ଭୋପାଳ: ଅଭିନେତ୍ରୀ ତ୍ବିଷା ଶର୍ମାଙ୍କ ରହସ୍ୟଜନକ ମୃତ୍ୟୁ ମାମଲାର ତଦନ୍ତକୁ ଆଗକୁ ବଢ଼ାଇ କେନ୍ଦ୍ରୀୟ ତଦନ୍ତ ବ୍ୟୁରୋ (ସିବିଆଇ) ସୋମବାର ଘଟଣାସ୍ଥଳରେ ସିନ୍ ରିକ୍ରିଏସନ୍ (ଘଟଣା ପୁନର୍ନିର୍ମାଣ) କରିଛି। ତଦନ୍ତ ସମୟରେ ଫୋରେନସିକ୍ ଓ କ୍ରାଇମ୍ ସିନ୍ ବିଶେଷଜ୍ଞଙ୍କ ସହାୟତାରେ ମୃତକଙ୍କ ସମାନ ଓଜନର ଏକ ଡମି ବ୍ୟବହାର କରାଯାଇଥିଲା।
ସୂଚନା ଅନୁଯାୟୀ, ଗତ ମେ ୧୨ ତାରିଖରେ ଭୋପାଳସ୍ଥିତ ଶ୍ୱଶୁରଘରରୁ ତ୍ବିଷା ଶର୍ମାଙ୍କୁ ଝୁଲନ୍ତା ଅବସ୍ଥାରେ ଉଦ୍ଧାର କରାଯାଇଥିଲା। ଏହି ଘଟଣାକୁ କେନ୍ଦ୍ର କରି ସନ୍ଦେହ ବଢ଼ିବା ପରେ ସିବିଆଇ ମାମଲାର ତଦନ୍ତ କରୁଛି। ମାମଲାରେ ତ୍ବିଷାଙ୍କ ସ୍ୱାମୀ ସମର୍ଥ ସିଂହ ଓ ଶାଶୁ ଗିରିବାଳା ସିଂହଙ୍କୁ ପୂର୍ବରୁ ଗିରଫ କରାଯାଇଛି।
ତଦନ୍ତ ଅଧୀନରେ ସିବିଆଇ ସମର୍ଥ ସିଂହ ଓ ତାଙ୍କ ମା’ଙ୍କୁ ଘଟଣାଦିନ ରାତିରେ କ’ଣ ଘଟିଥିଲା, ତାହା ପଦକ୍ଷେପ ଭିତ୍ତିକ ଭାବରେ ବର୍ଣ୍ଣନା କରିବାକୁ କହିଥିଲା। ତ୍ବିଷାଙ୍କୁ କିପରି ତଳକୁ ଅଣାଯାଇଥିଲା ଓ ପରବର୍ତ୍ତୀ ସମୟରେ କ’ଣ ପଦକ୍ଷେପ ନିଆଯାଇଥିଲା, ସେ ସମ୍ପର୍କରେ ସବିଶେଷ ତଥ୍ୟ ସଂଗ୍ରହ କରାଯାଇଛି।
ଏତଲା ଅନୁସାରେ, ମେ ୧୨ ରାତି ପ୍ରାୟ ୧୦ଟା ୨୦ ମିନିଟ୍ରେ ଘଟଣା ଘଟିଥିବା ପରେ ତ୍ବିଷାଙ୍କୁ ଭୋପାଳ ଏମ୍ସକୁ ନିଆଯାଇଥିଲା। ପରେ ଏମ୍ସ ପକ୍ଷରୁ ପୁଲିସକୁ ସୂଚନା ଦିଆଯାଇଥିଲା ଯେ, ହସ୍ପିଟାଲରେ ପହଞ୍ଚିବା ପୂର୍ବରୁ ତାଙ୍କର ମୃତ୍ୟୁ ହୋଇସାରିଥିଲା।
ଏହି ମାମଲାରେ ସିବିଆଇ ଏବେ ଫୋରେନସିକ୍ ପ୍ରମାଣ, ଘଟଣାସ୍ଥଳର ପୁନର୍ନିର୍ମାଣ ଓ ସଂଗ୍ରହ କରାଯାଇଥିବା ବୟାନ ଆଧାରରେ ପରବର୍ତ୍ତୀ ତଦନ୍ତ ଜାରି ରଖିଛି।