ଗ୍ଲାସଗୋ (ସ୍କଟଲ୍ୟାଣ୍ଡ): କମନ୍ୱେଲଥ୍ ଗେମ୍ସ ୨୦୨୬ (CWG 2026) ର ବକ୍ସିଂ ରିଂରୁ ଭାରତ ପାଇଁ ଆସିଛି ଶୁଭଖବର। ଭାରତୀୟ ମହିଳା ବକ୍ସର ପ୍ରିତି ପୱାର ନିଜର ଦମଦାର ପ୍ରଦର୍ଶନ ବଳରେ ମହିଳା ୫୪ କିଲୋଗ୍ରାମ ବର୍ଗରେ ଚାମ୍ପିଅନ୍ ହୋଇ ସ୍ୱର୍ଣ୍ଣ ପଦକ ହାସଲ କରିଛନ୍ତି। ଏହି ବିଜୟ ସହ କମନ୍ୱେଲଥ୍ ଗେମ୍ସ ବକ୍ସିଂରେ ଭାରତ ନିଜର ପ୍ରଥମ ସ୍ୱର୍ଣ୍ଣ ପଦକ ଖାତା ଖୋଲିଛି।
ଫାଇନାଲ୍ରେ କାନାଡ଼ା ପ୍ରତିଦ୍ୱନ୍ଦ୍ୱୀଙ୍କୁ ମାତ୍
ଫାଇନାଲ୍ ମୁକାବିଲାରେ ହରିୟାଣାର ଭିୱାନୀ ସହରର ୨୨ ବର୍ଷୀୟା ପ୍ରିତି କାନାଡ଼ାର ସ୍କାରଲେଟ୍ ସାଭାନା ଡେଲଗାଡୋଙ୍କୁ ମୁହାଁମୁହିଁ ହୋଇଥିଲେ। ସମଗ୍ର ମ୍ୟାଚ୍ରେ ପ୍ରିତି ନିଜର ଆକ୍ରାମକ ଶୈଳୀ ଓ ସଠିକ୍ ପଞ୍ଚ୍ ବଳରେ କାନାଡ଼ା ବକ୍ସରଙ୍କୁ କୌଣସି ସୁଯୋଗ ଦେଇନଥିଲେ। ବିଚାରପତିମାନଙ୍କର ୫-୦ ଏକପାଖିଆ ନିଷ୍ପତ୍ତିକ୍ରମେ ପ୍ରିତି ଏହି ବିଜୟ ହାସଲ କରି ସ୍ୱର୍ଣ୍ଣ ପଦକ ନିଜ ନାମରେ କରିଛନ୍ତି।
ସେମିଫାଇନାଲ୍ରେ ବି ଦେଖାଇଥିଲେ ଜଲୱା
ଏହା ପୂର୍ବରୁ ସେମିଫାଇନାଲ୍ ମୁକାବିଲାରେ ମଧ୍ୟ ପ୍ରିତି ଜାମ୍ବିଆର କ୍ୟାଥରିନ୍ ମ୍ୱାପେଙ୍କୁ ୫-୦ ରେ ପରାସ୍ତ କରି ଫାଇନାଲ୍ରେ ପ୍ରବେଶ କରିଥିଲେ। ଏସିଆନ୍ ଗେମ୍ସ ବ୍ରୋଞ୍ଜ ପଦକ ବିଜେତା ତଥା ଭାରତୀୟ ସେନାର ନାଏବ ସୁବେଦାର ଭାବେ କାର୍ଯ୍ୟରତ ପ୍ରିତି ନିଜର ରଣନୀତି ଓ କାଉଣ୍ଟର-ଏଟାକ୍ ବଳରେ ସମଗ୍ର ଟୁର୍ନାମେଣ୍ଟରେ ନିଜର ଦବ୍ଦବା ବଜାୟ ରଖିଥିଲେ।
ଏହି ସ୍ୱର୍ଣ୍ଣ ପଦକ ବିଜୟ ପରେ ଦେଶବ୍ୟାପୀ ଖୁସିର ଲହରୀ ଖେଳିଯାଇଛି। କ୍ରୀଡ଼ାପ୍ରେମୀଙ୍କ ସମେତ ବିଭିନ୍ନ ମହଲରୁ ପ୍ରିତି ପୱାରଙ୍କୁ ଶୁଭେଚ୍ଛାର ସୁଅ ଛୁଟୁଛି।