NEET ସଂସ୍କାର: କେନ୍ଦ୍ରର ରୋଡମ୍ୟାପ୍କୁ ନିବିଡ଼ ଭାବେ ନଜର ରଖିବେ ସୁପ୍ରିମକୋର୍ଟ, ମାଗିଲେ ବିସ୍ତୃତ ସତ୍ୟପାଠ
ନୂଆଦିଲ୍ଲୀ: ନ୍ୟାସନାଲ ଟେଷ୍ଟିଂ ଏଜେନ୍ସି (NTA)ର ଆନୁଷ୍ଠାନିକ ସଂସ୍କାର ଏବଂ ଆଗାମୀ ଦିନରେ ପ୍ରଶ୍ନପତ୍ର ଲିକ୍ ରୋକିବା ପାଇଁ କେନ୍ଦ୍ର ସରକାର ଗ୍ରହଣ କରୁଥିବା ପଦକ୍ଷେପକୁ ସୁପ୍ରିମକୋର୍ଟ “ଅତ୍ୟନ୍ତ ନିବିଡ଼ ଭାବେ” ତଦାରଖ କରିବେ। NEET-UG ପରୀକ୍ଷା ପରିଚାଳନାରେ ସଂସ୍କାର ଆଣିବାକୁ ଦାୟର ଆବେଦନଗୁଡ଼ିକର ଶୁଣାଣି କରି ଜଷ୍ଟିସ ପି.ଏସ. ନରସିଂହା ଏବଂ ଜଷ୍ଟିସ ଆଲୋକ ଆରାଧେଙ୍କ ଖଣ୍ଡପୀଠ ଶୁକ୍ରବାର କେନ୍ଦ୍ର ସରକାରଙ୍କୁ ଏକ ବିସ୍ତୃତ ସତ୍ୟପାଠ ଦାଖଲ କରିବାକୁ ନିର୍ଦ୍ଦେଶ ଦେଇଛନ୍ତି।
ଏହି ମାମଲାର ପରବର୍ତ୍ତୀ ଶୁଣାଣି ଜୁଲାଇ ୨୭ ତାରିଖରେ ହେବ। ସଲିସିଟର ଜେନେରାଲ (SG) ତୁଷାର ମେହେଟ୍ଟା ସରକାରଙ୍କ ପକ୍ଷରୁ ସଂସ୍କାରର ଏକ ସମ୍ପୂର୍ଣ୍ଣ ଚିତ୍ର ଉପସ୍ଥାପନ କରିବା ପାଇଁ କିଛି ଦିନ ସମୟ ମାଗିଥିଲେ।
ସୁପ୍ରିମକୋର୍ଟ ନିର୍ଦ୍ଦେଶ ଦେଇଛନ୍ତି ଯେ ସରକାର ଦାଖଲ କରିବାକୁ ଥିବା ସତ୍ୟପାଠରେ ନିମ୍ନଲିଖିତ ପ୍ରମୁଖ ବିନ୍ଦୁଗୁଡ଼ିକ ଉଲ୍ଲେଖ ରହିବା ଆବଶ୍ୟକ:
- CBT ମୋଡ୍କୁ ସ୍ଥାନାନ୍ତର: NEET ପରୀକ୍ଷାକୁ କମ୍ପ୍ୟୁଟର ବେସଡ୍ ଟେଷ୍ଟିଂ (CBT) ମୋଡ୍କୁ ନିଆଯାଇପାରିବ କି ନାହିଁ?
- ସାଇବର ସୁରକ୍ଷା: ପରୀକ୍ଷା ପ୍ରଣାଳୀ ଡିଜିଟାଲ ହେଲେ ଡାଟା ସୁରକ୍ଷା ଏବଂ ସାଇବର ସିକ୍ୟୁରିଟି ପାଇଁ କି ପ୍ରକାର ବ୍ୟବସ୍ଥା ଗ୍ରହଣ କରାଯିବ?
- ନିୟମିତ ସଂସ୍କାର: ଅସ୍ଥାୟୀ ବ୍ୟବସ୍ଥା (Ad-hocism) ବଦଳରେ ପରୀକ୍ଷା ପରିଚାଳନା ପାଇଁ କିପରି ଏକ ସ୍ଥାୟୀ ଓ ସୁଦୃଢ଼ ଭିତ୍ତିଭୂମି ଗଢ଼ାଯାଇପାରିବ?
- ରାଧାକ୍ରିଷ୍ଣନ୍ କମିଟି ସୁପାରିଶ: ଆଇଏସଆରଓ (ISRO)ର ପ୍ରାକ୍ତନ ଅଧ୍ୟକ୍ଷ କେ. ରାଧାକ୍ରିଷ୍ଣନ୍ଙ୍କ ନେତୃତ୍ୱାଧୀନ କମିଟିର ସୁପାରିଶ ଅନୁସାରେ NTAର ପରିଚାଳନା ବୋର୍ଡ ଗଠନ, ଆଇଆଇଟି (IIT) ପରି ବୈଷୟିକ ଅନୁଷ୍ଠାନର ଭାଗିଦାରୀ ଏବଂ ସ୍ୱଚ୍ଛତା ଆଣିବାକୁ ନିଆଯାଉଥିବା ପଦକ୍ଷେପ।
ସଲିସିଟର ଜେନେରାଲ କୋର୍ଟଙ୍କୁ ପ୍ରତିଶ୍ରୁତି ଦେଇଛନ୍ତି ଯେ ସରକାର ରାଧାକ୍ରିଷ୍ଣନ୍ କମିଟିର ସୁପାରିଶକୁ ପୂର୍ଣ୍ଣମାତ୍ରାରେ ଗ୍ରହଣ କରିଛନ୍ତି। ପ୍ରଶ୍ନପତ୍ର ଛପା ହେବା ଠାରୁ ଆରମ୍ଭ କରି ପରୀକ୍ଷାର୍ଥୀଙ୍କ ନିକଟରେ ପହଞ୍ଚିବା ପର୍ଯ୍ୟନ୍ତ ସମ୍ପୂର୍ଣ୍ଣ ପ୍ରକ୍ରିୟାକୁ ସୁରକ୍ଷିତ କରିବା ପାଇଁ ସର୍ବୋଚ୍ଚ ପ୍ରଶାସନିକ ସ୍ତରରେ ନଜର ରଖାଯାଉଛି।
ଅପରପକ୍ଷରେ, ପ୍ରଶ୍ନପତ୍ର ଲିକ୍ ରୋକିବା ପାଇଁ କେନ୍ଦ୍ର ସରକାର ଏକ କଡ଼ା ବିଲ୍ ଆଣିବାକୁ ପ୍ରସ୍ତୁତି କରିଛନ୍ତି, ଯେଉଁଥିରେ ଦୋଷୀଙ୍କ ପାଇଁ କଠୋର ଦଣ୍ଡବିଧାନ ଏବଂ ତ୍ୱରିତ ଶୁଣାଣି ପାଇଁ ଫାଷ୍ଟ-ଟ୍ରାକ୍ ସ୍ୱତନ୍ତ୍ର ଅଦାଲତ ଗଠନର ପ୍ରାବଧାନ ରହିଛି।