ବୁ’ ଦିନେଶ (୪୩) ଭାବେ ହୋଇଥିବାବେଳେ ଘଟଣାଟି ସ୍ଥାନୀୟ ଅଞ୍ଚଳରେ ତୀବ୍ର ଚର୍ଚ୍ଚାର ବିଷୟ ପାଲଟିଛି।
ପୋଲିସ ସୂଚନା ଅନୁଯାୟୀ, ପୀଡ଼ିତା ନାବାଳିକା ଜଣକ ମାଇଲାପୋରର ବାସିନ୍ଦା। ସେ କାସିମେଡୁ ସିଙ୍ଗାରାଭେଲାନ ନଗରରେ ଥିବା ନିଜ ସମ୍ପର୍କୀୟଙ୍କ ଘରକୁ ବୁଲିବାକୁ ଯାଇଥିବା ବେଳେ ଏହି ଘଟଣା ଘଟିଥିଲା। ଝିଅଟି ବାହାରେ ଖେଳୁଥିବା ସମୟରେ ଅଭିଯୁକ୍ତ ତାଙ୍କୁ ନିଜ ଘରକୁ ଡାକି ନେଇ ନିର୍ଯାତନା ଦେଇଥିବା ଅଭିଯୋଗ ହୋଇଛି।
ଅଭିଯୋଗ ଅନୁସାରେ, ଘଟଣା ବିଷୟରେ କାହାକୁ କହିଲେ ଜୀବନରୁ ମାରିଦେବାକୁ ମଧ୍ୟ ଅଭିଯୁକ୍ତ ଧମକ ଦେଇଥିଲେ। ପରେ ନାବାଳିକା ଜଣକ ନିଜ ମାଉସୀଙ୍କୁ ସମସ୍ତ ଘଟଣା ଜଣାଇଥିଲେ। ଏହାପରେ ଗତ ମେ’ ୩ ତାରିଖରେ କାସିମେଡୁ ପୋଲିସ ଷ୍ଟେସନରେ ଏନେଇ ଅଭିଯୋଗ ଦାୟର ହୋଇଥିଲା।
ମାମଲାଟି ନାବାଳିକାଙ୍କ ସହ ଜଡ଼ିତ ଥିବାରୁ ପୋଲିସ ତୁରନ୍ତ ପୋକ୍ସୋ ଆଇନ ଅନୁଯାୟୀ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା। ପରେ ମାମଲାର ତଦନ୍ତ ଭାର ରାୟପୁରମ ଅଲ୍ ଓମେନ୍ ପୋଲିସ ଷ୍ଟେସନକୁ ହସ୍ତାନ୍ତର କରାଯାଇଥିଲା।
ପୋଲିସ ସୂଚନା ଅନୁଯାୟୀ, ଭୋଟ ଗଣନା ଦିନ ମେ’ ୪ ତାରିଖରେ ଅଭିଯୁକ୍ତ ଆର.କେ. ନଗରର ଏକ ଗଣନା କେନ୍ଦ୍ରରେ ଦଳୀୟ ପ୍ରାର୍ଥୀଙ୍କ ସମର୍ଥନରେ ଉପସ୍ଥିତ ଥିଲେ। ସେଠାରେ ତାଙ୍କୁ ଧରିବା ଚେଷ୍ଟା ବିଫଳ ହେବା ପରେ ପୋଲିସ ଟ୍ରାକିଂ କରି ସେହି ରାତିରେ ତାଙ୍କୁ ଗିରଫ କରିଥିଲା।
ଅଭିଯୁକ୍ତଙ୍କୁ ପରେ କୋର୍ଟରେ ହାଜର କରାଯାଇ ବିଚାର ବିଭାଗୀୟ ହାଜତକୁ ପଠାଯାଇଛି। ପୋଲିସ ଘଟଣାର ଅଧିକ ତଦନ୍ତ ସହ ପ୍ରମାଣ ସଂଗ୍ରହ କାମ ଜାରି ରଖିଛି।