ରାୟଗଡ଼ା: ରାୟଗଡ଼ା ଜିଆରପି (ରେଳବାଇ ପୋଲିସ) ଷ୍ଟେସନରେ ଏକ ବଡ଼ ସଫଳତା ମିଳିଛି। ରାଉରକେଲା-ରାୟଗଡ଼ା ଇଣ୍ଟରସିଟି ଏକ୍ସପ୍ରେସ ଟ୍ରେନରୁ ୩ ଜଣ ନିଖୋଜ ଶିଶୁଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇଛି। ଶିଶୁମାନେ ସୁରକ୍ଷିତ ମିଳିବା ପରେ ସେମାନଙ୍କ ଚିନ୍ତିତ ପରିବାର ଲୋକେ ଆଶ୍ୱସ୍ତି ପ୍ରକାଶ କରିଛନ୍ତି।
ଉଦ୍ଧାର ହୋଇଥିବା ଶିଶୁମାନେ ହେଲେ ଗୁଡ୍ଡୁ ନାୟକ (୧୦), ସଞ୍ଜୟ କୁଲେସିକା (୮) ଏବଂ ପ୍ରୀତମ ଗରାଡା। ସେମାନେ ସମସ୍ତେ ରାୟଗଡ଼ା ଜିଲ୍ଲା ଟିକିରି ଥାନା ଅନ୍ତର୍ଗତ ଦଳିତ ସାହିର ବାସିନ୍ଦା ବୋଲି ଜଣାପଡ଼ିଛି। ସୂଚନା ଅନୁଯାୟୀ, ଏହି ପିଲାମାନେ ସମ୍ପର୍କୀୟଙ୍କ ଘରକୁ ବୁଲିଯିବାକୁ କହି ଘରୁ ବାହାରିଥିଲେ, ହେଲେ ଆଉ ଫେରିନଥିଲେ। ପରିବାର ଲୋକେ ସେମାନଙ୍କୁ ବହୁତ ଖୋଜାଖୋଜି କରିବା ପରେ କୌଣସି ସନ୍ଧାନ ନପାଇ ଶେଷରେ ଟିକିରି ଥାନାରେ ଏକ ନିଖୋଜ ମାମଲା ରୁଜୁ କରିଥିଲେ।
ମାମଲା ରୁଜୁ ହେବା ପରେ ଟିକିରି ପୋଲିସ ତୁରନ୍ତ ଆଖପାଖର ସମସ୍ତ ଥାନା ଓ ରେଳବାଇ ପୋଲିସକୁ ସତର୍କ କରାଇ ଦେଇଥିଲା। ଏହି ସମୟରେ ରାୟଗଡ଼ା ରେଳ ଷ୍ଟେସନରେ ଚାଲିଥିବା ନିୟମିତ ଯାଞ୍ଚ ସମୟରେ ଜିଆରପି କର୍ମଚାରୀମାନେ ୩ ଶିଶୁଙ୍କୁ ପ୍ଲାଟଫର୍ମରେ ଦେଖିବାକୁ ପାଇଥିଲେ ଏବଂ ସେମାନଙ୍କୁ ରାଉରକେଲା ଇଣ୍ଟରସିଟି ଏକ୍ସପ୍ରେସରୁ ସୁରକ୍ଷିତ ଉଦ୍ଧାର କରିଥିଲେ।
ପୋଲିସ ପଚରାଉଚରା ବେଳେ ପିଲାମାନେ ପ୍ରକାଶ କରିଛନ୍ତି ଯେ, ସେମାନେ କେବଳ ରାୟଗଡ଼ା ସହର ବୁଲିବା ପାଇଁ ଟ୍ରେନ ଚଢ଼ି ଏଠାକୁ ପଳାଇ ଆସିଥିଲେ। ଏହାପରେ ଶିଶୁ ମଙ୍ଗଳ ସମିତି (CWC)ର ସଦସ୍ୟମାନେ ଜିଆରପି ଥାନାରେ ପହଞ୍ଚି ନାବାଳକମାନଙ୍କର କାଉନସେଲିଂ (ପରାମର୍ଶ) କରିଥିଲେ। ଶେଷରେ ପୋଲିସ ସେମାନଙ୍କ ପରିବାରକୁ ଖବର ଦେଇଥିଲା ଏବଂ ପରିବାର ଲୋକେ ଥାନାରେ ପହଞ୍ଚି ପିଲାମାନଙ୍କୁ ନିଜ ସହ ଘରକୁ ନେଇଯାଇଛନ୍ତି।