ହାଇଦ୍ରାବାଦ: ରାଷ୍ଟ୍ରୀୟ ସ୍ୱୟଂସେବକ ସଂଘ (RSS) ମୁଖ୍ୟ ମୋହନ ଭାଗବତ ରବିବାର ଦିନ ଏକ କାର୍ଯ୍ୟକ୍ରମରେ କହିଛନ୍ତି ଯେ LGBTQ+ ସମ୍ପ୍ରଦାୟର ଲୋକଙ୍କୁ ସମାଜରୁ ଅଲଗା କରାଯିବା ଉଚିତ୍ ନୁହେଁ, କାରଣ ସେମାନେ ମଧ୍ୟ ମଣିଷ ଏବଂ ସେମାନଙ୍କର ବଞ୍ଚିବାର ସମ୍ପୂର୍ଣ୍ଣ ଅଧିକାର ରହିଛି। ସେମାନେ ଆମ ଭାରତୀୟ ସମାଜର ଏକ ଅଙ୍ଗ ଏବଂ ସେମାନଙ୍କୁ ସମ୍ମାନଜନକ ସ୍ଥାନ ମିଳିବା ଆବଶ୍ୟକ।
ହାଇଦ୍ରାବାଦଠାରେ ଆୟୋଜିତ ଏକ କାର୍ଯ୍ୟକ୍ରମରେ ସମ୍ବୋଧିତ କରି ସେ କହିଛନ୍ତି ଯେ, ଭାରତୀୟ ପରମ୍ପରାରେ ଏପରି ସମ୍ପ୍ରଦାୟକୁ ବହୁ ଆଗରୁ ସ୍ୱୀକୃତି ଦିଆଯାଇଛି। ସେମାନଙ୍କ ପାଇଁ ସମାଜରେ ନିଜସ୍ୱ ସ୍ଥାନ ରହିଛି।
ଭାଗବତ କହିଛନ୍ତି, “LGBTQ+ ଭଳି ପ୍ରବୃତ୍ତି ସମାଜରେ ପୂର୍ବରୁ ବି ବିଦ୍ୟମାନ ଥିଲା। କିଛି ପ୍ରବୃତ୍ତି ପ୍ରାକୃତିକ କିମ୍ବା ଜନ୍ମଗତ, ଯାହା ଉପରେ କାହାରି ନିୟନ୍ତ୍ରଣ ନଥାଏ। ଆଉ କେତେକ ପରବର୍ତ୍ତୀ ସମୟରେ ମାନସିକ କିମ୍ବା ଶାରୀରିକ କାରଣରୁ ଗଢ଼ିଉଠେ। ଆମ ସମାଜରେ ମଧ୍ୟ ଏହା ସଦାସର୍ବଦା ରହିଆସିଛି।”
ସେ ଆହୁରି କହିଛନ୍ତି ଯେ ଏପରି ଲୋକଙ୍କୁ ଦୟା କିମ୍ବା ହୀନ ନଜରରେ ଦେଖିବା ଉଚିତ୍ ନୁହେଁ। ସେମାନଙ୍କର ନିଜସ୍ୱ ଦେବଦେବୀ, ପୂଜାସ୍ଥଳୀ ଏବଂ କୁମ୍ଭମେଳାରେ ମହାମଣ୍ଡଳେଶ୍ୱର ମଧ୍ୟ ରହିଛନ୍ତି। ମହାଭାରତର ‘ଶିଖଣ୍ଡୀ’ଙ୍କ ଉଦାହରଣ ଦେଇ ସେ କହିଛନ୍ତି ଯେ, ଶିଖଣ୍ଡୀ ଜଣେ ଯୋଦ୍ଧା ଭାବେ ଯୁଦ୍ଧରେ ଭାଗ ନେଇଥିଲେ। ଭାରତୀୟ ପରମ୍ପରା ବୃଥା ଆଡ଼ମ୍ବର ନକରି ଏହି ପ୍ରସଙ୍ଗକୁ ଶାନ୍ତ ଭାବେ ସମାଜରେ ସ୍ଥାନ ଦେଇଛି।
ଆକ୍ରମଣକାରୀମାନେ ଆମ ମନରେ ନିଜ ସଂସ୍କୃତି ପ୍ରତି ହୀନମନ୍ୟତା ଭରିଦେଇଥିଲେ। ଆମେ ପାଶ୍ଚାତ୍ୟ ଧାରଣାକୁ ଆପଣେଇ ନେଇଛୁ, ଯେଉଁଥିପାଇଁ ଅନେକ ଭ୍ରାନ୍ତ ଧାରଣା ସୃଷ୍ଟି ହୋଇଛି।
ସେ ଶେଷରେ କହିଛନ୍ତି ଯେ LGBTQ+ ସମ୍ପ୍ରଦାୟ ପ୍ରତି ସମାଜର ସହାନୁଭୂତିଶୀଳ ଦୃଷ୍ଟିକୋଣ ରହିବା ଆବଶ୍ୟକ।