ରାଉରକେଲା: ମଇ ୨୫ ତାରିଖରେ ହୋଇଥିବା ଭୟଙ୍କର କାଳବୈଶାଖୀର ପ୍ରଭାବରୁ ଏପର୍ଯ୍ୟନ୍ତ ସମ୍ପୂର୍ଣ୍ଣ ମୁକୁଳି ପାରିନାହିଁ ଇସ୍ପାତ ନଗରୀ ରାଉରକେଲା। ଝଡ଼ର ପାଞ୍ଚ ଦିନ ପରେ ମଧ୍ୟ ସହରର କିଛି ଅଞ୍ଚଳରେ ପାନୀୟ ଜଳ ଓ ବିଦ୍ୟୁତ ସେବା ସ୍ୱାଭାବିକ ହୋଇପାରିନଥିବା ବେଳେ କ୍ଷତିଗ୍ରସ୍ତ ପରିବାରମାନେ ସରକାରୀ ସହାୟତା ଓ କ୍ଷତିପୂରଣ ନେଇ ଅସନ୍ତୋଷ ପ୍ରକାଶ କରିଛନ୍ତି।
ସରକାରୀ ତଥ୍ୟ ଅନୁସାରେ, କାଳବୈଶାଖୀ ଯୋଗୁଁ ସହରର ୨୦୩ଟି ଘର କ୍ଷତିଗ୍ରସ୍ତ ହୋଇଛି। ସେଥିମଧ୍ୟରୁ ୩୦ଟି ଘର ସମ୍ପୂର୍ଣ୍ଣ ଭାବେ ଧ୍ୱଂସ ହୋଇଥିବା ବେଳେ ୧୭୩ଟି ଘର ଆଂଶିକ କ୍ଷତିଗ୍ରସ୍ତ ହୋଇଛି। ଏହି ଘରଗୁଡ଼ିକ ମୁଖ୍ୟତଃ ରାଉରକେଲା ଇସ୍ପାତ କାରଖାନା ଏବଂ ରେଳବାଇ ଜମି ଉପରେ ଗଢ଼ିଉଠିଥିବା ବସ୍ତି ଅଞ୍ଚଳରେ ଅବସ୍ଥିତ।
ସର୍ବାଧିକ କ୍ଷୟକ୍ଷତି ସେକ୍ଟର-୨ ଅନ୍ତର୍ଗତ ଖରିଆବାହାଲ ବସ୍ତିରେ ହୋଇଥିବା ଜଣାପଡ଼ିଛି। ସ୍ଥାନୀୟ ବାସିନ୍ଦାଙ୍କ ଅଭିଯୋଗ ଅନୁଯାୟୀ, ବାସ୍ତବ କ୍ଷତିର ପରିମାଣ ସରକାରୀ ରିପୋର୍ଟଠାରୁ ଅଧିକ। ଅନେକ କ୍ଷତିଗ୍ରସ୍ତ ପରିବାରଙ୍କ ଘରକୁ ଏପର୍ଯ୍ୟନ୍ତ ସର୍ଭେ ଟିମ୍ ପହଞ୍ଚିନଥିବାରୁ ସେମାନେ ସରକାରୀ ସହାୟତାରୁ ବଞ୍ଚିତ ହେବା ଆଶଙ୍କା କରୁଛନ୍ତି।
ଝଡ଼ ସମୟରେ ତିନି ଜଣ ଆହତ ହୋଇଥିଲେ। ସେଥିମଧ୍ୟରୁ ଦୁଇ ଜଣ ସୁସ୍ଥ ହୋଇ ଘରକୁ ଫେରିଥିବା ବେଳେ ଅନ୍ୟ ଜଣେ ଏକ ବେସରକାରୀ ହସ୍ପିଟାଲରେ ଚିକିତ୍ସାଧୀନ ଅଛନ୍ତି। ପ୍ରଶାସନ ପକ୍ଷରୁ କ୍ଷତିଗ୍ରସ୍ତ ପରିବାରମାନଙ୍କୁ ପଲିଥିନ୍ ସିଟ୍ ବଣ୍ଟନ କରାଯାଇଛି।
ତେବେ ଅନେକ ପରିବାରଙ୍କ ଟିଣ ଓ ଆଜବେଷ୍ଟସ୍ ଛାତ ଉଡ଼ିଯାଇଥିବାରୁ ସେମାନେ ଏବେ ଖୋଲା ଆକାଶ ତଳେ କିମ୍ବା ସମ୍ପର୍କୀୟଙ୍କ ଘରେ ଆଶ୍ରୟ ନେଇଛନ୍ତି। ଅନେକ ଘରର ମରାମତି କାମ ଏପର୍ଯ୍ୟନ୍ତ ଆରମ୍ଭ ହୋଇନାହିଁ।
କାଳବୈଶାଖୀର ପ୍ରଭାବ କେବଳ ଘରବାଡ଼ିରେ ସୀମିତ ରହିନଥିଲା। ପ୍ରାଥମିକ ଆକଳନ ଅନୁଯାୟୀ, ସହରରେ ୨୫୦ରୁ ଅଧିକ ବଡ଼ ବୃକ୍ଷ ଉପୁଡ଼ି ପଡ଼ିଥିବା ବେଳେ ସହସ୍ରାଧିକ ଗଛର ଡାଳ ଭାଙ୍ଗିଯାଇଛି। ଘର ଉପରେ ପଡ଼ିଥିବା ଗଛଗୁଡ଼ିକୁ ହଟାଯାଇଥିଲେ ମଧ୍ୟ ଅନେକ ସ୍ଥାନରେ ସଫେଇ କାର୍ଯ୍ୟ ଅସମ୍ପୂର୍ଣ୍ଣ ରହିଛି।
ଏହି ପରିସ୍ଥିତିରେ ପ୍ରଭାବିତ ଲୋକମାନେ ତୁରନ୍ତ ଆର୍ଥିକ କ୍ଷତିପୂରଣ, ଘର ପୁନଃନିର୍ମାଣ ସହାୟତା ଏବଂ ପ୍ରଭାବିତ ଅଞ୍ଚଳରେ ସ୍ୱାଭାବିକ ଅବସ୍ଥା ଫେରାଇ ଆଣିବା ପାଇଁ ଜରୁରୀ ପଦକ୍ଷେପ ଦାବି କରିଛନ୍ତି।