ଆବୁଧାବି: ଆମେରିକା ଓ ଇରାନ ମଧ୍ୟରେ ମଧ୍ୟପ୍ରାଚ୍ୟରେ ବଢ଼ୁଥିବା ସଂଘର୍ଷ ପ୍ରଭାବରେ ବିଶ୍ୱର ଗୁରୁତ୍ୱପୂର୍ଣ୍ଣ ତୈଳ ଯୋଗାଣ ମାର୍ଗ ହର୍ମୁଜ ପ୍ରଣାଳୀ ଚାପରେ ରହିଥିଲେ ମଧ୍ୟ ଉପସାଗରୀୟ ଦେଶମାନେ ତୈଳ ଓ ଗ୍ୟାସ ପରିବହନ ଜାରି ରଖିଛନ୍ତି। ବିଶେଷ କରି United Arab Emirates ଓ Qatar ପରି ତୈଳ ସମୃଦ୍ଧ ଦେଶମାନେ ବିକଳ୍ପ ଏବଂ ଗୁପ୍ତ ପରିବହନ ପଦ୍ଧତି ଅପନାଇ ରପ୍ତାନିକୁ ଅବ୍ୟାହତ ରଖିଛନ୍ତି।
Abu Dhabi National Oil Company ହର୍ମୁଜ ପ୍ରଣାଳୀ ମାଧ୍ୟମରେ ‘ଡାର୍କ ଟ୍ରାଞ୍ଜିଟ୍’ କୌଶଳ ଅପନାଇ ତୈଳ ପରିବହନ କରୁଥିବା ସୂଚନା ମିଳିଛି। ବ୍ଲୁମବର୍ଗ ରିପୋର୍ଟ ଅନୁଯାୟୀ, ଏହି ପଦ୍ଧତିରେ ଜାହାଜଗୁଡ଼ିକ ଯାତ୍ରା ସମୟରେ ନିଜର ଟ୍ରାନ୍ସପଣ୍ଡର ବନ୍ଦ କରିଦେଇଥାନ୍ତି, ଯାହା ଫଳରେ ସେମାନଙ୍କ ଗତିବିଧିକୁ ରିୟଲ ଟାଇମରେ ଟ୍ରାକ୍ କରିବା କଷ୍ଟକର ହୋଇପଡ଼େ।
ହର୍ମୁଜରେ ବଢ଼ୁଛି ସୁରକ୍ଷା ଚାପ
ହର୍ମୁଜ ପ୍ରଣାଳୀ ବର୍ତ୍ତମାନ ଇରାନୀ ସେନା ଓ ଆମେରିକୀୟ ନୌସେନା ପାଟ୍ରୋଲିଂ ଯୋଗୁଁ ଅତ୍ୟଧିକ ସମ୍ବେଦନଶୀଳ ଅଞ୍ଚଳରେ ପରିଣତ ହୋଇଛି। ତଥାପି Abu Dhabi National Oil Company ନିଜ ନିୟନ୍ତ୍ରିତ ଜାହାଜ ଓ ନାଭିଗ୍୮ ମାଧ୍ୟମରେ ପରିଚାଳିତ ଟ୍ୟାଙ୍କର ଦ୍ୱାରା ତୈଳ ପରିବହନ ଜାରି ରଖିଛି।
ରିପୋର୍ଟ ଅନୁସାରେ, ଟ୍ୟାଙ୍କରଗୁଡ଼ିକ ଫୁଜାଇରାହ ନିକଟରେ ହର୍ମୁଜ ପ୍ରଣାଳୀକୁ ପ୍ରବେଶ କରିବା ପୂର୍ବରୁ ଟ୍ରାକିଂ ସିଷ୍ଟମ୍ ବନ୍ଦ କରିଦେଇଥାନ୍ତି। ଏହା ପରେ ସେମାନେ ଉପସାଗର ଭିତରେ ଥିବା ଡାସ୍ ଦ୍ୱୀପ ପରି ରପ୍ତାନି କେନ୍ଦ୍ରକୁ ଗତି କରୁଥାନ୍ତି।
କତରର ଏଲଏନଜି ରପ୍ତାନି ମଧ୍ୟ ଜାରି
Qatar ମଧ୍ୟ ଏହି ପରି ଗୁପ୍ତ ପରିବହନ କୌଶଳ ଅପନାଇ ଏଲଏନଜି ରପ୍ତାନି ଜାରି ରଖିଛି। ସାଟେଲାଇଟ ଚିତ୍ର ଦ୍ୱାରା ମଧ୍ୟ ଜାହାଜମାନଙ୍କ ସଠିକ ଗତିବିଧି ଚିହ୍ନଟ କରିବା କଷ୍ଟସାଧ୍ୟ ହେଉଥିବା କୁହାଯାଇଛି।
ବିଶ୍ଳେଷକମାନଙ୍କ ମତରେ, ଭୂରାଜନୈତିକ ଅସ୍ଥିରତା ଓ ସଂରକ୍ଷଣ ସମସ୍ୟା ଯୋଗୁଁ ଉତ୍ପାଦକ ଦେଶମାନେ ଯେକୌଣସି ପରିସ୍ଥିତିରେ ରପ୍ତାନିକୁ ଚାଲୁ ରଖିବାକୁ ବାଧ୍ୟ ହେଉଛନ୍ତି। ଏହି ‘ଡାର୍କ ଟ୍ରାଞ୍ଜିଟ୍’ ପଦ୍ଧତି ତାହାର ଏକ ରଣନୈତିକ ଉଦାହରଣ ବୋଲି ସେମାନେ କହିଛନ୍ତି।