ନୂଆଦିଲ୍ଲୀ: ମଧ୍ୟପ୍ରାଚ୍ୟରେ ଚାଲୁଥିବା ଯୁଦ୍ଧ ପରିସ୍ଥିତିକୁ ନେଇ ଦେଶରେ ରନ୍ଧନ ଗ୍ୟାସ୍ ଯୋଗାଣ ବିଷୟରେ ଆଶଙ୍କା ବଢ଼ିଛି। ଏହାର ପ୍ରଭାବରେ ଗ୍ରାହକମାନେ ଭୟରେ ଅଧିକ ସଂଖ୍ୟାରେ ଏଲ୍ପିଜି ସିଲିଣ୍ଡର ବୁକିଂ କରୁଥିବା ଦେଖାଯାଇଛି। ଏହାକୁ ଦୃଷ୍ଟିରେ ରଖି ସରକାର ଲୋକମାନଙ୍କୁ ଆବଶ୍ୟକତା ଅନୁଯାୟୀ ମାତ୍ର ଗ୍ୟାସ୍ ବୁକିଂ କରିବାକୁ ପରାମର୍ଶ ଦେଇଛି।
Ministry of Petroleum and Natural Gasର ଯୁଗ୍ମ ସଚିବ Sujata Sharma ଏକ ସାମ୍ବାଦିକ ସମ୍ମିଳନୀରେ କହିଛନ୍ତି ଯେ, ଚଳିତ ବର୍ଷ ଏପ୍ରିଲ୍ରୁ ଫେବୃଆରୀ ମଧ୍ୟରେ ଦେଶରେ ଦୈନିକ ସରାସରି ୫୫.୭ ଲକ୍ଷ ଏଲ୍ପିଜି ସିଲିଣ୍ଡର ବୁକିଂ ହେଉଥିଲା। କିନ୍ତୁ ଯୁଦ୍ଧ ପରିସ୍ଥିତି ପରେ ଏହି ସଂଖ୍ୟା ପ୍ରାୟ ୩୫ ପ୍ରତିଶତ ବୃଦ୍ଧି ପାଇ ମାର୍ଚ୍ଚ ୧୨ରେ ୭୫.୭ ଲକ୍ଷରେ ପହଞ୍ଚିଛି।
ସରକାରଙ୍କ ମତାନୁସାରେ ଗୁଜବ ଓ ଭୁଲ୍ ସମ୍ବାଦ ପ୍ରଚାର ହେତୁ ଲୋକମାନେ ଭୟରେ ଅଧିକ ଗ୍ୟାସ୍ ବୁକିଂ କରୁଛନ୍ତି। ତେଣୁ ଆତଙ୍କରେ ଅନାବଶ୍ୟକ ବୁକିଂ ନକରିବାକୁ ସରକାର ପରାମର୍ଶ ଦେଇଛି। ସମସ୍ତ ପରିବାରକୁ ନିରବଚ୍ଛିନ୍ନ ଭାବରେ ଏଲ୍ପିଜି ଯୋଗାଣ ନିଶ୍ଚିତ କରିବାକୁ ପଦକ୍ଷେପ ନିଆଯାଉଥିବା ସୂଚନା ମିଳିଛି।
ଏହାସହିତ ସରକାର ବାଣିଜ୍ୟିକ ଏଲ୍ପିଜି ଯୋଗାଣ ଉପରେ କିଛି କଟକଣା ଲାଗୁ କରି ଘରୋଇ ଗ୍ୟାସ୍ ଯୋଗାଣକୁ ପ୍ରାଥମ୍ୟ ଦେଉଛନ୍ତି। ପୁଲିସ ଓ ରାଜ୍ୟ ସରକାରଙ୍କ ସହଯୋଗରେ କଳାବଜାରୀ ଓ ମଜୁତକାରୀଙ୍କ ବିରୋଧରେ ମଧ୍ୟ କାର୍ଯ୍ୟାନୁଷ୍ଠାନ ଜାରି ରହିଛି।
ଅନ୍ୟପଟେ ଯେଉଁ ଅଞ୍ଚଳରେ ପାଇପ୍ ଯୋଗେ ଗ୍ୟାସ୍ (PNG) ସୁବିଧା ଉପଲବ୍ଧ ଅଛି, ସେଠାରେ ବସୁଥିବା ପରିବାରମାନଙ୍କୁ ସେହି ସଂଯୋଗ ନେବାକୁ ସରକାର ପରାମର୍ଶ ଦେଇଛି। ଏହା ଦ୍ୱାରା ଏଲ୍ପିଜି ଉପରେ ପଡୁଥିବା ଚାପ କମିପାରିବ।
ସରକାରୀ ତଥ୍ୟ ଅନୁସାରେ ଦେଶରେ ପ୍ରାୟ ୩୩.୪ କୋଟି ପରିବାର ଏଲ୍ପିଜି ସଂଯୋଗ ନେଇଥିବାବେଳେ କେବଳ ୧.୫ କୋଟି ପରିବାର ପାଇପ୍ ଯୋଗେ ଗ୍ୟାସ୍ ସଂଯୋଗ ବ୍ୟବହାର କରୁଛନ୍ତି। ଏହାସହିତ ପ୍ରାୟ ୬୦ ଲକ୍ଷ ପରିବାର ଏମିତି ଅଛନ୍ତି, ଯାହାଙ୍କ ଘର ନିକଟରେ ପିଏନ୍ଜି ସୁବିଧା ଥିଲେ ମଧ୍ୟ ସେମାନେ ଏହାର ଉପଯୋଗ କରୁନାହାନ୍ତି।