ନୂଆଦିଲ୍ଲୀ: ରେଳଯାତ୍ରୀଙ୍କୁ ଯୋଗାଇ ଦିଆଯାଉଥିବା ଖାଦ୍ୟର ଗୁଣବତ୍ତା ଏବଂ ସ୍ୱଚ୍ଛତାକୁ ଆହୁରି ସୁଦୃଢ଼ କରିବା ଲକ୍ଷ୍ୟରେ IRCTC ପକ୍ଷରୁ ଏକ ଆଧୁନିକ ଏଆଇ-ଆଧାରିତ ମନିଟରିଂ ବ୍ୟବସ୍ଥା କାର୍ଯ୍ୟକାରୀ କରାଯାଇଛି। ଏହି ବ୍ୟବସ୍ଥା ଅନୁଯାୟୀ ଦେଶବ୍ୟାପୀ ଟ୍ରେନ୍ ଏବଂ ଷ୍ଟେସନରେ ଖାଦ୍ୟ ପ୍ରସ୍ତୁତ କରୁଥିବା ବେସ୍ କିଚେନ୍ଗୁଡ଼ିକ ଉପରେ ଚବିଶ ଘଣ୍ଟିଆ ନଜର ରଖାଯିବ।
ନୂତନ ବ୍ୟବସ୍ଥା ଅଧୀନରେ ସାରା ଦେଶର ୮୦୦ରୁ ଅଧିକ ଆଇଆରସିଟିସି ରୋଷେଇ ଘରକୁ ୨,୩୯୪ଟି ଏଆଇ ସକ୍ଷମ ସିସିଟିଭି କ୍ୟାମେରା ସହ ସଂଯୋଗ କରାଯାଇଛି। ଏହି ସମଗ୍ର ବ୍ୟବସ୍ଥାର ନିରୀକ୍ଷଣ ନୂଆଦିଲ୍ଲୀରେ ଥିବା କେନ୍ଦ୍ରୀୟ ୱାର୍ ରୁମରୁ କରାଯାଉଛି।
ଏହି ଏଆଇ ପ୍ରଯୁକ୍ତି ରୋଷେଇ ଘରର ୯ ପ୍ରକାର ସ୍ୱଚ୍ଛତା ସମ୍ବନ୍ଧୀୟ ତ୍ରୁଟିକୁ ସ୍ୱୟଂଚାଳିତ ଭାବେ ଚିହ୍ନଟ କରିପାରୁଛି। ଏଥିରେ କର୍ମଚାରୀମାନେ ହେୟାରନେଟ୍ ଏବଂ ଗ୍ଲୋଭସ୍ ପିନ୍ଧିଛନ୍ତି କି ନାହିଁ, ରୋଷେଇ ଘର ସଫା ଅଛି କି ନାହିଁ, ଏବଂ ମୂଷା, ମାଛି କିମ୍ବା ଅସରପା ପରି କୀଟପତଙ୍ଗର ଉପସ୍ଥିତି ଅଛି କି ନାହିଁ—ସବୁ ଉପରେ ନଜର ରଖାଯାଉଛି।
ପ୍ରାୟ ଢେଢ଼ରୁ ଦୁଇ ବର୍ଷ ପୂର୍ବରୁ ଆରମ୍ଭ ହୋଇଥିବା ଏହି ବ୍ୟବସ୍ଥାକୁ ଏବେ ଆହୁରି ବିସ୍ତାର କରାଯାଉଛି। ଅଧିକ ସଂଖ୍ୟକ କର୍ମଚାରୀ ଏବଂ ସ୍ୱଚ୍ଛତା ନିୟମକୁ ଏଥିରେ ସାମିଲ କରାଯାଉଛି।
ଜଣେ ବରିଷ୍ଠ ଅଧିକାରୀଙ୍କ ସୂଚନା ଅନୁଯାୟୀ, ଏହି ସିଷ୍ଟମ ଏତେ ସଂବେଦନଶୀଳ ଯେ ୭ରୁ ୮ ମିଲିମିଟର ଆକାରର କୀଟପତଙ୍ଗକୁ ମଧ୍ୟ ଚିହ୍ନଟ କରିପାରୁଛି। କୌଣସି ଅସ୍ୱାସ୍ଥ୍ୟକର ପରିସ୍ଥିତି ଚିହ୍ନଟ ହେଲେ ସମ୍ପୃକ୍ତ କିଚେନ୍ ମ୍ୟାନେଜରଙ୍କୁ ତୁରନ୍ତ ଆଲର୍ଟ ପଠାଯାଏ। ନିର୍ଦ୍ଧାରିତ ସମୟ ମଧ୍ୟରେ ସମସ୍ୟାର ସମାଧାନ ନ ହେଲେ ମାମଲାକୁ ଉଚ୍ଚସ୍ତରୀୟ ଅଧିକାରୀଙ୍କ ନିକଟକୁ ପଠାଯାଇଥାଏ।
ତଥ୍ୟ ଅନୁସାରେ, ଏହି ବ୍ୟବସ୍ଥା ଦ୍ୱାରା ପ୍ରତିଦିନ ହାରାହାରି ୩୫୦ଟି ଆଲର୍ଟ ସୃଷ୍ଟି ହେଉଛି। ଗତ ମାସରେ ମୋଟ ୧୩,୫୫୦ଟି ଆଲର୍ଟ ରେକର୍ଡ ହୋଇଥିବାବେଳେ ସବୁଠାରୁ ଅଧିକ ମାମଲା ଉତ୍ତର ରେଳ ସଞ୍ଚାଳନ କ୍ଷେତ୍ରରୁ ଆସିଥିବା ଜଣାପଡ଼ିଛି। ଯଦିଓ କିଛି କ୍ଷେତ୍ରରେ ଭୁଲ୍ ଆଲର୍ଟ ମଧ୍ୟ ଦେଖାଯାଇଛି, ତଥାପି ଖାଦ୍ୟ ସୁରକ୍ଷା ଏବଂ ଶୃଙ୍ଖଳା ରକ୍ଷାରେ ଏହି ବ୍ୟବସ୍ଥାକୁ ଗୁରୁତ୍ୱପୂର୍ଣ୍ଣ ପଦକ୍ଷେପ ଭାବେ ଦେଖାଯାଉଛି।