ଅମୃତସର: ପଞ୍ଜାବ ସରକାର ଆଣିଥିବା ନୂଆ ଈଶନିନ୍ଦା ଆଇନକୁ ନେଇ ଶିଖ୍ ଧର୍ମଗୁରୁ ଓ ରାଜ୍ୟ ସରକାରଙ୍କ ମଧ୍ୟରେ ବିବାଦ ତୀବ୍ର ହୋଇଛି। ଅକାଳ ତଖତ ଶୁକ୍ରବାର ‘ଜଗତ ଜୋତ ଶ୍ରୀଗୁରୁଗ୍ରନ୍ଥସାହିବ ସତକାର (ସଂଶୋଧନ) ଅଧିନିୟମ-୨୦୨୬’କୁ ପ୍ରତ୍ୟାଖ୍ୟାନ କରିବା ସହ ଆମ୍ ଆଦମୀ ପାର୍ଟି ସରକାରକୁ ୧୫ ଦିନ ମଧ୍ୟରେ ଆଇନ ପ୍ରତ୍ୟାହାର କରିବାକୁ ଅଲ୍ଟିମେଟମ୍ ଜାରି କରିଛି।
ଏହି ଆଇନରେ ପବିତ୍ର ଶିଖ୍ ଧର୍ମଗ୍ରନ୍ଥ ଶ୍ରୀଗୁରୁଗ୍ରନ୍ଥ ସାହିବଙ୍କୁ ଅପମାନ କଲେ କଠୋର ଦଣ୍ଡର ବ୍ୟବସ୍ଥା ରହିଛି। କିନ୍ତୁ ଅକାଳ ତଖତ ଏହାକୁ ଧାର୍ମିକ ମାମଲାରେ ସରକାରୀ ହସ୍ତକ୍ଷେପ ବୋଲି ଅଭିଯୋଗ କରିଛି।
ପଞ୍ଜାବ ବିଧାନସଭା ବାଚସ୍ପତି କୁଲତାର ସିଂହ ସାନ୍ଧୱାନ କାର୍ଯ୍ୟନିର୍ବାହୀ ଜଠେଦାର ଜ୍ଞାନୀ କୁଲଦୀପ ସିଂହ ଗର୍ଗଜ ଓ ତଖତ ଦମଦମା ସାହିବ ଜଠେଦାର ଜ୍ଞାନୀ ଟେକ୍ ସିଂହ ଧନାଉଲାଙ୍କୁ ଭେଟିବା ପରେ ଧର୍ମଗୁରୁମାନେ ଏହି ଆଇନକୁ ତୁରନ୍ତ ରଦ୍ଦ କରିବାକୁ ଦାବି କରିଥିଲେ।
ଜଠେଦାରମାନେ ସ୍ପଷ୍ଟ କରିଛନ୍ତି ଯେ, ଶିରୋମଣି ଗୁରୁଦ୍ୱାରା ପ୍ରବନ୍ଧକ କମିଟି (ଏସ୍ଜିପିସି) ଗୁରୁଗ୍ରନ୍ଥ ସାହିବଙ୍କ ‘ସରୂପ’ ବା ପ୍ରତିର ରେକର୍ଡ ସରକାରୀ ନିରୀକ୍ଷଣରେ ଥିବା କୌଣସି ୱେବ୍ସାଇଟ୍ରେ ଅପଲୋଡ୍ କରିବ ନାହିଁ। ସେମାନଙ୍କ ମତରେ, ଧାର୍ମିକ ରେକର୍ଡ ଓ ପବିତ୍ର ଗୁରୁଙ୍କ ପରିଚାଳନା କେବଳ ପନ୍ଥର ଅଧିକାର କ୍ଷେତ୍ରରେ ପଡ଼େ ଏବଂ ଏହା ଉପରେ ରାଜ୍ୟର ଡିଜିଟାଲ୍ ନିରୀକ୍ଷଣ ଲାଗୁ ହୋଇପାରିବ ନାହିଁ।
ସ୍ୱର୍ଣ୍ଣ ମନ୍ଦିର ପରିସରରେ ସାନ୍ଧୱାନ ସରକାରର ମତ ସ୍ପଷ୍ଟ କରି କହିଥିଲେ ଯେ, ପବିତ୍ର ଗ୍ରନ୍ଥ ଅପମାନକାରୀଙ୍କ ବିରୋଧରେ କଠୋର ଆଇନ ଆଣିବା ସମୟର ଆବଶ୍ୟକତା ଥିଲା। ସେ ଦାବି କରିଥିଲେ ଯେ, ଆଇନ ଆଣିବା ପୂର୍ବରୁ ଖବରକାଗଜରେ ବିଜ୍ଞାପନ ଦେଇ ପରାମର୍ଶ ମଧ୍ୟ ମାଗାଯାଇଥିଲା।
ତେବେ ସରକାରୀ ସ୍ପଷ୍ଟୀକରଣରେ ଧର୍ମଗୁରୁମାନେ ସନ୍ତୁଷ୍ଟ ହୋଇନଥିଲେ। କାର୍ଯ୍ୟନିର୍ବାହୀ ଜଠେଦାର ଜ୍ଞାନୀ ଗର୍ଗଜ ମୁଖ୍ୟମନ୍ତ୍ରୀ ଭଗବନ୍ତ ମାନଙ୍କ ‘ଶୁକ୍ରାନା ଯାତ୍ରା’କୁ ସମାଲୋଚନା କରି କହିଥିଲେ ଯେ, ଅକାଳ ତଖତ ଆଇନକୁ ଗ୍ରହଣ କରିନଥିବା ସତ୍ତ୍ୱେ ସରକାର ଧନ୍ୟବାଦ ଯାତ୍ରା କରିବା ତଖତର ସାର୍ବଭୌମତ୍ୱକୁ ଚ୍ୟାଲେଞ୍ଜ କରିବା ସମାନ।
ଧର୍ମଗୁରୁମାନେ ଚେତାବନୀ ଦେଇଛନ୍ତି ଯେ, ଯଦି ୧୫ ଦିନ ମଧ୍ୟରେ ଆଇନକୁ ପ୍ରତ୍ୟାହାର କରାଯିବ ନାହିଁ, ତେବେ ପଞ୍ଜ ସିଂହ ସାହିବାନଙ୍କ ବୈଠକ ଡାକି ସରକାର ବିରୋଧରେ ଆନୁଷ୍ଠାନିକ ‘ହୁକାମନାମା’ ଜାରି କରାଯିବ।