ପ୍ରଥମ ମହାକାଶ ଯାତ୍ରାରେ ଭାରତୀୟ ବଂଶୋଦ୍ଭବ ଅନିଲ ମେନନ, ଆଇଏସ୍ଏସ୍ ଅଭିମୁଖେ ଉଡ଼ିଲା ସୋୟୁଜ୍-ଏମ୍ଏସ୍-୨୯
ୱାସିଂଟନ: ଭାରତୀୟ ବଂଶୋଦ୍ଭବ ନାସା ମହାକାଶଚାରୀ ଅନିଲ ମେନନ ମଙ୍ଗଳବାର ତାଙ୍କର ପ୍ରଥମ ମହାକାଶ ଯାତ୍ରା ଆରମ୍ଭ କରିଛନ୍ତି। କାଜାଖସ୍ତାନର ବାଇକୋନୁର କସ୍ମୋଡ୍ରୋମରୁ ରୁଷର ସୋୟୁଜ୍-ଏମ୍ଏସ୍-୨୯ ମହାକାଶଯାନରେ ସେ ରୁଷୀୟ ମହାକାଶଚାରୀ ପ୍ୟୋତ୍ର ଡୁବ୍ରୋଭ ଏବଂ ଆନ୍ନା କିକିନାଙ୍କ ସହ ଅନ୍ତର୍ଜାତୀୟ ମହାକାଶ କେନ୍ଦ୍ର (ଆଇଏସ୍ଏସ୍) ଅଭିମୁଖେ ଯାତ୍ରା କରିଛନ୍ତି। ପ୍ରାୟ ଆଠ ମାସ ଧରି ଚାଲିବାକୁ ଥିବା ଏହି ମିସନ୍ରେ ବିଭିନ୍ନ ବୈଜ୍ଞାନିକ ଗବେଷଣା ଓ ପ୍ରଯୁକ୍ତିଗତ ପରୀକ୍ଷା କରାଯିବ।
ଉତ୍କ୍ଷେପଣ ପରେ ସୋୟୁଜ୍ ମହାକାଶଯାନ ନିର୍ଦ୍ଧାରିତ କକ୍ଷପଥରେ ଆଇଏସ୍ଏସ୍ ଅଭିମୁଖେ ଗତି କରିଛି। ନାସା ସୂଚନା ଅନୁଯାୟୀ, ପ୍ରାୟ ତିନି ଘଣ୍ଟାର ଯାତ୍ରା ପରେ ଏହା ମହାକାଶ କେନ୍ଦ୍ରରେ ପହଞ୍ଚିବ। ସେଠାରେ ଅନିଲ ମେନନ ଓ ତାଙ୍କ ସହଯାତ୍ରୀମାନେ ‘ଏକ୍ସପେଡିସନ୍-୭୪’ ଏବଂ ‘ଏକ୍ସପେଡିସନ୍-୭୫’ର ସଦସ୍ୟ ଭାବେ କାର୍ଯ୍ୟ କରିବେ।
ଏହି ମିସନ୍ରେ ଦୀର୍ଘ ସମୟ ମହାକାଶରେ ରହିବାରୁ ମାନବ ଶରୀର ଉପରେ ପଡ଼ୁଥିବା ପ୍ରଭାବ, ମାଧ୍ୟାକର୍ଷଣହୀନ ପରିବେଶରେ ଜୀବବିଜ୍ଞାନ ଓ ଚିକିତ୍ସାବିଜ୍ଞାନ ସମ୍ବନ୍ଧୀୟ ଅଧ୍ୟୟନ ସହ ଭବିଷ୍ୟତର ଦୀର୍ଘକାଳୀନ ମହାକାଶ ଅଭିଯାନ ପାଇଁ ଆବଶ୍ୟକ ନୂତନ ପ୍ରଯୁକ୍ତିର ପରୀକ୍ଷଣ କରାଯିବ। ଅନିଲ ମେନନ ଏହି ସମସ୍ତ ଗବେଷଣାମୂଳକ କାର୍ଯ୍ୟରେ ସକ୍ରିୟ ଭାଗ ନେବେ।
ଅନିଲ ମେନନ ଜଣେ ଜରୁରିକାଳୀନ ଚିକିତ୍ସକ, ନାସା ମହାକାଶଚାରୀ ଏବଂ ଆମେରିକୀୟ ସ୍ପେସ୍ ଫୋର୍ସର କର୍ଣ୍ଣେଲ। ସେ ପୂର୍ବରୁ ସ୍ପେସ୍ଏକ୍ସର ପ୍ରଥମ ଫ୍ଲାଇଟ୍ ସର୍ଜନ୍ ଭାବେ କାର୍ଯ୍ୟ କରି ମାନବ ମହାକାଶ ଉଡ଼ାଣର ଚିକିତ୍ସା ବ୍ୟବସ୍ଥାରେ ଉଲ୍ଲେଖନୀୟ ଅବଦାନ ରଖିଥିଲେ। ୨୦୨୧ରେ ସେ ନାସାର ମହାକାଶଚାରୀ ଦଳରେ ସାମିଲ ହୋଇଥିଲେ। ବର୍ତ୍ତମାନର ଏହି ମିସନ୍ ତାଙ୍କର ପ୍ରଥମ ମହାକାଶ ଯାତ୍ରା ହୋଇଥିବାରୁ ଏହାକୁ ଭାରତୀୟ ବଂଶୋଦ୍ଭବ ସମୁଦାୟ ପାଇଁ ଏକ ଗର୍ବର ମୁହୂର୍ତ୍ତ ଭାବେ ଦେଖାଯାଉଛି।