ତାତିରୁ ସାମୟିକ ମୁକ୍ତି! ରାଜ୍ୟରେ ଆହୁରି ୨ ରୁ ୪ ଡିଗ୍ରୀ କମିବ ତାପମାତ୍ରା, ମାତ୍ର ୪୮ ଘଣ୍ଟା ପରେ ପୁଣି ଫେରିବ ପ୍ରକୋପ

ଭୁବନେଶ୍ବର: ଓଡ଼ିଶାରେ କାଳବୈଶାଖୀ ପ୍ରଭାବରେ ପ୍ରଚଣ୍ଡ ଗ୍ରୀଷ୍ମ ପ୍ରବାହରୁ ସାମାନ୍ୟ ଆଶ୍ୱସ୍ତି ମିଳିଛି। ରାଜ୍ୟର ବିଭିନ୍ନ ଅଞ୍ଚଳରେ ଝଡ଼ବର୍ଷା, ପବନ ଏବଂ ବଜ୍ରପାତ ଯୋଗୁଁ ପାଣିପାଗରେ ପରିବର୍ତ୍ତନ ଆସିବା ସହ ତାପମାତ୍ରା ହ୍ରାସ ପାଇଛି।ଆଞ୍ଚଳିକ ପାଣିପାଗ କେନ୍ଦ୍ରର ସୂଚନା ଅନୁଯାୟୀ, ଆସନ୍ତା ୨୪ ଘଣ୍ଟା ମଧ୍ୟରେ ରାଜ୍ୟର ଅନେକ ସ୍ଥାନରେ ଦିନର ତାପମାତ୍ରା ଆହୁରି ୨ ରୁ ୪ ଡିଗ୍ରୀ ସେଲସିୟସ୍ ପର୍ଯ୍ୟନ୍ତ କମିପାରେ। ମାତ୍ର ଏହି ଆଶ୍ୱସ୍ତି ସ୍ଥାୟୀ ହେବନାହିଁ, କାରଣ ୨ ଦିନ ପରେ ପୁଣିଥରେ ପାରଦ ଉପରକୁ ଚଢ଼ିବ ବୋଲି ପୂର୍ବାନୁମାନ କରାଯାଇଛି।

ରାଜ୍ୟରେ କାଳବୈଶାଖୀ ସକ୍ରିୟ ହେବା ଫଳରେ ଗତ କିଛି ଦିନରୁ ଜାରି ରହିଥିବା ଗୁଳୁଗୁଳି ଓ ପ୍ରଖର ସୂର୍ଯ୍ୟକିରଣରୁ ଲୋକଙ୍କୁ ତ୍ରାହି ମିଳିଛି। ଆକାଶ ମେଘାଚ୍ଛନ୍ନ ରହିବା ସହ ପବନ ଓ ବର୍ଷା ଯୋଗୁଁ ଅଧିକାଂଶ ଜିଲ୍ଲାରେ ଦିନର ସର୍ବୋଚ୍ଚ ତାପମାତ୍ରା କମିଛି। ଭାରତୀୟ ପାଣିପାଗ ବିଭାଗ (IMD) ଦର୍ଶାଇଛି ଯେ ଆଗକୁ ମଧ୍ୟ କିଛି ଅଞ୍ଚଳରେ ଝଡ଼ବର୍ଷା ଜାରି ରହିବା ପାଇଁ ପାଗ ଅନୁକୂଳ ରହିଛି।

ଗତ ଶନିବାର ସନ୍ଧ୍ୟା ପ୍ରାୟ ୮ଟା ବେଳେ ସମ୍ବଲପୁର ଏବଂ ଏହାର ଆଖପାଖ ଅଞ୍ଚଳରେ କାଳବୈଶାଖୀର ଭୀଷଣ ରୂପ ଦେଖିବାକୁ ମିଳିଥିଲା। ପ୍ରବଳ ପବନ ସହ ବର୍ଷା ଯୋଗୁଁ ସହରବାସୀ ଆଶ୍ୱସ୍ତି ପାଇଥିଲେ ମଧ୍ୟ ଏକ ବଡ଼ ଧୂଳିଝଡ଼ ହେବା ହେତୁ ଦୃଶ୍ୟମାନତା ହ୍ରାସ ପାଇଥିଲା ଏବଂ କିଛି ସମୟ ପାଇଁ ଜନଜୀବନ ବାଧାପ୍ରାପ୍ତ ହୋଇଥିଲା।

ରାଜଧାନୀ ଭୁବନେଶ୍ୱର ଏବଂ କଟକ ସମେତ ଆଖପାଖ ଅଞ୍ଚଳରେ ଆଜି ଦିନସାରା ଆକାଶ ଆଂଶିକରୁ ପୂର୍ଣ୍ଣ ମେଘାଚ୍ଛନ୍ନ ରହିବ। ଅପରାହ୍ନ କିମ୍ବା ସନ୍ଧ୍ୟା ସମୟରେ ଘଡ଼ଘଡ଼ି, ବିଜୁଳି ସହ ବର୍ଷା ଏବଂ ପ୍ରବଳ ବେଗରେ ପବନ ବହିବାର ସମ୍ଭାବନା ରହିଛି। ହଠାତ୍ ପାଗରେ ପରିବର୍ତ୍ତନ ହେବା ସମୟରେ ବଜ୍ରପାତରୁ ରକ୍ଷା ପାଇବା ପାଇଁ ସୁରକ୍ଷିତ ସ୍ଥାନରେ ରହିବାକୁ ଏବଂ ଖୋଲା ପଡ଼ିଆକୁ ନଯିବାକୁ ପାଣିପାଗ ବିଶେଷଜ୍ଞମାନେ ପରାମର୍ଶ ଦେଇଛନ୍ତି।

ଆସନ୍ତା କିଛି ଦିନ ପର୍ଯ୍ୟନ୍ତ ଓଡ଼ିଶାର ବିଭିନ୍ନ ଜିଲ୍ଲାରେ କାଳବୈଶାଖୀ ଜନିତ ବର୍ଷା ଓ ପବନ ଜାରି ରହିବ। ବାୟୁମଣ୍ଡଳରେ ଆଦ୍ରତା ଏବଂ ଅସ୍ଥିରତା ଯୋଗୁଁ ସ୍ଥାନେ ସ୍ଥାନେ ପ୍ରବଳ ବର୍ଷା ସହ ବଜ୍ରପାତ ହେବାର ଆଶଙ୍କା ରହିଛି।ତେବେ ୪୮ ଘଣ୍ଟା ପରେ କାଳବୈଶାଖୀର ପ୍ରଭାବ ଧୀରେ ଧୀରେ କମିବା ସହିତ ତାପମାତ୍ରା ପୁଣି ୨ ରୁ ୩ ଡିଗ୍ରୀ ସେଲସିୟସ୍‌ ପର୍ଯ୍ୟନ୍ତ ବୃଦ୍ଧି ପାଇବ। ପାଣିପାଗ ବିଭାଗ ପକ୍ଷରୁ ସମସ୍ତଙ୍କୁ ସତର୍କ ରହିବା ସହ ନିୟମିତ ଭାବେ ପାଗ ସମ୍ପର୍କିତ ଅପଡେଟ୍‌ ଉପରେ ନଜର ରଖିବାକୁ କୁହାଯାଇଛି।