ଅଭିଷେକ ବାନାର୍ଜୀଙ୍କ ସୁରକ୍ଷା ଛାଣ୍ଟୁଛନ୍ତି ନୂଆ ସରକାର: ପ୍ରତ୍ୟାହାର ହେଲା ‘ଜେଡ୍ ପ୍ଲସ୍’ ସୁରକ୍ଷା ଓ ପାଇଲଟ୍ କାର୍

କୋଲକାତା: ପଶ୍ଚିମବଙ୍ଗରେ ସରକାର ପରିବର୍ତ୍ତନ ହେବା ପରେ ଏବେ ତୃଣମୂଳ କଂଗ୍ରେସ (TMC) ନେତାଙ୍କ ଅଡୁଆ ବଢ଼ିବାରେ ଲାଗିଛି। ମୁଖ୍ୟମନ୍ତ୍ରୀ ଶୁଭେନ୍ଦୁ ଅଧିକାରୀଙ୍କ ନେତୃତ୍ୱାଧୀନ ନୂତନ ବିଜେପି ସରକାର ଟିଏମସି ସାଧାରଣ ସମ୍ପାଦକ ତଥା ସାଂସଦ ଅଭିଷେକ ବାନାର୍ଜୀଙ୍କ ସୁରକ୍ଷା ବ୍ୟବସ୍ଥାରେ ବଡ଼ କାଟ୍ କରିଛନ୍ତି। ଅଭିଷେକଙ୍କୁ ମିଳୁଥିବା ସମ୍ମାନଜନକ ‘ଜେଡ୍ ପ୍ଲସ୍’ (Z+) ସୁରକ୍ଷାକୁ ସମ୍ପୂର୍ଣ୍ଣ ପ୍ରତ୍ୟାହାର କରିବାକୁ ରାଜ୍ୟ ସରକାର ନିଷ୍ପତ୍ତି ନେଇଛନ୍ତି।

ମୁଖ୍ୟମନ୍ତ୍ରୀ ଶୁଭେନ୍ଦୁ ଅଧିକାରୀଙ୍କ ସୂଚନା ଅନୁଯାୟୀ, ଅଭିଷେକ ବାନାର୍ଜୀଙ୍କୁ ମିଳୁଥିବା ଅତିରିକ୍ତ ସୁରକ୍ଷା କର୍ମୀ ଏବଂ ସ୍ୱତନ୍ତ୍ର ପାଇଲଟ୍ କାର୍ ସୁବିଧାକୁ ଉଚ୍ଛେଦ କରାଯାଇଛି। ଗତ ୧୦ ବର୍ଷରୁ ଅଧିକ ସମୟ ଧରି ସେ ଏହି ସୁରକ୍ଷା ପାଉଥିଲେ।ତାଙ୍କ ବାସଭବନ ଏବଂ କାର୍ଯ୍ୟାଳୟ ବାହାରେ ଥିବା ପୋଲିସ୍ କ୍ୟାମ୍ପ ଓ ବ୍ୟାରିକେଡ୍‌କୁ ହଟାଇ ଦିଆଯାଇଛି। ପୂର୍ବରୁ ତାଙ୍କୁ ମିଳୁଥିବା ଭିଭିଆଇପି (VVIP) ପାଇଲଟ୍ କାର୍ ବ୍ୟବସ୍ଥା ମଧ୍ୟ ବନ୍ଦ ହୋଇଛି।

୨୦୨୬ ନିର୍ବାଚନରେ ପଶ୍ଚିମବଙ୍ଗରେ କ୍ଷମତା ପରିବର୍ତ୍ତନ ହେବା ପରେ ନୂଆ ସରକାର ଭିଆଇପି ସୁରକ୍ଷାର ସମୀକ୍ଷା କରିଥିଲେ। ଅନାବଶ୍ୟକ ସୁରକ୍ଷା ବୋଝ କମାଇବା ପାଇଁ ଏହି ପଦକ୍ଷେପ ନିଆଯାଇଥିବା ସରକାରଙ୍କ ପକ୍ଷରୁ କୁହାଯାଉଛି। ତେବେ ରାଜନୈତିକ ମହଲରେ ଏହାକୁ ନେଇ ଚର୍ଚ୍ଚା ଜୋର ଧରିଛି।

ଟିଏମସି ଶିବିରରେ ଏହି ନିଷ୍ପତ୍ତିକୁ ନେଇ ଅସନ୍ତୋଷ ଦେଖାଦେଇଥିବା ବେଳେ, ଅଭିଷେକଙ୍କ ବାସଭବନ ‘ଶାନ୍ତିନିକେତନ’ ବାହାରେ ଥିବା କଡ଼ା ସୁରକ୍ଷା ବଳୟ ଏବେ ହ୍ରାସ ପାଇଥିବା ଦେଖିବାକୁ ମିଳିଛି। ରାଜ୍ୟ ପୋଲିସ ମଧ୍ୟ ଅତିରିକ୍ତ ସୁରକ୍ଷା କର୍ମୀଙ୍କୁ ଅନ୍ୟାନ୍ୟ ଆଇନଶୃଙ୍ଖଳା ରକ୍ଷା କାର୍ଯ୍ୟରେ ନିୟୋଜିତ କରିବାକୁ ନିର୍ଦ୍ଦେଶ ଦେଇଛି।