ଦିଲ୍ଲୀ ଗସ୍ତରେ ତାମିଲନାଡୁ ମୁଖ୍ୟମନ୍ତ୍ରୀ ଜୋସେଫ୍ ସି. ବିଜୟ; ପ୍ରଧାନମନ୍ତ୍ରୀ ମୋଦୀ ଓ ଅର୍ଥମନ୍ତ୍ରୀଙ୍କୁ ଭେଟିବାର ସମ୍ଭାବନା

ନୂଆଦିଲ୍ଲୀ: ତାମିଲନାଡୁ ମୁଖ୍ୟମନ୍ତ୍ରୀ ଜୋସେଫ୍ ସି. ବିଜୟ ବୁଧବାର ଦିନ ନୂଆଦିଲ୍ଲୀ ଗସ୍ତ କରୁଛନ୍ତି। ମୁଖ୍ୟମନ୍ତ୍ରୀ ଭାବେ ଦାୟିତ୍ୱ ଗ୍ରହଣ କରିବା ପରେ ଦେଶର ରାଜଧାନୀକୁ ଏହା ତାଙ୍କର ପ୍ରଥମ ସରକାରୀ ଗସ୍ତ।ଏହି ଗସ୍ତ କାଳରେ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରାମନଙ୍କୁ ଭେଟିବାର ସମ୍ଭାବନା ରହିଛି।

ତାମିଲନାଡୁ ପାଇଁ ଅଧିକ ଆର୍ଥିକ ସହାୟତା ଏବଂ କେତେକ ଗୁରୁତ୍ୱପୂର୍ଣ୍ଣ ଭିତ୍ତିଭୂମି ଓ ବିକାଶମୂଳକ ପ୍ରକଳ୍ପର ଶୀଘ୍ର ମଞ୍ଜୁରୀ ପାଇଁ ସେ ଏକ ସ୍ମାରକପତ୍ର ପ୍ରଦାନ କରିପାରନ୍ତି।ସୂତ୍ର ଅନୁସାରେ, ବିଜୟ ବୁଧବାର ଦିନ ଦିଲ୍ଲୀ ଅଭିମୁଖେ ବାହାରି ସେହିଦିନ ହିଁ ଚେନ୍ନାଇ ଫେରିଯିବାର କାର୍ଯ୍ୟକ୍ରମ ରହିଛି।ତାମିଲନାଡୁର ଅର୍ଥନୈତିକ ବିକାଶ ପାଇଁ ଗୁରୁତ୍ୱପୂର୍ଣ୍ଣ ବିବେଚନା କରାଯାଉଥିବା ଭିତ୍ତିଭୂମି ସମ୍ପ୍ରସାରଣ, ବାକି ଥିବା ଆର୍ଥିକ ଅନୁଦାନ, ଶିଳ୍ପ ବିକାଶ ପ୍ରତିଶ୍ରୁତି, ଜନକଲ୍ୟାଣକାରୀ ଯୋଜନା ଏବଂ ପ୍ରମୁଖ ଯୋଗାଯୋଗ ପ୍ରକଳ୍ପଗୁଡ଼ିକ ପାଇଁ କେନ୍ଦ୍ର ସରକାରଙ୍କ ବଡ଼ ସହଯୋଗ ଲୋଡ଼ିବାକୁ ମୁଖ୍ୟମନ୍ତ୍ରୀ ଯୋଜନା କରିଛନ୍ତି।

ତାମିଲନାଡୁର ନିକଟତମ ରାଜନୈତିକ ଇତିହାସରେ ବିଜୟ ଏବଂ ତାଙ୍କ ଦଳ ‘ତାମିଲଗା ଭେଟ୍ରି କାଜାଗାମ’ (TVK) ଏକ ଚମତ୍କାର ନିର୍ବାଚନୀ ସଫଳତା ହାସଲ କରିବାର ମାତ୍ର କେଇ ସପ୍ତାହ ପରେ ଏହି ଗସ୍ତ ହେଉଥିବାରୁ, ଏହାର ଅନେକ ରାଜନୈତିକ ମହତ୍ତ୍ୱ ରହିଛି।ନିଜର ପ୍ରଥମ ବିଧାନସଭା ନିର୍ବାଚନ ଲଢ଼ି ଟିଭିକେ (TVK) ୨୩୪ ଆସନ ବିଶିଷ୍ଟ ବିଧାନସଭାରେ ୧୦୮ଟି ସିଟ୍ ଜିତି ସବୁଠାରୁ ବଡ଼ ଦଳ ଭାବେ ଉଭା ହୋଇଛି, ଯାହା ଦ୍ରାବିଡ଼ ଦଳଗୁଡ଼ିକର ଦୀର୍ଘ ଦିନର ରାଜନୈତିକ ଦପ୍‌ଦପାକୁ ଶେଷ କରିଛି।

ତେବେ ସବୁଠାରୁ ବଡ଼ ଦଳ ହୋଇଥିଲେ ମଧ୍ୟ ଏହା ବହୁମତ ପାଇଁ ଆବଶ୍ୟକ ୧୧୮ଟି ଆସନରୁ ସାମାନ୍ୟ ପଛରେ ରହିଯାଇଥିଲା, ଯାହାଫଳରେ ନିର୍ବାଚନ ପରେ ରାଜ୍ୟରେ ତୀବ୍ର ରାଜନୈତିକ ହଲଚଲ ଦେଖାଦେଇଥିଲା।ଏହାପରେ ବିଜୟ କଂଗ୍ରେସ, ବାମପନ୍ଥୀ ଦଳ, ଇଣ୍ଡିଆନ ୟୁନିଅନ ମୁସଲିମ ଲିଗ୍ (IUML) ଏବଂ ବିଦୁଥାଲାଇ ଚିରୁଥାଇଗାଲ କାଚି (VCK) ସମେତ ଅନେକ ଦଳର ସମର୍ଥନ ହାସଲ କରିବାରେ ସଫଳ ହୋଇଥିଲେ। ଏହା ତାଙ୍କୁ ଆବଶ୍ୟକ ସଂଖ୍ୟା ଗରିଷ୍ଠତା ପ୍ରଦାନ କରିବା ସହ ରାଜ୍ୟରେ ଏକ ମେଣ୍ଟ ସରକାର (Coalition Government) ଗଠନ କରିବା ପାଇଁ ବାଟ ସଫା କରିଥିଲା।

ତାମିଲନାଡୁ ଗତ କେଇ ଦଶନ୍ଧି ମଧ୍ୟରେ ଏଭଳି ମେଣ୍ଟ ସରକାର ଦେଖି ନଥିଲା।ଏହି ସଫଳତା ରାଜ୍ୟର ପାରମ୍ପରିକ ରାଜନୈତିକ ଢାଞ୍ଚାରେ ଏକ ବଡ଼ ପରିବର୍ତ୍ତନ ଆଣିଛି, ଯାହା ଦୀର୍ଘ ଦିନ ଧରି ଡିଏମକେ (DMK) କିମ୍ବା ଏଆଇଏଡିଏମକେ (AIADMK) ଭଳି ଏକକ ସଂଖ୍ୟାଗରିଷ୍ଠ ଦଳ କିମ୍ବା ସେମାନଙ୍କ ନେତୃତ୍ୱାଧୀନ ମେଣ୍ଟ ଦ୍ୱାରା ପରିଚାଳିତ ହୋଇଆସୁଥିଲା।