କୋଲକାତା ପୋଲିସର ‘ଦୁର୍ଗା ସୁରକ୍ଷା ସ୍କ୍ୱାଡ୍’: ଏବେ ନୂଆ ଗୋଲାପୀ-କମଳା ରଙ୍ଗର ଜ୍ୟାକେଟ୍ ଓ ହେଲମେଟ୍ ପିନ୍ଧି କରିବେ ପାଟ୍ରୋଲିଂ
କୋଲକାତା: ମହିଳାମାନଙ୍କ ବିରୋଧରେ ହେଉଥିବା ଅପରାଧ ରୋକିବା ଏବଂ ସେମାନଙ୍କ ସୁରକ୍ଷା ପ୍ରତି ସଚେତନତା ସୃଷ୍ଟି କରିବା ପାଇଁ ଗଠିତ କୋଲକାତା ପୋଲିସର ‘ଦୁର୍ଗା ସୁରକ୍ଷା ସ୍କ୍ୱାଡ୍’ ଏବେ ନୂଆ ଅବତାରରେ ନଜର ଆସିବ। ଏହି ସ୍କ୍ୱାଡ୍ର ସଦସ୍ୟମାନେ ସେମାନଙ୍କ ୟୁନିଫର୍ମ ଉପରେ ଏକ ସ୍ୱତନ୍ତ୍ର ଭାବେ ଡିଜାଇନ୍ କରାଯାଇଥିବା ଗୋଲାପୀ ଓ କମଳା ରଙ୍ଗର ୱେଷ୍ଟକୋଟ୍ (ଜ୍ୟାକେଟ୍) ପିନ୍ଧି ଡ୍ୟୁଟି କରିବେ।
ଜ୍ୟାକେଟ୍ ଓ ହେଲମେଟ୍ର ବିଶେଷତା:
- ଦେବୀ ଦୁର୍ଗା ଓ ତ୍ରିଶୂଳର ପ୍ରତୀକ: କରୁଣା ଓ ଶକ୍ତିର ପ୍ରତୀକ ସ୍ୱରୂପ ଡିଜାଇନ୍ କରାଯାଇଥିବା ଏହି ୱେଷ୍ଟକୋଟ୍ର ଆଗ ଓ ପଛ ପଟେ ଦେବୀ ଦୁର୍ଗାଙ୍କ ମୁଖାବୟ ଏବଂ ତ୍ରିଶୂଳର ଚିତ୍ର ରହିବ। ଏଥିସହିତ ଇଂରାଜୀରେ “Durga Suraksha Squad” ଲେଖାଯାଇଛି।
- ସୁବିଧାଜନକ ଡିଜାଇନ୍: ସ୍କୁଟରରେ ପାଟ୍ରୋଲିଂ କରୁଥିବା ପୋଲିସ କର୍ମଚାରୀଙ୍କ ପାଇଁ ଏହି ଜ୍ୟାକେଟ୍କୁ ଅତ୍ୟନ୍ତ ହାଲୁକା ଏବଂ ମଲ୍ଟି-ପକେଟ୍ ବିଶିଷ୍ଟ କରାଯାଇଛି, ଯାହା ଦ୍ୱାରା ପାଟ୍ରୋଲିଂ ସମୟରେ କୌଣସି ଅସୁବିଧା ହେବ ନାହିଁ।
- ନୂଆ ଗୋଲାପୀ ହେଲମେଟ୍: କୋଲକାତା ପୋଲିସ ଲୋଗୋ, ସ୍ୱତନ୍ତ୍ର ପ୍ୟାଡିଂ, ଚିନ୍-ଗାର୍ଡ ଏବଂ ବାୟୁ ଚଳାଚଳ ସୁବିଧା ଥିବା ଗୋଲାପୀ ରଙ୍ଗର ହେଲମେଟ୍ ମଧ୍ୟ ଏହି ସ୍କ୍ୱାଡ୍କୁ ଯୋଗାଇ ଦିଆଯାଉଛି।
ଲାଲବଜାରସ୍ଥିତ କୋଲକାତା ପୋଲିସ ମୁଖ୍ୟାଳୟ ପକ୍ଷରୁ ପ୍ରାୟ ୨.୭୫ ଲକ୍ଷ ଟଙ୍କା ବ୍ୟୟରେ ୧୧୦ଟି ୱେଷ୍ଟକୋଟ୍ ଏବଂ ୧.୦୮ ଲକ୍ଷ ଟଙ୍କାରେ ୮୦ଟି ହେଲମେଟ୍ର ଅର୍ଡର ଦିଆଯାଇଛି।
ଏହି ଦୁର୍ଗା ସୁରକ୍ଷା ସ୍କ୍ୱାଡ୍ ମୁଖ୍ୟତଃ ସ୍କୁଟର ମାଧ୍ୟମରେ ସହରର ବିଭିନ୍ନ ସ୍ଥାନରେ ପାଟ୍ରୋଲିଂ କରିଥାଏ। କୋଲକାତାର ବିଭିନ୍ନ ଥାନା, ସାଇବର ପୋଲିସ, ମହିଳା ଥାନା ଏବଂ ୱିମେନ୍ସ ସେଲ୍ର କର୍ମଚାରୀଙ୍କ ସହଯୋଗରେ ଏହି ଯୁଗ୍ମ ପାଟ୍ରୋଲିଂ ବ୍ୟବସ୍ଥା ମହିଳାଙ୍କ ସୁରକ୍ଷାକୁ ଆହୁରି ସୁଦୃଢ଼ କରିବ।