ବର୍ମିଂହମ୍: ଭାରତ ବିପକ୍ଷ ମହିଳା ଟି–୨୦ ବିଶ୍ୱକପ୍ ଗ୍ରୁପ–ଏ ମ୍ୟାଚ୍ରେ ପରାଜୟ ସହ ପାକିସ୍ତାନ ଦଳକୁ ଆଉ ଏକ ଝଟକା ଲାଗିଛି। ମନ୍ଥର ବୋଲିଂ ହାର କାରଣରୁ ଅନ୍ତର୍ଜାତୀୟ କ୍ରିକେଟ ପରିଷଦ (ଆଇସିସି) ଦଳ ଉପରେ ମ୍ୟାଚ୍ ଫି’ର ୫ ପ୍ରତିଶତ ଜରିମାନା ଲାଗୁ କରିଛି।
ଆଇସିସି ସୋମବାର ଜାରି କରିଥିବା ସୂଚନାରେ କହିଛି, ସମୟ ସମ୍ବନ୍ଧୀୟ ସମସ୍ତ ଛାଡ଼କୁ ଗଣନା କରିବା ପରେ ମଧ୍ୟ ପାକିସ୍ତାନ ନିର୍ଦ୍ଧାରିତ ସମୟ ମଧ୍ୟରେ ନିଜର ସମସ୍ତ ଓଭର ସମାପ୍ତ କରିପାରି ନଥିଲା। ଦଳ ଗୋଟିଏ ଓଭର ପଛରେ ରହିଯାଇଥିବାରୁ ମ୍ୟାଚ୍ ରେଫରି ଟୁଡି ଆଣ୍ଡରସନ ଏହି ଜରିମାନା ଘୋଷଣା କରିଥିଲେ।
ଆଇସିସି ଆଚରଣ ବିଧିର ଅନୁଚ୍ଛେଦ ୨.୨୨ ଅନୁଯାୟୀ, ନ୍ୟୁନତମ ଓଭର ରେଟ୍ ବଜାୟ ରଖିବାରେ ବିଫଳ ହେଲେ ପ୍ରତି ଅପୂର୍ଣ୍ଣ ଓଭର ପାଇଁ ଖେଳାଳିମାନଙ୍କ ମ୍ୟାଚ୍ ଫି’ର ୫ ପ୍ରତିଶତ କଟାଯାଏ। ଏହି ମାମଲାରେ ପାକିସ୍ତାନ ଗୋଟିଏ ଓଭର କମ୍ କରିଥିବାରୁ ସେହି ହିସାବରେ ଦଣ୍ଡ ଲାଗୁ କରାଯାଇଛି।
ଅନ୍-ଫିଲ୍ଡ ଅମ୍ପାୟର କ୍ଲେୟାର ପୋଲୋସାକ ଓ ଜ୍ୟାକଲିନ ୱିଲିୟମ୍ସଙ୍କ ସହ ତୃତୀୟ ଅମ୍ପାୟର ଏଲୋଇସ ଶେରିଡନ ଏବଂ ଚତୁର୍ଥ ଅମ୍ପାୟର ସୁ ରେଡଫର୍ନ ଏହି ଅଭିଯୋଗ ଦାଖଲ କରିଥିଲେ। ପାକିସ୍ତାନ ଅଧିନାୟକ ଫାତିମା ସନା ଭୁଲ ସ୍ୱୀକାର କରିବା ସହ ପ୍ରସ୍ତାବିତ ଦଣ୍ଡକୁ ମାନି ନେଇଥିବାରୁ ଅତିରିକ୍ତ ଶୁଣାଣିର ଆବଶ୍ୟକତା ପଡ଼ିନଥିଲା।
ଉଲ୍ଲେଖଯୋଗ୍ୟ, ବର୍ମିଂହାମରେ ଖେଳାଯାଇଥିବା ଏହି ମ୍ୟାଚ୍ରେ ଭାରତ ୧୭୦ ରନ୍ ସଂଗ୍ରହ କରିଥିଲା। ଜବାବରେ ପାକିସ୍ତାନ ୧୦୬ ରନ୍ରେ ଅଲଆଉଟ୍ ହୋଇ ୬୪ ରନ୍ରେ ପରାସ୍ତ ହୋଇଥିଲା। ଏବେ ଦଳର ନଜର ଜୁନ ୧୭ରେ ଦକ୍ଷିଣ ଆଫ୍ରିକା ବିପକ୍ଷ ପରବର୍ତ୍ତୀ ମ୍ୟାଚ୍ ଉପରେ ରହିଛି।