Rajnath Singh: ‘ପିଓକେ ଛଡ଼ା ପାକିସ୍ତାନ ସହ ଅନ୍ୟ କୌଣସି ପ୍ରସଙ୍ଗରେ ଆଲୋଚନା ନାହିଁ’, କାର୍ଗିଲ ବିଜୟ ଦିବସରେ ରାଜନାଥଙ୍କ ବଡ଼ ବୟାନ
ନୂଆଦିଲ୍ଲୀ: କାର୍ଗିଲ ବିଜୟ ଦିବସ ଅବସରରେ ଲଦାଖର ଦ୍ରାସସ୍ଥିତ କାର୍ଗିଲ ଯୁଦ୍ଧ ସ୍ମାରକରେ ଆୟୋଜିତ କାର୍ଯ୍ୟକ୍ରମରେ ଯୋଗଦେଇ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ଭାରତ-ପାକିସ୍ତାନ ସମ୍ପର୍କକୁ ନେଇ କଡ଼ା ବୟାନ ଦେଇଛନ୍ତି। ସେ କହିଛନ୍ତି ଯେ, ପାକିସ୍ତାନ ଅଧିକୃତ କାଶ୍ମୀର (ପିଓକେ) ବ୍ୟତୀତ ଅନ୍ୟ କୌଣସି ପ୍ରସଙ୍ଗରେ ଭାରତ ପାକିସ୍ତାନ ସହ ଆଲୋଚନା କରିବ ନାହିଁ।
ରାଜନାଥ ସିଂହଙ୍କ କହିବା ଅନୁଯାୟୀ, ପିଓକେ ଭାରତର ଅବିଚ୍ଛେଦ୍ୟ ଅଂଶ ଏବଂ ବର୍ତ୍ତମାନ ଏହା ପାକିସ୍ତାନର ବେଆଇନ ଦଖଲରେ ରହିଛି। ସେ ଅଭିଯୋଗ କରିଛନ୍ତି ଯେ, ପାକିସ୍ତାନ ଆତଙ୍କବାଦକୁ ରାଷ୍ଟ୍ରନୀତିର ଅଂଶ କରିଛି ଏବଂ ସେଠାକାର ସାମରିକ ପ୍ରତିଷ୍ଠାନ ଓ ଆତଙ୍କବାଦୀ ସଂଗଠନ ମଧ୍ୟରେ ତଫାତ୍ ଅତ୍ୟନ୍ତ କମ୍।
ସେ ଆହୁରି କହିଛନ୍ତି ଯେ, ଭାରତର ସାର୍ବଭୌମତ୍ୱ ଓ ଅଖଣ୍ଡତାକୁ ଚ୍ୟାଲେଞ୍ଜ କରିବାକୁ ଯେକୌଣସି ପ୍ରୟାସର ଭାରତୀୟ ସଶସ୍ତ୍ର ବାହିନୀ ଦୃଢ଼ ଏବଂ ଉଚିତ ଜବାବ ଦେବାକୁ ସକ୍ଷମ।
‘ଅପରେସନ୍ ସିନ୍ଦୂର’ର ଉଲ୍ଲେଖ କରି ରାଜନାଥ ସିଂହ କହିଛନ୍ତି ଯେ, ଏହି ଅଭିଯାନ ମାଧ୍ୟମରେ ଭାରତୀୟ ସେନା ଆତଙ୍କବାଦୀ ଓ ସେମାନଙ୍କ ସମର୍ଥକଙ୍କୁ କଡ଼ା ଜବାବ ଦେଇଛି। ତାଙ୍କ ମତରେ, ଏହି ଅଭିଯାନ ଭାରତର ପ୍ରସ୍ତୁତି ଓ ଯେକୌଣସି ସୁରକ୍ଷା ଚ୍ୟାଲେଞ୍ଜର ମୁକାବିଲା କରିବାର କ୍ଷମତାକୁ ପ୍ରଦର୍ଶନ କରିଛି।
୧୯୯୯ ମସିହାର କାର୍ଗିଲ ଯୁଦ୍ଧରେ ପ୍ରାଣବଳି ଦେଇଥିବା ବୀର ସୈନିକମାନଙ୍କୁ ଶ୍ରଦ୍ଧାଞ୍ଜଳି ଜଣାଇ ପ୍ରତିରକ୍ଷା ମନ୍ତ୍ରୀ କହିଛନ୍ତି ଯେ, କାର୍ଗିଲ ବିଜୟ କେବଳ ଏକ ସାମରିକ କିମ୍ବା କୂଟନୈତିକ ସଫଳତା ନୁହେଁ, ବରଂ ଭାରତୀୟ ସଶସ୍ତ୍ର ବାହିନୀର ସାହସ, ଦୃଢ଼ ସଙ୍କଳ୍ପ ଓ ବଳିଦାନର ଚିରସ୍ମରଣୀୟ ପ୍ରତୀକ।
ସେ କହିଛନ୍ତି, କାର୍ଗିଲ ଯୁଦ୍ଧ ସ୍ମାରକରେ ଖୋଦିତ ବୀର ସୈନିକମାନଙ୍କ ନାମ ଭାରତର ପ୍ରତ୍ୟେକ ଅଞ୍ଚଳ, ଧର୍ମ ଓ ସମ୍ପ୍ରଦାୟର ପ୍ରତିନିଧିତ୍ୱ କରେ। ଏହା ଦେଶର ବିବିଧତା ମଧ୍ୟରେ ଥିବା ଏକତା ଓ ଜାତୀୟ ଏକାତ୍ମତାର ଶକ୍ତିଶାଳୀ ପ୍ରତୀକ ବୋଲି ସେ ମତ ପ୍ରକାଶ କରିଛନ୍ତି।