ଭୁବନେଶ୍ୱର, ୧୯ ଜୁନ: ବଲାଙ୍ଗୀର ଜିଲ୍ଲାରେ ଅବସ୍ଥିତ ବିଜୟାନନ୍ଦ ସମବାୟ ସୁଗାର ମିଲକୁ ପୁନରୁଦ୍ଧାର କରିବା ପାଇଁ ଓଡ଼ିଶା ସରକାର ପ୍ରକ୍ରିୟା ଆରମ୍ଭ କରିଛି। ଇଣ୍ଡିଆନ ପଟାଶ ଲିମିଟେଡ (ଆଇପିଏଲ) ଦ୍ୱାରା ଦିଆଯାଇଥିବା ପୁନରୁଦ୍ଧାର ପ୍ରସ୍ତାବକୁ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଅନୁମୋଦନ କରିଛନ୍ତି।
ଏହି ପ୍ରସ୍ତାବ ପୂର୍ବରୁ, ମୁଖ୍ୟମନ୍ତ୍ରୀ କେନ୍ଦ୍ର ସମବାୟ ମନ୍ତ୍ରୀ ଅମିତ ଶାହଙ୍କ ସହ ଓଡ଼ିଶାର ସମବାୟ ଚିନି ଶିଳ୍ପଗୁଡ଼ିକ ପୁନରୁଦ୍ଧାର ବିଷୟରେ ଆଲୋଚନା କରିଥିଲେ। ସମବାୟ ବିଭାଗ ପକ୍ଷରୁ ଆଇପିଏଲ ପ୍ରତି ଆନୁଷ୍ଠାନିକ ଅନୁରୋଧ ମଧ୍ୟ କରାଯାଇଛି।
ରାଜ୍ୟ ସରକାର ସୂଚନା ଅନୁଯାୟୀ, ଆଇପିଏଲ ଏଥିପାଇଁ ଆଗ୍ରହ ପ୍ରକାଶ କରି ଏକ ପ୍ରାଥମିକ ସର୍ଭେ ପରେ କିଛି ପଦକ୍ଷେପ ପ୍ରସ୍ତାବ କରିଛି। ଏହି ପରିପ୍ରେକ୍ଷୀରେ ସମବାୟ ସମିତି ରେଜିଷ୍ଟ୍ରାର ବଲାଙ୍ଗୀର ଜିଲ୍ଲାପାଳଙ୍କୁ ଚିଠି ଲେଖି ସୁଗାର ମିଲର ଅତିକ୍ରମଣ ମୁକ୍ତ ଜମି ବିଷୟରେ ରିପୋର୍ଟ ଦେବାକୁ ନିର୍ଦ୍ଦେଶ ଦେଇଛନ୍ତି।
ଅତିରିକ୍ତ ସମବାୟ ରେଜିଷ୍ଟ୍ରାର ଭକ୍ତବନ୍ଧୁ ସାହୁ ଜୁନ ୨୦ ରୁ ଦୁଇ ଦିନ ସୁଗାର ମିଲର ପରିଦର୍ଶନ କରିବେ। ସେଥିରେ ଜମି ଚିହ୍ନଟ ଓ ଅତିକ୍ରମଣ ଅବସ୍ଥା ନିରୂପଣ ପାଇଁ ଜିଲ୍ଲାପାଳଙ୍କ ସହଯୋଗ ଚାହାଯାଇଛି।