କାହିରା: ମିଶର (Egypt)ର ଶର୍ମ ଅଲ-ଶେଖ୍ର ଉତ୍ତର-ପୂର୍ବ ଅଞ୍ଚଳରେ ସୋମବାର ଭୋର ସମୟରେ ୫.୫ ତୀବ୍ରତାର ଏକ ମୃଦୁ ଭୂକମ୍ପ ଅନୁଭୂତ ହୋଇଛି। ମିଶରର ଜାତୀୟ ଜ୍ୟୋତିର୍ବିଜ୍ଞାନ ଏବଂ ଭୂ-ପଦାର୍ଥ ବିଜ୍ଞାନ ଗବେଷଣା ସଂସ୍ଥାନ (NRIAG) ପକ୍ଷରୁ ଏହି ସୂଚନା ଦିଆଯାଇଛି।
ସ୍ଥାନୀୟ ସମୟ ପୂର୍ବାହ୍ନ ପ୍ରାୟ ୩:୦୦ଟା ସମୟରେ ଏହି ଭୂକମ୍ପ ଝଟ୍କା ଅନୁଭୂତ ହୋଇଥିଲା। ଏହାର ଭୂକମ୍ପ କେନ୍ଦ୍ରସ୍ଥଳ ଭୂପୃଷ୍ଠରୁ ପ୍ରାୟ ୧୦ କିଲୋମିଟର ଗଭୀରତାରେ ୩୦.୧୯ ଡିଗ୍ରୀ ଉତ୍ତର ଅକ୍ଷାଂଶ ଏବଂ ୩୨.୬୧ ଡିଗ୍ରୀ ପୂର୍ବ ଦ୍ରାଘିମାରେ ଅବସ୍ଥିତ ଥିଲା। ସ୍ଥାନୀୟ ବାସିନ୍ଦା ଏହି କମ୍ପନ ଅନୁଭବ କରିଥିଲେ ମଧ୍ୟ ଏହାଦ୍ୱାରା କୌଣସି ଧନଜୀବନ ହାନି କିମ୍ବା ସମ୍ପତ୍ତିର କ୍ଷତି ହୋଇନଥିବା ସଂସ୍ଥାନ ନିଶ୍ଚିତ କରିଛି। ରାଜଧାନୀ କାହିରାରେ ମଧ୍ୟ ଭୂକମ୍ପର ପ୍ରଭାବ ଦେଖିବାକୁ ମିଳିଥିଲା।
ଭୂକମ୍ପ ପରେ ମିଶରର ସ୍ୱାସ୍ଥ୍ୟ ଏବଂ ଜନସଂଖ୍ୟା ମନ୍ତ୍ରୀ ଖାଲେଦ ଅବଦେଲ-ଗଫାର ସ୍ୱାସ୍ଥ୍ୟ ଜରୁରୀକାଳୀନ ଯୋଜନାକୁ ତୁରନ୍ତ କାର୍ଯ୍ୟକାରୀ କରିବା ସହ ମନ୍ତ୍ରଣାଳୟର ସେଣ୍ଟ୍ରାଲ କ୍ରାଇସିସ ଏବଂ ଏମର୍ଜେନ୍ସି ଅପରେସନ ରୁମ୍ ସକ୍ରିୟ କରିବାକୁ ନିର୍ଦ୍ଦେଶ ଦେଇଛନ୍ତି। ଦେଶସାରା ଆମ୍ବୁଲାନ୍ସ ଏବଂ ଆପାତକାଳୀନ ସେବାକୁ ଆଲର୍ଟରେ ରଖାଯାଇଛି। ସୌଭାଗ୍ୟବଶତଃ, ଏପର୍ଯ୍ୟନ୍ତ କୌଣସି ଆହାତ କିମ୍ବା କ୍ଷତିଗ୍ରସ୍ତ ହେବାର ଖବର ମିଳିନାହିଁ।
ଇଜିପ୍ଟିଆନ୍ ରେଡ୍ କ୍ରେସେଣ୍ଟ (Egyptian Red Crescent) ମଧ୍ୟ ପ୍ରଭାବିତ ସହରଗୁଡ଼ିକରେ ନିଜର ଜରୁରୀକାଳୀନ ଯୋଜନାକୁ ସକ୍ରିୟ କରିଛି। ସୂଚନାଯୋଗ୍ୟ, ମିଶରର ଭୌଗୋଳିକ ଅବସ୍ଥିତି ସୁଏଜ୍ କେନାଲ, ଲୋହିତ ସାଗର ଏବଂ ଆକାବା ଉପସାଗର ନିକଟସ୍ଥ ଭୂକମ୍ପପ୍ରବଣ ଅଞ୍ଚଳରେ ଥିବାରୁ ଏଠାରେ ପ୍ରାୟତଃ ମୃଦୁରୁ ମାଧ୍ୟମ ଧରଣର ଭୂକମ୍ପ ଅନୁଭୂତ ହୋଇଥାଏ।