ୱାସିଂଟନ: ଇରାନ ବିରୋଧରେ କଂଗ୍ରେସର ସ୍ପଷ୍ଟ ଅନୁମତି ବିନା ଆମେରିକୀୟ ସାମରିକ କାର୍ଯ୍ୟାନୁଷ୍ଠାନକୁ ସୀମିତ କରିବା ଉଦ୍ଦେଶ୍ୟରେ ଆମେରିକା ସିନେଟରେ ଏକ ଗୁରୁତ୍ୱପୂର୍ଣ୍ଣ ପ୍ରସ୍ତାବ ୫୦-୪୮ ଭୋଟରେ ପାରିତ ହୋଇଛି। ଏହାକୁ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ବିଦେଶ ଓ ସୁରକ୍ଷା ନୀତି ପାଇଁ ଏକ ବଡ଼ ରାଜନୈତିକ ଚ୍ୟାଲେଞ୍ଜ ଭାବେ ଦେଖାଯାଉଛି।
ଏହି ପ୍ରସ୍ତାବ ପୂର୍ବରୁ ପ୍ରତିନିଧି ସଭାରେ ମଧ୍ୟ ପାରିତ ହୋଇଥିଲା। ଏବେ ଉଭୟ ସଦନରେ ସମର୍ଥନ ମିଳିବା ପରେ ଯୁଦ୍ଧ ସମ୍ପର୍କିତ ନିଷ୍ପତ୍ତିରେ କଂଗ୍ରେସର ଭୂମିକାକୁ ନେଇ ଚର୍ଚ୍ଚା ଆହୁରି ତୀବ୍ର ହୋଇଛି।
ସିନେଟରେ ଭୋଟିଂ ସମୟରେ ରିପବ୍ଲିକାନ ଦଳର କିଛି ସଦସ୍ୟ ନିଜ ଦଳର ଆଭିମୁଖ୍ୟରୁ ସରି ଯାଇ ପ୍ରସ୍ତାବକୁ ସମର୍ଥନ କରିଥିଲେ। ସୁଜାନ କଲିନ୍ସ, ରାଣ୍ଡ ପଲ୍, ବିଲ୍ କାସିଡି ଏବଂ ଲିସା ମୁରକୋସ୍କି ଡେମୋକ୍ରାଟମାନଙ୍କ ସହ ଭୋଟ ଦେଇଥିଲେ। ଅନ୍ୟପଟେ ଡେମୋକ୍ରାଟିକ୍ ସିନେଟର ଜନ୍ ଫେଟରମ୍ୟାନ ପ୍ରସ୍ତାବ ବିରୋଧରେ ଭୋଟ ଦେଇଥିଲେ।
ବିତର୍କ ସମୟରେ ସିନେଟର ଟିମ୍ କେନ୍ କହିଥିଲେ ଯେ, ଆମେରିକାର ସମ୍ବିଧାନ ଅନୁଯାୟୀ ଯୁଦ୍ଧ ସମ୍ପର୍କିତ ଅଧିକାର କଂଗ୍ରେସ ପାଖରେ ରହିଛି ଏବଂ ଏହାକୁ ଏକପକ୍ଷୀୟ ଭାବେ କାର୍ଯ୍ୟକାରୀ କରାଯାଇପାରିବ ନାହିଁ।
ଅନ୍ୟପଟେ ରାଷ୍ଟ୍ରପତି ଟ୍ରମ୍ପ ଏହି ପ୍ରସ୍ତାବକୁ କଡ଼ା ସମାଲୋଚନା କରି “ଅର୍ଥହୀନ” ବୋଲି କହିଛନ୍ତି। ହ୍ୱାଇଟ ହାଉସର ମତ ହେଉଛି ଯେ, ଏପ୍ରିଲ ୭ର ଅସ୍ତ୍ରବିରତି ପରେ ଆମେରିକାର ସାମରିକ ଅଭିଯାନ ଶେଷ ହୋଇସାରିଥିବାରୁ ଏହି ପ୍ରସ୍ତାବର ବ୍ୟବହାରିକ ପ୍ରଭାବ ସୀମିତ ରହିବ।
ତେବେ ଏହି ଭୋଟିଂ ଆମେରିକୀୟ ରାଜନୀତିରେ ଯୁଦ୍ଧ କ୍ଷମତା, ରାଷ୍ଟ୍ରପତିଙ୍କ ଅଧିକାର ଓ କଂଗ୍ରେସର ଭୂମିକାକୁ ନେଇ ନୂଆ ଚର୍ଚ୍ଚା ଆରମ୍ଭ କରିଛି।