ଚେନ୍ନାଇ: ତାମିଲନାଡୁ ମୁଖ୍ୟମନ୍ତ୍ରୀ ତଥା ତାମିଲଗା ଭେଟ୍ରି କାଜଗମ (TVK) ସଭାପତି ସି. ଜୋସେଫ୍ ବିଜୟ ସୋମବାର ପୂର୍ବତନ ମୁଖ୍ୟମନ୍ତ୍ରୀ ଏବଂ ଡିଏମକେ (DMK) ଅଧ୍ୟକ୍ଷ ଏମ.କେ. ଷ୍ଟାଲିନଙ୍କୁ ତାଙ୍କ ଆଲୱାରପେଟ୍ ବାସଭବନରେ ଭେଟିଛନ୍ତି। ନିର୍ବାଚନ ପରବର୍ତ୍ତୀ ରାଜନୈତିକ ସମୀକରଣ ବଦଳିବା ପରେ ଏହି ସାକ୍ଷାତକାରକୁ ବେଶ ଗୁରୁତ୍ୱପୂର୍ଣ୍ଣ ମନେ କରାଯାଉଛି।
ନିଜ ଦଳ TVK କୁ ଏକ ଐତିହାସିକ ନିର୍ବାଚନୀ ସଫଳତା ଦେଇଥିବା ବିଜୟ, ବିଧାନସଭାରେ ନବନିର୍ବାଚିତ ବିଧାୟକଙ୍କ ଶପଥ ଗ୍ରହଣ ଉତ୍ସବରେ ଯୋଗଦେବା ପରେ ଷ୍ଟାଲିନଙ୍କୁ ଭେଟିବାକୁ ଯାଇଥିଲେ। ଡିଏମକେର ପୁରୁଣା ସହଯୋଗୀମାନେ ଟିଭିକେ ସରକାର ଗଠନରେ ନିର୍ଣ୍ଣାୟକ ଭୂମିକା ଗ୍ରହଣ କରିଥିବାରୁ ଏହି ବୈଠକ ଉପରେ ସମସ୍ତଙ୍କ ନଜର ରହିଛି।
ସୂଚନାଯୋଗ୍ୟ ଯେ, ତାମିଲନାଡୁ ବିଧାନସଭା ନିର୍ବାଚନରେ ଟିଭିକେ ୨୩୪ଟି ଆସନରୁ ୧୦୮ଟି ଜିତି ସବୁଠାରୁ ବଡ଼ ଦଳ ଭାବେ ଉଭା ହୋଇଥିଲା। ତେବେ ବହୁମତ ପାଇଁ ଆବଶ୍ୟକ ୧୧୮ଟି ଆସନ ନଥିବାରୁ ବିଜୟ ପୂର୍ବରୁ ଡିଏମକେ ମେଣ୍ଟରେ ଥିବା ଦଳଗୁଡ଼ିକ ସହ ଆଲୋଚନା କରିଥିଲେ।କଂଗ୍ରେସ ଟିଭିକେକୁ ସମର୍ଥନ ଦେବାକୁ ଘୋଷଣା କରିବା ସହ ଡିଏମକେ ମେଣ୍ଟରୁ ଓହରି ଆସିଥିଲା। ଏହା ସହିତ ସିପିଆଇ (CPI), ସିପିଆଇ-ଏମ୍ (CPI-M), ଭିସିକେ (VCK) ଏବଂ ଆଇୟୁଏମଏଲ (IUML) ମଧ୍ୟ ବିଜୟଙ୍କ ନେତୃତ୍ୱାଧୀନ ସରକାରକୁ ବାହାରୁ ସମର୍ଥନ ଦେଇଛନ୍ତି।
ଏହି ସମର୍ଥନ ବଳରେ ବିଜୟ ଗତ ମେ’ ୧୦ ତାରିଖରେ ତାମିଲନାଡୁର ମୁଖ୍ୟମନ୍ତ୍ରୀ ଭାବେ ଶପଥ ନେଇଥିଲେ।ମୁଖ୍ୟମନ୍ତ୍ରୀ ଦାୟିତ୍ୱ ଗ୍ରହଣ କରିବା ପରେ ବିଜୟ ଘରୋଇ ଗ୍ରାହକଙ୍କ ପାଇଁ ମାଗଣା ବିଦ୍ୟୁତ, ମହିଳା ସୁରକ୍ଷା ଏବଂ ନିଶାଦ୍ରବ୍ୟ ବିରୋଧୀ ଅଭିଯାନ ଭଳି ତିନୋଟି ପ୍ରମୁଖ ଜନକଲ୍ୟାଣକାରୀ ଯୋଜନା ଉପରେ ମୋହର ମାରିଛନ୍ତି। ଏହାସହ ସେ ପ୍ରଶାସନିକ ଅଧିକାରୀଙ୍କ ସହ ଆଇନ ଶୃଙ୍ଖଳା ସମ୍ପର୍କରେ ମଧ୍ୟ ସମୀକ୍ଷା କରିଛନ୍ତି।
ଷ୍ଟାଲିନଙ୍କୁ ଭେଟିବା ପୂର୍ବରୁ ବିଜୟ ସମାଜ ସଂସ୍କାରକ ପେରିୟାରଙ୍କ ସ୍ମୃତିପୀଠରେ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ। ପେରିୟାରଙ୍କୁ ସେ ନିଜର ଆଦର୍ଶ ବୋଲି ମାନନ୍ତି। ଏହା ସହିତ ସେ ଦ୍ରାବିଡ କାଜଗମ ସଭାପତି କେ. ବୀରମଣିଙ୍କୁ ମଧ୍ୟ ଭେଟି ଶୁଭେଚ୍ଛା ଗ୍ରହଣ କରିଥିଲେ। ଅନ୍ୟପଟେ ବିଧାନସଭା ବାଚସ୍ପତି ପଦ ପାଇଁ ଟିଭିକେ ବିଧାୟକ ଜେ.ସି.ଡି. ପ୍ରଭାକର ନିଜର ନାମାଙ୍କନ ଦାଖଲ କରିଛନ୍ତି।