ୱାଶିଂଟନ/ନୂଆଦିଲ୍ଲୀ: ପଶ୍ଚିମ ଏସିଆ ଅଞ୍ଚଳରେ ଭାରତୀୟ ନାବିକମାନଙ୍କୁ ନେଇ ଯାଉଥିବା ବାଣିଜ୍ୟିକ ଜାହାଜଗୁଡ଼ିକ ଉପରେ ହେଉଥିବା କ୍ରମାଗତ ଆକ୍ରମଣକୁ ନେଇ ଭାରତ କଡ଼ା ଆପତ୍ତି ପ୍ରକାଶ କରିଛି। ଏହି ସମ୍ବନ୍ଧରେ ଆମେରିକା ଗୁରୁବାର କହିଛି ଯେ, ନୂଆଦିଲ୍ଲୀରେ ଥିବା ଆମେରିକାର କାର୍ଯ୍ୟବାହୀ ଦୂତ ଜେସନ ମିକ୍ସଙ୍କୁ ଭାରତ ସମନ କରି ପ୍ରତିବାଦ ଜଣାଇବା ପରେ, ୱାଶିଂଟନ ଏବେ ଭାରତ ସରକାରଙ୍କ ସହ ସିଧାସଳଖ ଯୋଗାଯୋଗରେ ରହିଛି।ଆମେରିକା ବୈଦେଶିକ ମନ୍ତ୍ରଣାଳୟର ଜଣେ ଅଧିକାରୀ କହିଛନ୍ତି ଯେ, ସେମାନେ ଏହି ସମ୍ବେଦନଶୀଳ ପ୍ରସଙ୍ଗରେ ଭାରତ ସହିତ ନିରନ୍ତର ଆଲୋଚନା ଚଳାଇଛନ୍ତି। ସୂଚନାଯୋଗ୍ୟ ଯେ, ନିକଟରେ ଓମାନ ଉପକୂଳରେ ‘ସେଟେବେଲୋ’ ନାମକ ଏକ ବାଣିଜ୍ୟିକ ଜାହାଜ ଉପରେ ଆକ୍ରମଣ ହୋଇଥିଲା, ଯେଉଁଥିରେ ୩ ଜଣ ଭାରତୀୟ ନାଗରିକଙ୍କ ମୃତ୍ୟୁ ଘଟିଛି। ଏହାକୁ ନେଇ ଭାରତୀୟ ବୈଦେଶିକ ମନ୍ତ୍ରଣାଳୟ ଆମେରିକା ନିକଟରେ ନିଜର ଦୃଢ଼ ବିରୋଧ ସ୍ପଷ୍ଟ କରିଥିଲା।
ଭାରତୀୟ ବୈଦେଶିକ ମନ୍ତ୍ରଣାଳୟର ମୁଖପାତ୍ର ରଣଧୀର ଜୈସୱାଲ କହିଛନ୍ତି ଯେ, ପଶ୍ଚିମ ଏସିଆରେ ଚାଲିଥିବା ସଂଘର୍ଷ ଯୋଗୁଁ ବାଣିଜ୍ୟିକ ଜାହାଜଗୁଡ଼ିକ ଉପରେ ଆକ୍ରମଣ ହେଉଛି, ଯାହା ଅତ୍ୟନ୍ତ ଚିନ୍ତାଜନକ। ଏହି ଆକ୍ରମଣ ତୁରନ୍ତ ବନ୍ଦ ହେବା ଆବଶ୍ୟକ। ଭାରତ ନିଜ ନାବିକମାନଙ୍କ ସୁରକ୍ଷା ଓ କଲ୍ୟାଣକୁ ସର୍ବୋଚ୍ଚ ପ୍ରାଥମିକତା ଦିଏ। ଆନ୍ତର୍ଜାତୀୟ ନିୟମ ଅନୁଯାୟୀ, ‘ଷ୍ଟ୍ରେଟ୍ ଅଫ୍ ହରମୁଜ୍’ (Strait of Hormuz) ଦେଇ ଜାହାଜ ଚଳାଚଳ ସମ୍ପୂର୍ଣ୍ଣ ଅବାଧ ରହିବା ଉଚିତ। ଏହି ବିବାଦର ସମାଧାନ କେବଳ ଶାନ୍ତିପୂର୍ଣ୍ଣ ଆଲୋଚନା ଓ କୂଟନୀତି ମାଧ୍ୟମରେ ହିଁ ସମ୍ଭବ ବୋଲି ଭାରତ ପ୍ରକାଶ କରିଛି।
ବୈଦେଶିକ ମନ୍ତ୍ରଣାଳୟ ପକ୍ଷରୁ ସ୍ପଷ୍ଟ କରାଯାଇଛି ଯେ, ଆକ୍ରମଣର ଶିକାର ହୋଇଥିବା ତିନୋଟି ଜାହାଜ ହିଁ ବିଦେଶୀ ପତାକାଧାରୀ ଥିଲା, ସେଗୁଡ଼ିକ ଭାରତର ମାଲିକାନାରେ ନଥିଲା। ଏଥିମଧ୍ୟରୁ ଦୁଇଟି ପାଲାଉ ଏବଂ ଗୋଟିଏ ଗିନି ର ଜାହାଜ ଥିଲା। ବିଶ୍ୱର ସବୁଠାରୁ ଗୁରୁତ୍ୱପୂର୍ଣ୍ଣ ଏନର୍ଜି ଟ୍ରାଞ୍ଜିଟ୍ ରୁଟ୍ କୁହାଯାଉଥିବା ‘ଷ୍ଟ୍ରେଟ୍ ଅଫ୍ ହରମୁଜ୍’ ଅଞ୍ଚଳରେ ସାମରିକ ଗତିବିଧି ବଢ଼ୁଥିବାରୁ ଭାରତ ଏହାର ସାମୁଦ୍ରିକ ସୁରକ୍ଷାକୁ ନେଇ ଗମ୍ଭୀର ଅଛି, କାରଣ ବିଶ୍ୱର ବିଭିନ୍ନ ବାଣିଜ୍ୟିକ ଜାହାଜରେ ହଜାର ହଜାର ଭାରତୀୟ ନାବିକ କାର୍ଯ୍ୟରତ ଅଛନ୍ତି।