ନୂଆଦିଲ୍ଲୀ: ଜନ୍ତର ମନ୍ତରରେ ଚାଲିଥିବା ଛାତ୍ର ଆନ୍ଦୋଳନ ଏବଂ ବିକ୍ଷୋଭକୁ ଦୃଷ୍ଟିରେ ରଖି ବୁଧବାର ସେଣ୍ଟ୍ରାଲ ଦିଲ୍ଲୀର ୧୬ଟି ପ୍ରମୁଖ ମେଟ୍ରୋ ଷ୍ଟେସନକୁ ବନ୍ଦ କରିଦିଆଯାଇଛି। ସୁରକ୍ଷା ବ୍ୟବସ୍ଥାକୁ ଅଧିକ କଡ଼ାକଡ଼ି କରିବା ଏବଂ ଆଇନ ଶୃଙ୍ଖଳା ପରିସ୍ଥିତି ନିୟନ୍ତ୍ରଣରେ ରଖିବା ପାଇଁ ଦିଲ୍ଲୀ ପୋଲିସ ଓ ମେଟ୍ରୋ କର୍ତ୍ତୃପକ୍ଷଙ୍କ ପକ୍ଷରୁ ଏହି ପଦକ୍ଷେପ ନିଆଯାଇଛି।
ଦିଲ୍ଲୀ ମେଟ୍ରୋ ରେଲ୍ କର୍ପୋରେସନ୍ (DMRC) ଅନୁଯାୟୀ, ଷ୍ଟେସନଗୁଡ଼ିକ ସମ୍ପୂର୍ଣ୍ଣ ବନ୍ଦ ରହିଥିଲେ ସୁଦ୍ଧା ରାଜୀବ ଚୌକ୍, ମଣ୍ଡି ହାଉସ୍ ଏବଂ ସେଣ୍ଟ୍ରାଲ ସେକ୍ରେଟେରିଏଟ୍ରେ ଇଣ୍ଟରଚେଞ୍ଜ (ଲାଇନ୍ ବଦଳାଇବା) ସୁବିଧା ପୂର୍ବପରି ଚାଲୁ ରହିଛି।
ଲୋକ କଲ୍ୟାଣ ମାର୍ଗ, ରାଜୀବ ଚୌକ୍, ପଟେଲ ଚୌକ୍, ରାମକୃଷ୍ଣ ଆଶ୍ରମ ମାର୍ଗ, ବାରାଖମ୍ବା ରୋଡ୍, ସୁପ୍ରିମ୍ କୋର୍ଟ, ସେବା ତୀର୍ଥ, ଜନପଥ, ମଣ୍ଡି ହାଉସ୍, ସେଣ୍ଟ୍ରାଲ ସେକ୍ରେଟେରିଏଟ୍, ଆଇଟିଓ (ITO), ଦିଲ୍ଲୀ ଗେଟ୍, ଇନ୍ଦ୍ରପ୍ରସ୍ଥ, ଖାନ୍ ମାର୍କେଟ୍, ଜୋରବାଗ୍ ଏବଂ ଶିବାଜୀ ଷ୍ଟାଡିୟମ୍।
ନୀଟ୍ (NEET-UG) ପ୍ରଶ୍ନପତ୍ର ଲିକ୍ ଓ ପରୀକ୍ଷାରେ କ୍ରମାଗତ ଅନିୟମିତତାକୁ ନେଇ କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଇସ୍ତଫା ଦାବିରେ ‘କାକରୋଚ ଜନତା ପାର୍ଟି’ (CJP) ଓ ହଜାର ହଜାର ଛାତ୍ରଜନତା ଜନ୍ତର ମନ୍ତରରୁ ସଂସଦ ଆଡ଼କୁ ପଦଯାତ୍ରା କରିଥିଲେ। ସୋମବାର ଏହି ପ୍ରତିବାଦ ସମୟରେ ଉତ୍ତେଜନା ଓ ହିଂସାକାଣ୍ଡ ଘଟିଥିଲା।
ଅନ୍ୟପଟେ, ଜଳବାୟୁ କର୍ମୀ ସୋନମ ୱାଙ୍ଗଚୁକଙ୍କ ଅନିର୍ଦ୍ଦିଷ୍ଟ କାଳୀନ ଅନଶନ ବୁଧବାର ୨୫ ଦିନରେ ପହଞ୍ଚିଛି। ଦିଲ୍ଲୀ ହାଇକୋର୍ଟଙ୍କ ନିର୍ଦ୍ଦେଶକ୍ରମେ ତାଙ୍କୁ ସଫଦରଜଙ୍ଗ ହସ୍ପିଟାଲରୁ ଗୁରୁଗ୍ରାମସ୍ଥିତ ମେଦାନ୍ତ ହସ୍ପିଟାଲକୁ ସ୍ଥାନାନ୍ତର କରାଯାଇଛି। ସେଠାରେ ଡାକ୍ତର ସୁଶୀଳା କାଟାରିଆଙ୍କ ତତ୍ତ୍ୱାବଧାନରେ ତାଙ୍କୁ ICUରେ ରଖାଯାଇଛି।
ମଙ୍ଗଳବାର ରାତିରେ କେନ୍ଦ୍ରମନ୍ତ୍ରୀ ଜେ.ପି. ନଡ୍ଡା ଏବଂ ଜିତେନ୍ଦ୍ର ସିଂହ ମେଦାନ୍ତ ହସ୍ପିଟାଲରେ ପହଞ୍ଚି ସୋନମ ୱାଙ୍ଗଚୁକଙ୍କୁ ଭେଟିବା ସହ ତାଙ୍କ ସ୍ୱାସ୍ଥ୍ୟବସ୍ଥା ସମ୍ପର୍କରେ ଆଲୋଚନା କରିଛନ୍ତି। ସମ୍ପ୍ରତି ସମଗ୍ର ଦିଲ୍ଲୀରେ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଛି।