ଦେଶକୁ ଅଧିକ ବିଦେଶୀ ପୁଞ୍ଜି ଆଣିବା ପାଇଁ ସରକାର ନେବେ ଆହୁରି ପଦକ୍ଷେପ: କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ
ନୂଆଦିଲ୍ଲୀ: ଭାରତୀୟ ଅର୍ଥବ୍ୟବସ୍ଥାରେ ଅଧିକ ବିଦେଶୀ ପୁଞ୍ଜି ଆକୃଷ୍ଟ କରିବା ପାଇଁ ସରକାର ଆଗାମୀ ଦିନରେ ଅଧିକ ପଦକ୍ଷେପ ନେବେ ବୋଲି ସୋମବାର କହିଛନ୍ତି କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ। ‘ହିରୋ ମାଇଣ୍ଡମାଇନ୍ ସମ୍ମିଟ୍ ୨୦୨୬’ରେ ଉଦବୋଧନ ଦେଇ ସେ ସ୍ପଷ୍ଟ କରିଛନ୍ତି ଯେ, ବଣ୍ଡ ବଜାର ପାଇଁ ନିକଟରେ ଘୋଷଣା କରାଯାଇଥିବା ପଦକ୍ଷେପଗୁଡ଼ିକ କେବଳ ଏକ ଆରମ୍ଭ ମାତ୍ର।
ଭାରତକୁ ଅଧିକ ବିଦେଶୀ ପୁଞ୍ଜିର ଆବଶ୍ୟକତା ରହିଛି ଏବଂ ଏଥିପାଇଁ ସରକାର ଭାରତୀୟ ରିଜର୍ଭ ବ୍ୟାଙ୍କ (RBI) ସହ ମିଶି କାର୍ଯ୍ୟ କରୁଛନ୍ତି। ବଣ୍ଡ ବଜାର ବିଦେଶୀ ପୁଞ୍ଜିକୁ ଗ୍ରହଣ କରିବା ପାଇଁ ଏକ ଭଲ ମାଧ୍ୟମ ହୋଇପାରିବ। ବର୍ତ୍ତମାନ କେବଳ ସରକାରୀ ସିକ୍ୟୁରିଟି ପାଇଁ ଏହି ସୁବିଧା ଥିବାବେଳେ, ଭବିଷ୍ୟତରେ ଏହାର ପରିସର ବଢ଼ିବ।
ବଢ଼ୁଥିବା ବାହ୍ୟ ଚାହିଦାକୁ ପୂରଣ କରିବା ପାଇଁ ଦେଶର ବୈଦେଶିକ ମୁଦ୍ରା ଭଣ୍ଡାର ସୁଦୃଢ଼ ରହିବା ଆବଶ୍ୟକ। ଅର୍ଥମନ୍ତ୍ରୀ ସୀତାରମଣ ସ୍ୱୀକାର କରିଛନ୍ତି ଯେ, ବର୍ତ୍ତମାନ ବିଶ୍ୱବ୍ୟାପୀ ଅନିଶ୍ଚିତତା ରହିଛି। ବିଶେଷକରି କଞ୍ଚା ତେଲର ମୂଲ୍ୟ ବୃଦ୍ଧି, ବୀମା ଖର୍ଚ୍ଚ ଏବଂ ଯୋଗାଣ ଶୃଙ୍ଖଳାରେ ବାଧା ଭାରତ ପାଇଁ ଏକ ଚ୍ୟାଲେଞ୍ଜ ସୃଷ୍ଟି କରିଛି। ସେ କହିଛନ୍ତି, “କେବଳ କଞ୍ଚା ତେଲର ଦର ନୁହେଁ, ବରଂ ହରମୁଜ ପ୍ରଣାଳୀ ଦେଇ ଯାଉଥିବା ଜାହାଜଗୁଡ଼ିକର ବୀମା ଏବଂ ସୁରକ୍ଷା ଜନିତ ଆଶଙ୍କା ମଧ୍ୟ ବଢ଼ିଛି।” ତଥାପି, ଭାରତର ବୃହତ ଘରୋଇ ବଜାର ଏବଂ ବଢ଼ୁଥିବା ଚାହିଦା ଅର୍ଥବ୍ୟବସ୍ଥାକୁ ସୁରକ୍ଷା ପ୍ରଦାନ କରୁଛି।
ଦେଶରେ ଡାଟା ସେଣ୍ଟର ଏବଂ ଗ୍ଲୋବାଲ କ୍ୟାପିବିଲିଟି ସେଣ୍ଟର (GCC) ର ଦ୍ରୁତ ବିକାଶ ଉପରେ ସେ ଆଲୋକପାତ କରିଛନ୍ତି। ପୂର୍ବରୁ କେବଳ ବେଙ୍ଗାଲୁରୁ, ହାଇଦ୍ରାବାଦ ଏବଂ ଦିଲ୍ଲୀ NCR ରେ ସୀମିତ ଥିବା ଏହି ସେବା ଏବେ ଟୁମାକୁରୁ ଏବଂ ମଙ୍ଗାଲୁରୁ ଭଳି ଟାୟାର-୨ ସହରକୁ ବ୍ୟାପିଛି। ଏହାଦ୍ୱାରା ସ୍ଥାନୀୟ ଅର୍ଥନୀତିକୁ ଗତି ମିଳିବା ସହ ନିଯୁକ୍ତି ସୁଯୋଗ ସୃଷ୍ଟି ହେଉଛି। ସରକାର ଏବଂ ରାଜ୍ୟଗୁଡ଼ିକର ସକ୍ରିୟ ସହଯୋଗ ଯୋଗୁଁ ଯୁବପିଢ଼ି ଏହି ପ୍ରଯୁକ୍ତିବିଦ୍ୟାକୁ ସହଜରେ ଗ୍ରହଣ କରୁଛନ୍ତି।