ନ୍ୟୁଜର୍ସି: ବିଶ୍ୱ ଫୁଟବଲ୍ର ସର୍ବବୃହତ୍ ଆୟୋଜନ ଫିଫା ବିଶ୍ୱକପ୍ର ମହାମୁକାବିଲା ରବିବାର ରାତିରେ ଖେଳାଯିବ। ଭାରତୀୟ ସମୟ ଅନୁସାରେ ରାତି ୧୨ଟା ୩୦ ମିନିଟରେ ନ୍ୟୁଜର୍ସିରେ ବର୍ତ୍ତମାନର ଚାମ୍ପିଅନ୍ ଆର୍ଜେଣ୍ଟିନା ଏବଂ ୟୁରୋପୀୟ ଶକ୍ତି ସ୍ପେନ୍ ମଧ୍ୟରେ ଟାଇଟଲ୍ ଲଢ଼େଇ ହେବ। ଫୁଟବଲ୍ପ୍ରେମୀଙ୍କ ନଜର ଏହି ହାଇଭୋଲ୍ଟେଜ୍ ଫାଇନାଲ୍ ଉପରେ ରହିଛି।
ଆର୍ଜେଣ୍ଟିନା ଏହି ମ୍ୟାଚ୍ ଜିତି ଚତୁର୍ଥ ବିଶ୍ୱକପ୍ ଟ୍ରଫି ହାସଲ କରିବା ସହ କ୍ରମାଗତ ଦୁଇଥର ବିଶ୍ୱଚାମ୍ପିଅନ୍ ହେବାର ଇତିହାସ ରଚିବାକୁ ଲକ୍ଷ୍ୟ ରଖିଛି। ଯଦି ଏହା ସମ୍ଭବ ହୁଏ, ତେବେ ଇଟାଲି (୧୯୩୪ ଓ ୧୯୩୮) ଏବଂ ବ୍ରାଜିଲ୍ (୧୯୫୮ ଓ ୧୯୬୨) ପରେ ଲଗାତାର ଦୁଇଟି ବିଶ୍ୱକପ୍ ଜିତିବାରେ ଆର୍ଜେଣ୍ଟିନା ବିଶ୍ୱର ତୃତୀୟ ଦେଶ ହେବ।
୨୦୨୨ କତାର ବିଶ୍ୱକପ୍ରେ ଚାମ୍ପିଅନ୍ ହୋଇ ଦୀର୍ଘ ୩୬ ବର୍ଷର ଅପେକ୍ଷାର ଅନ୍ତ ଘଟାଇଥିବା ଆର୍ଜେଣ୍ଟିନା ଏଥର ମଧ୍ୟ ବିଜୟ ଧାରା ବଜାୟ ରଖିବାକୁ ପ୍ରସ୍ତୁତ।
ଅନ୍ୟପକ୍ଷରେ, ୨୦୧୦ରେ ପ୍ରଥମ ଥର ପାଇଁ ବିଶ୍ୱକପ୍ ଜିତିଥିବା ସ୍ପେନ୍ ଦ୍ୱିତୀୟ ଥର ଟ୍ରଫି ଉଠାଇବା ଆଶାରେ ମୈଦାନକୁ ଓହ୍ଲାଇବ। ଯୁବ ଓ ଅଭିଜ୍ଞ ଖେଳାଳିଙ୍କ ସମନ୍ୱୟରେ ଗଠିତ ସ୍ପେନ୍ ଦଳ ଫାଇନାଲ୍ରେ ଆର୍ଜେଣ୍ଟିନାକୁ କଡ଼ା ଟକ୍କର ଦେବ ବୋଲି ଆଶା କରାଯାଉଛି।
ଫୁଟବଲ୍ର ଦୁଇ ପାରମ୍ପରିକ ଶକ୍ତିର ଏହି ମହାଲଢ଼େଇକୁ ନେଇ ସାରା ବିଶ୍ୱରେ ଉତ୍ସାହ ଚରମରେ ପହଞ୍ଚିଛି। ବିଶ୍ୱଚାମ୍ପିଅନ୍ର ମୁକୁଟ କାହା ମୁଣ୍ଡରେ ଶୋଭା ପାଇବ, ତାହାର ଉତ୍ତର ରବିବାର ରାତିରେ ମିଳିଯିବ।