Terror Attack in Jammu & Kashmir: ଅନନ୍ତନାଗରେ ପୁଲିସ ଦଳ ଉପରେ ଆତଙ୍କୀ ଆକ୍ରମଣ, ହେଡ୍ କନଷ୍ଟେବଳ ସହିଦ

ଶ୍ରୀନଗର: ଜମ୍ମୁ ଓ କାଶ୍ମୀରର ଅନନ୍ତନାଗ ଜିଲ୍ଲାରେ ବୁଧବାର ଆତଙ୍କବାଦୀଙ୍କ ଗୁଳିମାଡ଼ରେ ଜଣେ ପୁଲିସ ହେଡ୍ କନଷ୍ଟେବଳ ସହିଦ ହୋଇଛନ୍ତି। ଘଟଣା ପରେ ଆକ୍ରମଣକାରୀମାନେ ଫେରାର ହୋଇଯାଇଥିବା ବେଳେ ସୁରକ୍ଷା ବାହିନୀ ସମଗ୍ର ଅଞ୍ଚଳକୁ ଘେରାବନ୍ଦୀ କରି ବ୍ୟାପକ ତଲାସି ଅଭିଯାନ ଆରମ୍ଭ କରିଛି।

ପୁଲିସ ସୂଚନା ଅନୁଯାୟୀ, ମଧ୍ୟାହ୍ନ ପ୍ରାୟ ୧୨:୩୫ ସମୟରେ ଅନନ୍ତନାଗ ପୁଲିସ ଷ୍ଟେସନ ଅଧୀନ ଲାଲ ଚୌକ ନିକଟସ୍ଥ କୋଟୱାଲ ଗଲି ଅଞ୍ଚଳରେ ଏକ ପୁଲିସ ଦଳ ଉପରେ ଅଜଣା ଆତଙ୍କବାଦୀମାନେ ଅତର୍କିତ ଭାବେ ଗୁଳିଚାଳନା କରିଥିଲେ।

ଏହି ଆକ୍ରମଣରେ ଇଣ୍ଡିଆନ୍ ରିଜର୍ଭ (IR)ର ତୃତୀୟ ବାଟାଲିୟନର ହେଡ୍ କନଷ୍ଟେବଳ ଆଶିକ୍ ହୁସେନ କୁରେଶୀ ଗୁରୁତର ଭାବେ ଆହତ ହୋଇଥିଲେ। ତାଙ୍କୁ ତୁରନ୍ତ ଅନନ୍ତନାଗ ସରକାରୀ ମେଡିକାଲ୍ କଲେଜ ହସ୍ପିଟାଲକୁ ନିଆଯାଇଥିଲା। ସେଠାରେ ଚିକିତ୍ସାଧୀନ ଅବସ୍ଥାରେ ଡାକ୍ତରମାନେ ତାଙ୍କୁ ମୃତ ଘୋଷଣା କରିଥିଲେ।

ଘଟଣା ପରେ ସୁରକ୍ଷା ବାହିନୀ ସମଗ୍ର ଅଞ୍ଚଳକୁ ସିଲ୍ କରି ଆତଙ୍କବାଦୀଙ୍କୁ ଠାବ କରିବା ପାଇଁ ସର୍ଚ୍ଚ ଅପରେସନ୍ ଜାରି ରଖିଛି। ଆକ୍ରମଣକାରୀଙ୍କ ପରିଚୟ ଏବଂ ଆକ୍ରମଣ ପଛର କାରଣ ସମ୍ପର୍କରେ ତଦନ୍ତ ଚାଲିଥିବା ବେଳେ ସୁରକ୍ଷା ବ୍ୟବସ୍ଥାକୁ ଆହୁରି କଡ଼ାକଡ଼ି କରାଯାଇଛି।