କଳାହାଣ୍ଡିରେ ପ୍ରଥମ ହାତୀ ସେବା ଓ ପୁନର୍ବାସ କେନ୍ଦ୍ର ଉଦ୍ଘାଟିତ: ବନ୍ୟପ୍ରାଣୀ ସଂରକ୍ଷଣ କ୍ଷେତ୍ରରେ ଓଡ଼ିଶାର ବଡ଼ ପଦକ୍ଷେପ
ଭବାନୀପାଟଣା: ବନ୍ୟପ୍ରାଣୀ ସଂରକ୍ଷଣ ଦିଗରେ ଓଡ଼ିଶା ସରକାର ଏକ ବଡ଼ ସଫଳତା ହାସଲ କରିଛନ୍ତି। ଶୁକ୍ରବାର ଦିନ କଳାହାଣ୍ଡି ଜିଲ୍ଲାର କୁତ୍ରୁଖାରୀଠାରେ ଏକ ସ୍ୱତନ୍ତ୍ର ହାତୀ ସେବା ଏବଂ ପୁନର୍ବାସ କେନ୍ଦ୍ର ଆନୁଷ୍ଠାନିକ ଭାବେ ଉଦ୍ଘାଟିତ ହୋଇଯାଇଛି। ବଣୁଆ ହାତୀମାନଙ୍କ ସୁରକ୍ଷା ଓ ଚିକିତ୍ସା ପାଇଁ ଏହା ଏକ ପ୍ରମୁଖ ମାଧ୍ୟମ ସାଜିବ। ପ୍ରାୟ ୭ ଏକର ପରିମିତ ଅଞ୍ଚଳରେ ବିସ୍ତୃତ ଏହି କେନ୍ଦ୍ରଟି ଦୁର୍ଦ୍ଦଶାରେ ଥିବା, ଆହତ କିମ୍ବା ମାନସିକ ଚାପ ଦେଇ ଗତି କରୁଥିବା ହାତୀମାନଙ୍କ ପାଇଁ ଏକ ଆଇସୋଲେସନ କ୍ୟାମ୍ପ ଭାବେ କାର୍ଯ୍ୟ କରିବ। ଏଠାରେ ସେମାନଙ୍କର ଉପଯୁକ୍ତ ଚିକିତ୍ସା କରାଯିବା ସହ ସେମାନେ ସୁସ୍ଥ ହେବା ପରେ ପୁନର୍ବାର ଜଙ୍ଗଲକୁ ଛଡ଼ାଯିବାର ବ୍ୟବସ୍ଥା କରାଯିବ।
ରାଜ୍ୟ ଜଙ୍ଗଲ, ପରିବେଶ ଏବଂ ଜଳବାୟୁ ପରିବର୍ତ୍ତନ ମନ୍ତ୍ରୀ ଗଣେଶ ରାମ ସିଂ ଖୁଣ୍ଟିଆ ଏହି କେନ୍ଦ୍ରକୁ ବନ୍ୟପ୍ରାଣୀ ସଂରକ୍ଷଣର ଏକ “ମାଇଲଖୁଣ୍ଟ” ଭାବେ ବର୍ଣ୍ଣନା କରିଛନ୍ତି। ସେ କହିଛନ୍ତି ଯେ ଏହା ହାତୀ ଉଦ୍ଧାର ଏବଂ ପୁନର୍ବାସ କ୍ଷେତ୍ରରେ ଏକ ନୂଆ ମାନଦଣ୍ଡ ସ୍ଥାପନ କରିବ।ଜଙ୍ଗଲର ଅଭାବ ଏବଂ ମଣିଷ-ବନ୍ୟପ୍ରାଣୀ ମଧ୍ୟରେ ବଢ଼ୁଥିବା ସଂଘର୍ଷ ଯୋଗୁଁ ହାତୀ ବଂଶ ପ୍ରଭାବିତ ହେଉଥିବା ବେଳେ ଏଭଳି ଏକ ସ୍ୱତନ୍ତ୍ର କେନ୍ଦ୍ରର ଆବଶ୍ୟକତା ଜରୁରୀ ଥିଲା।
ଏହି ସେଣ୍ଟରରେ ହାତୀମାନଙ୍କ ପାଇଁ ନିମ୍ନଲିଖିତ ସୁବିଧା ରହିଛି:
ପାଣି ଓ ଗଛଲତା ଘେରା ଏକ ସୁରକ୍ଷିତ ଏନକ୍ଲୋଜର। ଆହତ ବା ଅସୁସ୍ଥ ହାତୀଙ୍କୁ ଆବଦ୍ଧ କରି ଚିକିତ୍ସା କରିବାର ସ୍ୱତନ୍ତ୍ର ସ୍ଥାନ। ପ୍ରାଣୀ ଚିକିତ୍ସା କକ୍ଷ, ହାତୀ ଛୁଆଙ୍କ ପାଇଁ ସ୍ୱତନ୍ତ୍ର ସେଡ୍, ମାହୁନ୍ତ ରହିବା ଗୃହ, ରୋଷେଇ ଘର ଏବଂ ଖାଦ୍ୟ ମହଜୁଦ ଗୃହ। ସ୍ଥାନୀୟ ବନ ବିଭାଗ ଅଧିକାରୀଙ୍କ ସୂଚନା ଅନୁଯାୟୀ, ଉଦ୍ଧାର ହୋଇଥିବା ହାତୀମାନେ ଯେପରି ମଣିଷ ସହ ଅଧିକ ଅଭ୍ୟସ୍ତ ନ ହୁଅନ୍ତି, ସେଥିପାଇଁ ଏଠାରେ ମଣିଷର ଉପସ୍ଥିତିକୁ ସୀମିତ ରଖାଯିବ। ଏହା ସହିତ ଏହି କେନ୍ଦ୍ରଟି ବନ୍ୟପ୍ରାଣୀ ଗବେଷଣା ଏବଂ ସଂରକ୍ଷଣ ତାଲିମର ଏକ ପ୍ରମୁଖ ହବ୍ ଭାବେ ମଧ୍ୟ କାର୍ଯ୍ୟ କରିବ।
ସୂଚନାଯୋଗ୍ୟ, ଓଡ଼ିଶାରେ ପୂର୍ବରୁ ଚନ୍ଦକା (ଖୋର୍ଦ୍ଧା), କପିଳାସ (ଢେଙ୍କାନାଳ) ଏବଂ ଶିମିଳିପାଳ (ମୟୂରଭଞ୍ଜ) ଠାରେ ଏଭଳି ତିନୋଟି ହାତୀ ପୁନର୍ବାସ କେନ୍ଦ୍ର କାର୍ଯ୍ୟ କରୁଛି। ବର୍ତ୍ତମାନ କଳାହାଣ୍ଡିର କୁତ୍ରୁଖାରୀ ଏହି ତାଲିକାରେ ଚତୁର୍ଥ କେନ୍ଦ୍ର ଭାବେ ଯୋଡ଼ି ହୋଇଛି।