ନୂଆଦିଲ୍ଲୀ: କଂଗ୍ରେସ ସାଂସଦ ଏବଂ ଲୋକସଭାରେ ବିରୋଧୀ ଦଳ ନେତା ରାହୁଲ ଗାନ୍ଧୀ ଛାତ୍ରଛାତ୍ରୀ ଓ ଚାକିରି ଆଶାୟୀମାନଙ୍କୁ ‘ଛାତ୍ରୋଁ କି ଗୁଞ୍ଜ’ ଅଭିଯାନରେ ସାମିଲ ହେବାକୁ ଆହ୍ୱାନ କରିଛନ୍ତି। ତାଙ୍କ କହିବା ଅନୁସାରେ, ଏହି ଅଭିଯାନ ମାଧ୍ୟମରେ ଶିକ୍ଷା, ପରୀକ୍ଷା ବ୍ୟବସ୍ଥା ଓ ନିଯୁକ୍ତି ସମ୍ବନ୍ଧୀୟ ଚିନ୍ତାକୁ ସିଧାସଳଖ ଭାବେ ସରକାରଙ୍କ ସମ୍ମୁଖରେ ଉଠାଯିବ।
ରାହୁଲ ଗାନ୍ଧୀ ସାମାଜିକ ଗଣମାଧ୍ୟମ ‘ଏକ୍ସ’ରେ କରିଥିବା ଏକ ପୋଷ୍ଟରେ କହିଛନ୍ତି, ପ୍ରଶ୍ନପତ୍ର ପ୍ରଘଟ, ପରୀକ୍ଷାରେ ଅନିୟମିତତା, ଉଚ୍ଚ ଶିକ୍ଷା ଖର୍ଚ୍ଚ କିମ୍ବା ସୁଯୋଗର ଅଭାବ ଭଳି ସମସ୍ୟାରେ ପ୍ରଭାବିତ ଯୁବପିଢ଼ୀଙ୍କ ସ୍ୱରକୁ ଏହି ପଦକ୍ଷେପ ମଞ୍ଚ ଯୋଗାଇବ।
ତାଙ୍କ ମତରେ, ‘ଛାତ୍ରୋଁ କି ଗୁଞ୍ଜ’ କେବଳ ଏକ ଅଭିଯାନ ନୁହେଁ, ବରଂ ସୁଲଭ ଶିକ୍ଷା, ସ୍ୱଚ୍ଛ ପରୀକ୍ଷା ବ୍ୟବସ୍ଥା ଏବଂ ସମ୍ମାନଜନକ ନିଯୁକ୍ତି ଦାବିକୁ ସାମ୍ନାକୁ ଆଣିବା ପାଇଁ ଏକ ସାମାଜିକ ମଞ୍ଚ।
ରାହୁଲ ଗାନ୍ଧୀ ଲୋକମାନଙ୍କୁ ଅଭିଯାନ ସହ ଜଡିତ ଆବେଦନରେ ଦସ୍ତଖତ କରିବା ସହ ପରାମର୍ଶ ଦେବାକୁ ଅନୁରୋଧ କରିଛନ୍ତି। ସେ କହିଛନ୍ତି, ଅଧିକରୁ ଅଧିକ ଅଂଶଗ୍ରହଣ ଏହି ପ୍ରସଙ୍ଗକୁ ଆହୁରି ଜୋରଦାର କରିପାରିବ।
କଂଗ୍ରେସ ପକ୍ଷରୁ କୁହାଯାଇଛି ଯେ, ଏହି ଅଭିଯାନ ଅଧୀନରେ ଶିକ୍ଷା, ନିଯୁକ୍ତି ଓ ପରୀକ୍ଷା ବ୍ୟବସ୍ଥା ସମ୍ପର୍କିତ ବିଷୟ ଉପରେ ଦେଶବ୍ୟାପୀ ଜନସମ୍ପର୍କ, ଆଲୋଚନା ଏବଂ ବିଭିନ୍ନ କାର୍ଯ୍ୟକ୍ରମ ଆୟୋଜନ କରାଯିବ।
ଏହି ଅଭିଯାନର ଆରମ୍ଭ ରାଜସ୍ଥାନର କୋଟାରୁ ହୋଇଥିବାବେଳେ ପରବର୍ତ୍ତୀ ସମୟରେ ଏହାକୁ ଦେଶର ଅନ୍ୟାନ୍ୟ ସହରକୁ ବିସ୍ତାର କରିବା ଯୋଜନା ରହିଛି। କଂଗ୍ରେସର ଛାତ୍ର ଓ ଯୁବ ସଂଗଠନମାନେ ମଧ୍ୟ ଏହି ପଦକ୍ଷେପରେ ସାମିଲ ହେବେ ବୋଲି କୁହାଯାଇଛି।
ସେହିସହ ରାହୁଲ ଗାନ୍ଧୀ ଭାରତର ଶିକ୍ଷା ବ୍ୟବସ୍ଥା ଉପରେ ମତ ରଖି କହିଛନ୍ତି ଯେ, ଛାତ୍ରଛାତ୍ରୀଙ୍କ ପାଇଁ ବିଭିନ୍ନ କ୍ୟାରିୟର ସୁଯୋଗ ଓ ଉନ୍ନତ ଶିକ୍ଷା ପରିବେଶ ସୃଷ୍ଟି ଆବଶ୍ୟକ।